Yesu A Xiximiwa A Nga Si Tswariwa

Endzhaku ka loko ntsumi Gabriyele yi byele Mariya loyi a nga muntshwa leswaku u ta veleka n’wana wa jaha loyi a a ta thyiwa vito leri nge, Yesu naswona a a ta va Hosi ya Mfumo lowu nga ta fuma hilaha ku nga heriki, Mariya u vutisa a ku: “Xana leswi swi ta endlekisa ku yini, hikuva a ndzi si tshama ndzi etlela ni wanuna?”—Luka 1:34.

Gabriyele u hlamula a ku: “Moya lowo kwetsima wu ta va ehenhla ka wena, naswona matimba ya La Nge Henhlahenhla ma ta ku funengeta. Hikwalaho ka sweswo, n’wana yoloye u ta kwetsima, u ta vuriwa N’wana wa Xikwembu.”—Luka 1:35.

Kumbexana leswaku Gabriyele a pfuna Mariya a amukela rungula rakwe u ri: “Yingisa, Elizabeta xaka ra wena na yena u tike n’wana wa jaha hambileswi a dyuhaleke naswona vanhu a va vula leswaku a nga veleki, leyi i n’hweti ya yena ya vutsevu; hikuva Xikwembu a xi tsandziwi hi nchumu.”—Luka 1:36, 37.

Mariya u amukela leswi Gabriyele a n’wi byeleke swona, hilaha hi swi vonaka hakona eka nhlamulo yakwe, u ri: “Ndzi nandza wa Yehovha! A swi endleke hilaha u vuleke hakona.”—Luka 1:38.

Loko Gabriyele a fambile, Mariya u sala a ti lulamisela ku vhakela Elizabeta loyi a tshamaka ni nuna wakwe Zakariya eswintshabyanini swa Yudiya ekusuhi na Yerusalema. Ku suka ekaya ka va Mariya eNazareta, riendzo leri ri nga ha teka masiku manharhu kumbe mune.

Mariya u hetelele a fika ekaya ra Zakariya. Hiloko a nghena, a xeweta xaka rakwe Elizabeta. Loko Elizabeta a n’wi vona, a tala hi moya lowo kwetsima kutani a byela Mariya a ku: “U katekile exikarhi ka vavasati, naswona Xikwembu a xi katekise n’wana loyi a nga ekhwirini ra wena! Ndzo va mani ku va ndzi endzeriwa hi mana wa Hosi yanga? Loko ndzi twa rito ra wena loko u ndzi xeweta, ricece leri nga ekhwirini ra mina ri tsakile.”—Luka 1:42-44.

Hiloko Mariya a hlamula a ri karhi a khapakhapa hi ntsako, a ku: “Ndzi dzunisa Yehovha, naswona mbilu ya mina ya tsaka swinene hikwalaho ka Muponisi wa mina ku nga Xikwembu, hikuva xi langute vusiwana bya mina nandza wa xona. Ku sukela sweswi vanhu hinkwavo va ta ndzi vula la tsakeke, hikuva Xikwembu xa matimba hinkwawo xi ndzi endlele leswinene.” Xiya leswaku hambileswi Mariya a katekisiweke, u yisa ku dzuneka hinkwako eka Xikwembu. U ri: “Vito ra xona ra kwetsima, naswona xi ta va komba tintswalo hinkwavo lava xi chavaka hilaha ku nga heriki.”—Luka 1:46-50.

Mariya u ya emahlweni a dzunisa Xikwembu hi marito lama huhuteriweke ya vuprofeta a ku: “Hinkwaswo ka swona xi swi endle hi voko ra xona ra matimba; kasi lava nga ni manyunyu xi va hangalasile. Xi wise vavanuna lava nga ni matimba eswiluvelweni, xi tlakusa lava titsongahataka; lava nga ni ndlala xi va phamele swilo leswinene va xurha kasi lava fuweke xi va tlherise va nga ri na nchumu. Xi pfune Israyele nandza wa xona leswaku a tsundzuka musa wa xona hilaha xi byeleke vakokwa wa hina, Abrahama ni vana vakwe hilaha ku nga heriki.”—Luka 1:51-55.

Mariya u tshama na Elizabeta kwalomu ka tin’hweti tinharhu kumbexana a ri karhi a pfuna Elizabeta tanihi leswi a ku sele mavhiki leswaku a veleka. A hi ku tsakisa ka swona, ku vona vavasati vambirhi vo tshembeka lava tikeke hi ku pfuniwa hi Xikwembu, va ri swin’we hi nkarhi lowu!

Nakambe xiya leswaku Yesu u xiximiwe a nge si velekiwa. Elizabeta u n’wi vitane “Hosi yanga” naswona ricece leri nga ekhwirini rakwe “ri tsakile” loko Mariya a fika. Sweswo swi hambana ngopfu ni ndlela leyi van’wana va n’wi khomeke hayona Mariya ni n’wana wakwe loyi a ha ta velekiwa, hilaha hi nga ta swi vona hakona.