Marungula Mambirhi Lama Humaka Eka Xikwembu

Hi fanele hi teka Bibele hinkwayo tanihi rungula leri humaka eka Xikwembu. Tata wa hina wa le tilweni u hi nyike rona leswaku a hi dyondzisa. Hambiswiritano, ehleketa hi marungula mambirhi yo hlawuleka lama vuriweke eka malembe ya 2 000 lama hundzeke. Ma vuriwe hi ntsumi Gabriyele, leyi “yimaka emahlweni ka Xikwembu.” (Luka 1:19) A ku endleka yini loko ntsumi yi vula marungula lawa ya nkoka?

I lembe ra kwalomu ka 3 B.C.E. Gabriyele u ri vula kwihi rungula ro sungula? Zakariya muprista wa Yehovha, u tshama eswintshabyanini swa Yudiya kumbexana ekusuhi ni le Yerusalema. Yena ni nsati wakwe Elizabeta va kurile kambe a va na vana. Se i nkarhi wa leswaku Zakariya a ya va muprista etempeleni ya Xikwembu le Yerusalema. Loko Zakariya a ri etempeleni, hi xitshuketa Gabriyele u humelela ekusuhi ni altari ya murhi wo nun’hwela.

Sweswo swi n’wi chuhisile Zakariya. Ntsumi yi vohlisa ku chuha ka Zakariya, yi ku: “U nga chavi Zakariya, hikuva xikombelo xa wena xi twiwile, nsati wa wena Elizabeta u ta ku velekela n’wana, kutani u ta n’wi thya vito ra Yohane.” Gabriyele u tlhela a vula leswaku Yohane “u ta xiximeka emahlweni ka Yehovha” naswona u ta “endla leswaku vanhu va lunghekela ku tirhela Yehovha.”—Luka 1:13-17.

Eka Zakariya, sweswo swi vonaka swi nga tshembisi. Hikwalahokayini? Hikuva yena na Elizabeta se va dyuharile. Hikwalaho, Gabriyele u ri: “A wu nge he swi koti ku vulavula ku fikela siku leri swilo leswi swi nga ta endleka ha rona, hikuva a wu ma tshembanga marito ya mina.”—Luka 1:20.

Hi nkarhi wolowo, vanhu va tivutisa leswaku hikwalahokayini Zakariya a hlwela ku humela ehandle. U hetelele a humile kambe se i mbheveve. Zakariya u vulavula hi ku tirhisa mavoko ntsena. Swi le rivaleni leswaku u vone singita etempeleni.

Loko Zakariya a heta ntirho wakwe wa le tempeleni, u tlhelela ekaya. Hiloko Elizabeta a tika endzhakunyana ka sweswo! Ntlhanu hinkwato loko a ha rindzele ku veleka n’wana, Elizabeta u tshama ekaya a ri yexe.

Kutani Gabriyele a humelela ra vumbirhi. Eka mani? U humelela eka Mariya, nhwanyana loyi a nga tekiwangiki, loyi a tshamaka en’walungwini wa Yerusalema, exifundzheni xa Galeliya, emutini wa Nazareta. Ntsumi yi ri yini eka yena? Yi ri: “Xikwembu xi ku katekisile.” Gabriyele u tlhela a byela Mariya a ku: “U ta tika, u veleka n’wana wa jaha kutani u ta n’wi thya vito ra Yesu.” Gabriyele u ya emahlweni a ku: “N’wana loyi u ta xiximeka swinene naswona u ta vuriwa N’wana wa La Nga Le Henhlahenhla, . . . u ta va Hosi ya ndyangu wa Yakobo hilaha ku nga heriki, Mfumo wakwe wu ta fuma hilaha ku nga heriki.”—Luka 1:30-33.

U ta swi xiya leswaku hikwalahokayini a ku ri nkateko eka Gabriyele ku va a hundzisela marungula lama mambirhi. Loko hi ri karhi hi dyondza hi Yohane na Yesu, hi ta swi twisisa kahle leswaku hikwalahokayini marungula lama humaka etilweni ma ri ya nkoka swinene.