Ndzima 1

Marungula Yo Huma eTilweni

ENTIYISWENI, Bibele hinkwayo i rungula ro huma etilweni, leri nyikeriweke hi Tata wa hina wa le tilweni leswaku ri hi letela. Hambi swi ri tano, marungula mambirhi yo hlawuleka ma nyikeriwile kwalomu ka malembe ya 2 000 lama hundzeke hi ntsumi leyi “yimeke emahlweni ka Xikwembu.” Vito ra yona i Gabriyele. A hi kambisiseni swiyimo swa maendzo lawa mambirhi ya nkoka yo ta emisaveni.

Lembe i 3 B.C.E. eswitsungeni swa Yudiya, handle ko kanakana a hi kule na Yerusalema, ku tshama muprista wa Yehova loyi vito ra yena a nga Zakariya. Va kurile, yena na nsati wa yena Elizabeta. Naswona a va na vana. Zakariya u tlhelela entirhweni wa yena wa vuprista etempeleni ya Xikwembu eYerusalema. Xikan’we-kan’we Gabriyele wa humelela hi tlhelo ra xinene ra altari ya magandzelo.

Zakariya u tshuke ngopfu. Kambe Gabriyele u herisa ku chava, ka yena a ku, “u nga chavi Zakariya, hikuva ku khongela ka wena ku yingisiwile; Elizabeta nsati wa wena, u ta veleka n’wana wa mufana, kutani u ta n’wi thya vito ra Yohane.” Gabriyele u ya emahlweni a tivisa leswaku Yohane “u ta endla leswaku lavo tala exikarhi ka Vaisrayele va hundzukela eka [Yehova] Xikwembu xa vona.”

Hambi swi ri tano, Zakariya a nga swi tshembi. Swi vonaka swi nga koteki leswaku yena na Elizabeta va nga va ni vana emalembeni ya vona. Kutani Gabriyele u ri eka yena: “U ta hundzuka mbeveve, u hluleka ku vulavula ku ko ku fika siku leri swilo leswi swi nga ta humelela ha rona, hikuva a wu pfumelanga marito ya mina.”

Ina, hi nkarhi wolowo, vanhu lava nga ehandle va vilela leswaku ha yini Zakariya a teka nkarhi wo leha etempeleni. Loko eku heteleleni a humela ehandle, a nga swi koti ku vulavula kambe u endla swikombiso hi mavoko ya yena, naswona va xiya leswaku u vone mahlori.

Endzhaku ka loko Zakariya a hete nkarhi wa yena wa ntirho wa le tempeleni, u tlhelela ekaya. Naswona endzhakunyana swa humelela hakunene—Elizabeta wa tika! Loko a yimele n’wana wa yena leswaku a velekiwa, Elizabeta u tshama ekaya a nga voni vanhu ku ringana tin’hweti ta ntlhanu.

Endzhakunyana Gabriyele wa humelela nakambe. Xana u vulavula na mani? Na nhwana la nga si tekiwaka loyi vito ra yena ku nga Mariya wa le tikweni ra Nazareta. I rungula rihi leri a ri nyikaka enkarhini lowu? Yingisela! Gabriyele u byela Mariya a ku: “U kumile tintswalo emahlweni ka Xikwembu. Vona, u ta tika, kutani u ta veleka n’wana wa mufana; u ta n’wi thya vito ra Yesu.” Gabriyele wa engetela a ku: “Yena u ta va nkulukumba, a vuriwa n’wana wa loyi a nga henhla-henhla; . . . u ta fuma rixaka ra Yakobo hi laha ku nga heriki; vuhosi bya yena byi nga ka byi nga vi na makumu.”

Hi nga tiyiseka leswaku Gabriyele a a titwa a ri na lunghelo ro tisa marungula lawa. Naswona loko hi hlaya swo tala hi Yohane na Yesu, hi ta vona kahle mhaka leyi marungula lama humaka etilweni ma nga ya nkoka ha yona. 2 Timotiya 3:16; Luka 1:5-33.

▪ I marungula wahi mambirhi ya nkoka lama tisiwaka ma huma etilweni?

▪ I mani la tisaka marungula, naswona ma yisiwa eka vamani?

▪ Ha yini marungula swi tika ku ma tshemba?