Ripfumelo

Nhlamuselo: “[Ripfumelo] i ku tshemba loku tiyeke ehenhla ka swilo leswi languteriwaka, ni ku kholwa swinene hi tlhelo ra swilo leswi nga voniwiki.” (Hev. 11:1) Ripfumelo ra ntiyiso a hi ku pfuketana u kholwa, hi leswaku, ku hatlisela ku pfumela nchumu wo karhi handle ka vumbhoni lebyi twalaka kumbe hi mhaka ya leswi munhu a lavaka swi va tano. Ripfumelo ra ntiyiso ri lava vutivi bya xisekelo kumbe bya nkoka, ku tolovelana ni vumbhoni, kun’we ni ku tlangela loku humaka embilwini ka leswi vumbhoni byebyo byi swi kombisaka. Xisweswo, hambi leswi swi nga kotekiki ku va ni ripfumelo ra xiviri loko u nga ri na vutivi lebyi kongomeke, Bibele yi ri munhu u kombisa ripfumelo “hi mbilu.”—Rhom. 10:10.

Ha yini vanhu vo tala va pfumala ripfumelo?

Ripfumelo i mbhandzu wa moya wa Xikwembu, naswona Xikwembu xi va nyika hi ntsako lava lavaka moya wa xona. (Gal. 5:22; Lk. 11:13) Kutani vanhu lava nga riki na ripfumelo a va wu lavi moya wolowo, kumbe va wu lavela xikongomelo lexi hoxeke kumbe va wu sivela leswaku wu nga tirhi evuton’wini bya vona. Ku ni swilo swo tala leswi khumbaka leswi:

Ku pfumala vutivi lebyi kongomeke bya Bibele: Bibele yi ve kona hikwalaho ka moya wa Xikwembu, yi huhuteriwe hi Xikwembu. (2 Tim. 3:16, 17; 2 Sam. 23:2) Ku tsandzeka ku yi dyondza swi endla leswaku ripfumelo ra ntiyiso ri nga kuli. Hambi loko swirho swa kereke swi ri na tona Tibibele, loko swi dyondzisiwe mianakanyo ya vanhu ematshan’wini ya Rito ra Xikwembu, swi ta pfumala ripfumelo ra ntiyiso eka Xikwembu ni xikongomelo xa xona. Leswaku swi tlhantlha swiphiqo swa vutomi, swi ta rhandza ku tshemba mianakanyo ya swona ni ya vanhu van’wana.—Ringanisa Matewu 15:3-9.

Ku pfilunganyiwa hi vukhongeri bya mavunwa: Vo tala va pfilunganyiwe hi vukanganyisi bya tikereke ta Vujagana, leti vulaka leswaku ti dyondzisa Rito ra Xikwembu kambe ti hluleka ku hanya hi ku pfumelelana ni leswi ri swi vulaka. Van’wana a va namarhele vukhongeri lebyi nga riki bya Vukreste, kambe va vone mihandzu yo biha hi swiendlo swa byona kumbe va kuma leswaku leswi va swi pfumelaka a swi va pfunanga leswaku va langutana ni swiphiqo swa vutomi. Hi ku pfumala vutivi lebyi kongomeke bya Xikwembu xa ntiyiso, vanhu vo tano va fularhela xin’wana ni xin’wana lexi yelanaka ni vukhongeri.—Ringanisa Varhoma 3:3, 4; Matewu 7:21-23.

