Ku Tswariwa Ka Loyi A Nga Ta Lunghisa Ndlela

Nkarhi wa leswaku Elizabeta a veleka se wu fikile. Xaka rakwe Mariya, u tshame na yena tin’hweti tinharhu. Kambe se wu fikile nkarhi wa leswaku Mariya a tlhela a teka riendzo ro leha a kongoma en’walungwini wa swintshabyana swa Yudiya a tlhelela ekaya eNazareta. Ku sele kwalomu ka tin’hweti ta tsevu leswaku na yena a va ni n’wana.

Endzhaku ka loko Mariya a fambile, Elizabeta u sala a veleka. Swa tsakisa leswi Elizabeta a koteke ku veleka ni leswi yena ni n’wana wakwe va hanyeke kahle! Loko Elizabeta a komba vaakelani ni maxaka n’wana wakwe, va tsaka swin’we na yena.

Nawu lowu Yehovha a wu nyikeke Vaisrayele a wu vula leswaku hi siku ra vunhungu loko n’wana wa mufana a velekiwile, a a fanele a yimbisiwa naswona a a ta thyiwa vito endzhaku ka sweswo. (Levhitika 12:2, 3) Van’wana va vula leswaku n’wana wa mufana wa Zakariya u fanele a thyiwa vito ra Zakariya tata wakwe. Hambiswiritano, Elizabeta u va byela a ku: “A swi nge vi tano, vito rakwe ku ta va Yohane.” (Luka 1:60) Tsundzuka leswaku ntsumi Gabriyele yi vule leswaku n’wana loyi u fanele a thyiwa vito leri nge Yohane.

Hiloko vaakelani ni maxaka va ku: “A ku na munhu emaxakeni ya wena loyi a vitaniwaka hi vito leri.” (Luka 1:61) Kutani va vutisa Zakariya hi ku tirhisa mavoko vito leri a lavaka ku thya n’wana wakwe. Zakariya u kombela ribye ra xiphepherhele a tsala eka rona a ku: “Vito rakwe i Yohane.”—Luka 1:63.

Hi nkarhi wolowo, hi singita Zakariya u sungula ku vulavula. U ta tsundzuka leswaku Zakariya u sungule ku nga ha vulavuli endzhaku ka loko a nga tshembanga loko ntsumi yi n’wi byela leswaku Elizabeta a a ta veleka n’wana. Kutani loko Zakariya a sungula ku vulavula, vaakelani vakwe va hlamala kutani va tivutisa va ku: “Xana n’wana loyi u ta va yini?” (Luka 1:66) Va swi xiya leswaku i Yehovha loyi a thyeke Yohane vito.

Hi ku susumetiwa hi moya lowo kwetsima Zakariya u ri: “A ku dzunisiwe Yehovha Xikwembu xa Israyele, hikuva u twele vanhu vakwe vusiwana kutani a va ponisa. U hi nyike muponisi loyi a nga ni matimba loyi a humaka endyangwini wa Davhida nandza wakwe.” (Luka 1:68, 69) Loko a ku, “muponisi loyi a nga ni matimba” u vula Hosi Yesu loyi a ha ta velekiwa. Zakariya u vula leswaku hi ku tirhisa Yena, Xikwembu xi ta endla ‘leswaku hi xi gandzela handle ko chava, endzhaku ka loko a hi ponisile emavokweni ya valala va hina leswaku hi ta tshembeka eka xona hi endla leswi lulameke vutomi bya hina hinkwabyo.’—Luka 1:74, 75.

Zakariya u profeta mayelana ni n’wana wakwe a ku: “Loko ku ri wena n’wananga, u ta vuriwa muprofeta wa Xikwembu Lexi Nge Henhlahenhla, hikuva Yehovha u ta rhuma wena ku sungula leswaku u ya lunghisa tindlela takwe, leswaku a ta dyondzisa vanhu vakwe hi ku ponisiwa swin’we ni ku rivaleriwa ka swidyoho swa vona, hikwalaho ka ntwelavusiwana wa Xikwembu xa hina. Hi ta vona ku vonakala loku humaka etilweni ku voninga ku kota nhlikanhi, ku voningela lava tshamaka emunyameni ni le ndzhutini wa rifu, ni ku hi komba leswi hi nga swi endlaka leswaku hi va ni ku rhula.” (Luka 1:76-79) Vuprofeta lebyi bya khutaza hakunene!

Hi nkarhi lowu, Mariya loyi a nga si tekiwaka se u fikile ekaya eNazareta. Ku ta endleka yini hi yena loko se swi va erivaleni leswaku u tikile?