Ndzima 3

Mulunghiseleri Wa Ndlela Wa Velekiwa

ELIZABETA u le kusuhi no kuma n’wana wa yena. Eka tin’hweti letinharhu leti hundzeke, Mariya a a tshama na yena. Kambe sweswi i nkarhi eka Mariya wa leswaku a lela ni ku teka riendzo ra yena ro tlhelela ekaya eNazareta. Eka tin’hweti ta kwalomu ka tsevu na yena u ta va na n’wana.

Endzhakunyana ka loko Mariya a sukile, Elizabeta wa veleka. Mawaku ntsako lowu nga kona kwalaho loko n’wana a velekiwa hi ndlela leyinene naswona Elizabeta na n’wana va ri eka xiyimo lexinene xa rihanyo! Loko Elizabeta a kombisa n’wana eka vaakelani ni maxaka ya yena, hinkwavo va tsaka na yena.

Hi siku ra vunhungu endzhaku ka ku velekiwa ka yena, hi ku ya hi Nawu wa Xikwembu, n’wana wa mufana eIsrayele u fanele ku yimbisiwa. Kutani lowu i nkarhi wa vanghana ni maxaka leswaku va endza. Va vula leswaku n’wana u fanele ku thyiwa hi vito ra tata wakwe, Zakariya. Kambe Elizabeta wa ala. U ri: “E-e, u ta thyiwa ra Yohane.” Tsundzuka, rero i vito leri ntsumi Gabriyele yi vuleke leswaku ri fanele ri nyikiwa n’wana.

Hambi swi ri tano, vanghana va yena va sindzisa: “A ku na munhu exikarhi ka va ka n’wina la nga na vito rero.” Kutani, hi ku tirhisa ririmi ra swikombiso, va vutisa tata wa yena vito leri a lavaka ku ri nyika mufana. Loko a kombele xo tsalela eka xona, leswi hlamariseke vanhu hinkwavo, Zakariya u tsala a ku: “Vito ra yena i Yohane.”

Hikwalaho ka sweswo, ku vulavula ka Zakariya ka vuyeteriwa hi hlori. U ta tsundzuka leswaku u lahlekele hi vuswikoti byo vulavula loko a nga tshembanga rungula ra ntsumi ra leswaku Elizabeta u ta va na n’wana. Ina, loko Zakariya a vulavula, hinkwavo lava va tshamaka ekusuhi na yena va hlamala naswona va vutisana va ku “N’wana loyi u ta va lowo yini xana?”

Zakariya sweswi u tele hi moya lowo kwetsima, kutani wa huwelela a ku: “A ku dzunisiwe [Yehova] Xikwembu xa Israyele, hikuva xi endzerile tiko ra xona, xi ri kutsurile; xi hi pfuxele Muponisi wa matimba erixakeni ra Davhida nandza wa xona.” Kahle-kahle “muponisi wa matimba,” i Hosi Yesu, loyi a ta velekiwa. Hikwalaho ka yena, Zakariya u ri, Xikwembu a “xi tshembisile ku hi ponisa eka valala va hina, ni le mavokweni ya hinkwavo lava va hi vengaka. A xi te, xi ta tsetselela vatata va hina ni ku anakanya ntwanano wa xona lowo hlawuleka; hi masiku hinkwawo.”

Kutani Zakariya wa vhumba mayelana na n’wana wa yena Yohane a ku: “Na wena xihlangi, u ta vuriwa muprofeta wa Loyi-a-nge-henhla-henhla, hikuva u ta rhangela hosi emahlweni ku lunghisa ndlela ya yona ni ku tivisa tiko ra yona leswaku ri ta ponisiwa, ni ku rivaleriwa ka swidyoho swa rona swi ta endliwa hi tintswalo ta Xikwembu xa hina, lexi xi hi twelaka vusiwana, hikuva hi tintswalo leti hi ta endzeriwa hi ku vonakala loku humaka hi le tilweni, ku ta voninga lava nga tshama emunyameni ni le ndzhutini wa rifu, ni ku hi fambisa etindleleni ta ku rhula.”

Hi nkarhi lowu Mariya, loyi entiyisweni a nga wansati la nga tekiwangiki, u fika ekaya eNazareta. Ku ta humelela yini eka yena loko swi va erivaleni leswaku u tikile? Luka 1:56-80; Levitika 12:2, 3.

▪ Yohane hi lonkulu eka Yesu hi ndlela yihi?

▪ I swilo swihi swi humelelaka loko Yohane a ri na masiku ya nhungu hi vukhale?

▪ Xikwembu xi wu yise njhani nyingiso wa xona eka vanhu va xona?

▪ I ntirho wihi lowu Yohane a vhumberiwaka ku wu endla?