A va xi twisisi xivangelo xa ku va Xikwembu xi pfumelele vubihi: Vanhu vo tala a va xi twisisi lexi endleke leswaku Xikwembu xi pfumelela vubihi kutani va xi sola hikwalaho ka swilo swo biha hinkwaswo leswi nga kona. A va swi lemuki leswaku ku voyamela ka munhu evubihini a ku vangiwi hi ku rhandza ka Xikwembu kambe ku vangiwa hi xidyoho xa Adamu. (Rhom. 5:12) Swi nga ha endleka va nga byi xiyi vukona bya Sathana Diyavulosi ni nkucetelo wakwe etimhakeni ta misava, kutani swilo swo homboloka leswi hlohloteriwaka hi Sathana va ri swi vangiwa hi Xikwembu. (1 Yoh. 5:19; Nhlav. 12:12) Loko va swi xiya swilo leswi hi mpimo wo karhi, va nga ha ehleketa leswaku Xikwembu xa hlwela, hikuva a va yi voni kahle mhaka ya vuhosi bya vuako hinkwabyo naswona a va yi voni mhaka ya leswaku ku lehisa mbilu ka Xikwembu ku fikela sweswi ku va nyika lunghelo leri nga va fanelangiki leswaku va pona. (Rhom. 2:4; 2 Pet. 3:9) Nakambe, a va swi lemuki hi ku helela leswaku Xikwembu xi veke nkarhi lowu xi nga ta lovisa hinkwavo lava endlaka vubihi.—Nhlav. 22:10-12; 11:18; Hab. 2:3.

Vutomi lebyi fumiwaka hi ku navela ni mavonelo ya nyama: Hi ntolovelo, vanhu lava nga riki na ripfumelo ra ntiyiso va tinyiketele ku landzelela swilaveko swin’wana. Van’wana va nga ha vula leswaku va pfumela eBibeleni kambe u kuma leswaku a va yi dyondzanga hi ku helela kumbe va tsandzeka ku anakanyisisa hi vukheta hi leswi a va swi hlaya, ni xivangelo xa ku tsariwa ka swona swin’we ni ndlela leyi swi tirhaka ha yona evuton’wini bya siku na siku. (Ringanisa 1 Tikronika 28:9.) Minkarhi yin’wana, va tsandzeke ku hlayisa ripfumelo leri a va ri na rona, naswona ematshan’wini ya sweswo, va tshike ku navela ka swilo swo biha ku fuma mboyamelo wa timbilu ta vona ivi va hambuka eka Xikwembu ni tindlela ta xona.—Hev. 3:12.

Xana munhu a nga ri kuma njhani ripfumelo?

Rhom. 10:17: “Ku pfumela ku ta hi ku twa.” (Ringanisa Mintirho 17:11, 12; Yohane 4:39-42; 2 Tikronika 9:5-8. Munhu u fanele ku rhanga hi ku twa leswi Bibele yi swi vulaka, kutani u ta tiyisa ripfumelo rakwe loko a yi kambisisa hi vukheta leswaku a khorwiseka hi ntiyiso wa yona.)

Rhom. 10:10: “Munhu ú pfumela hi mbilu.” (Hi ku anakanyisisa hi swilo swa Xikwembu leswaku a swi twisisa hi xitalo, munhu u swi dzikisa embilwini yakwe yo fanekisela.)

Ripfumelo ra tiya loko munhu a hanya hi ku ya hi switshembiso swa Xikwembu ivi a vona mikateko ya Xikwembu eka leswi xi swi endleke.—Vona Pisalema 106:9-12.

Xikombiso: Kumbexana u ni munghana loyi u nga ha vulaka leswi ha yena: ‘Munhu luya ndza n’wi tshemba. Ndza n’wi tshemba leswaku u ta endla leswi a swi vulaka; naswona ndza swi tiva leswaku loko ndzi ri ni xiphiqo, u ta ndzi pfuna.’ Sweswo u nge swi vuli eka munhu loyi u sunguleke ku n’wi vona tolo, a swi tano ke? U fanele a va munhu loyi ku nga khale u n’wi tiva, loyi a kombiseke ku tshembeka kakwe minkarhi yo tala. Ripfumelo ra vukhongeri na rona ri tano. Leswaku u va ni ripfumelo, u fanele u tinyika nkarhi wo tiva Yehovha ni ndlela leyi a endlaka swilo ha yona.

Ripfumelo ra leswaku Xikwembu xi kona

Vona matluka 409-15, ehansi ka xihloko-nkulu lexi nge “Xikwembu.”

