Swivutiso Swa Vahlayi

Xana Mariya, loyi a veke mana wa Yesu, ana se a tikile loko a endzela xaka rakwe Elizabeta?

Ina, a a tikile.

Eka Luka ndzima 1, ro sungula hi hlaya hi ta ku tika ka Elizabeta, nsati wa muprista Zakariya, loyi a nga veleka Yohane (Mukhuvuri). “Hi n’hweti ya vu-6 [ya Elizabeta] ntsumi Gabriele” yi endzele Mariya ku n’wi tivisa leswaku, a a ta tika kutani a veleka “Nwana wa Loyi-a-nge-henhla-henhla.” (Luka 1:26, 30-33) Kambe xana Mariya u tike rini?

Mhaka ya Luka yi ya emahlweni yi hlamusela leswaku Mariya hi nkarhi wolowo u ye eYuda ku ya endzela xaka rakwe leri tikeke Elizabeta. Loko vavasati lavambirhi va hlangana, n’wana la nge khwirini ra Elizabeta (Yohane) a tshuka-tshuka. Elizabeta u n’wi vule ‘n’wana la nge ndzeni ka Mariya’ naswona u vitane Mariya “mana wa Hosi yanga.” (Luka 1:39-44) Hikwalaho hi nga ha gimeta hi ku vula leswaku Mariya u swi xiyile leswaku ana se a tikile loko a ya vona Elizabeta.

Eka Luka 1:56 ha hlaya: “Mariya u tshamile na Elizabeta tinhweti leti laveke ku ringana tinharhu, kutani a tlhelela ekaya.” Ndzima leyi a yi nyiki siku leri kongomeke. Yi ri “tin’hweti leti laveke ku ringana tinharhu,” leswi nga ha yisaka Elizabeta eka kaye wa tin’hweti a tikile.

Endzhaku ko pfuna Elizabeta hi nkarhi wa xiphemu xakwe xo hetelela xa ku tika ka yena, Mariya u tlhelele ekaya rakwe eNazareta. Kumbexana Mariya u anakanye leswaku loko Elizabeta a veleka (Yohane), ku nga ha va ni vaendzi vo tala, van’wana va vona va nga ha va va ri maxaka. Sweswo a swi ta va leswi khomisaka tingana loko wa nhwana la nga tekiwangiki a tikile. Xana Mariya a a ri ni nkarhi wo tanihi kwihi a tikile loko a suka eNazareta? Tanihi leswi a a ri na Elizabeta “tin’hweti leti lavaka ku ringana tinharhu,” kumbexana Mariya u ta va a ri eku heteni ka n’hweti ya vunharhu kumbe emasungulweni ya n’hweti ya vumune ya ku tika ka yena loko a tlhelela eNazareta.—Xiitaliki i xerhu.