Ku va ni ripfumelo eka ntshembo wa mafambiselo lamantshwa ya swilo yo lulama

Loko munhu a tolovelana kahle ni matimu ya ntirhisano wa Yehovha eka malandza ya yena, u va ni langutelo ro fana ni ra Yoxuwa, loyi a nga te: “Mi tiv̌a leŝaku a ku wanga na rito riṅwe ra marito hikwawo la’manene lawa Yehova, Šikwembu ša ṅwina, a ma v̌uleke henhla ka ṅwina; kambe mi endleriwe hikwawo, a ku wanga na rito riṅwe.”—Yox. 23:14.

Switshembiso swa Bibele swa rihanyo leri pfuxetiweke, ku pfuxiwa eku feni, ni swin’wana, swi tiyisekisiwa hi rhekhodo ya mahlori lama endliweke hi Yesu Kreste. Leswi a hi ntsheketo. Hlaya marungula ya Tievhangeli kutani u vona vumbhoni bya leswaku ma ni mimfungho hinkwayo leyi kombaka ntiyiso wa matimu. Ku boxiwa tindhawu ta matiko; ku boxiwa mavito ya vafumi va tiko va nkarhi wolowo; ku hlayisiwe timhaka ta timbhoni to hlayanyana leti ti swi voneke hi mahlo. Ku anakanyisisa hi vumbhoni lebyi swi nga tiyisa ripfumelo ra wena eswitshembisweni swa Bibele.

Yana eHolweni ya Mfumo ya Timbhoni ta Yehovha ni le mintsombanweni ya tona, kutani u ta tivonela hi ya wena leswaku ndzayo ya Bibele ya byi hundzula vutomi, leswaku yi nga endla vanhu va tshembeka ni ku hanya vutomi lebyinene, leswaku yi nga endla vanhu va tinxaka hinkwato ni va matiko hinkwawo leswaku va hanyisana ni ku tirhisana hi moya wa vumakwavo bya ntiyiso.

Xana mintirho ya laveka hakunene loko munhu a ri ni ripfumelo?

Yak. 2:17, 18, 21, 22, 26: “Ku pfumela ku ri koxe, loko ku nga tikombi hi mintirho, ku file. Kambe munhu un’wana a nga ku: ‘Xana wena u ni ku pfumela xana?’ Mina ndzi ta ku: ‘Ndzi ni mintirho! Ndzi kombe ku pfumela ka wena loku nga riki na mintirho, kutani mina hi mintirho ya mina ndzi ta ku komba ku pfumela ka mina!’ Xana Abrahama tata wa hina a nga endliwanga la lulameke emahlweni ka Xikwembu hi mhaka ya mintirho xana, loko a nyiketile Isaka n’wana wa yena egandzelweni? Wa swi vona leswaku ku pfumela ka yena a ku seketeriwa hi mintirho ya yena, kutani ku pfumela ku hetisisiwe hi mintirho. Hikokwalaho, tanihi leswi miri lowu nga hava moya wu feke, ku pfumela na kona loku nga hava mintirho ku file.”

Xikombiso: Jaha ri nga ha gangisa ntombhi, ri yi byela leswaku ra yi rhandza. Kambe loko ri nga yi byeli leswaku va tekana, xana hakunene ri kombisa leswaku rirhandzu ra rona i ra ntiyiso? Hi laha ku fanaka, mintirho i ndlela yo kombisa ku tiya ka ripfumelo ra hina ni rirhandzu ra hina. Loko hi nga xi yingisi Xikwembu a hi xi rhandzi hi ku hetiseka kumbe a hi pfumeli leswaku tindlela ta xona ti lulamile. (1 Yoh. 5:3, 4) Kambe a hi nge pfuki hi lulameriwe hi ku pona ku nga khathariseki leswaku hi endla mintirho ya njhani. Vutomi lebyi nga heriki i nyiko leyi humaka eka Xikwembu ha Yesu Kreste, a hi hakelo ya mintirho ya hina.—Ef. 2:8, 9.