Ndzima 9

Vutomi Bya Ndyangu Byo Sungula Bya Yesu

LOKO Yesu a ha kula eNazareta, hakunene a ku ri muti lowu nga riki wa nkoka, lowuntsongo. Wu akiwe edorobeni ra xitsunga xa ndhawu leyi vitaniwaka Galeliya, a ri le kule ni Nkova wo saseka wa Yezriyele.

Loko Yesu, kumbexana a ri na malembe mambirhi hi vukhale, u tisiwa laha hi Yosefa na Mariya ku suka aEgipta, handle ko kanakana hi yena ntsena n’wana wa Mariya. Kambe hayi swa nkarhi wo leha. Hi ku famba ka nkarhi, Yakobo, Yosefa, Simoni na Yudasi va tswariwa, naswona Mariya na Yosefa nakambe va kume vana va vanhwana. Eku heteleleni Yesu u na tsevu wa vamakwavo lavantsongo, va xinuna ni va xisati.

Yesu u na maxaka man’wana nakambe. Se ha n’wi tiva Yohane makwavo wa yena lonkulu, loyi a tshamaka ekule hi tikhilomitara to tala, eYudiya. Kambe loyi a tshamaka ekusuhi eGaleliya i Salome, loyi handle ko kanakana, a nga makwavo wa Mariya. Salome u tekiwe hi Zebediya, kutani vafana va vona vambirhi, Yakobo na Yohane, va ta va vamakwavo wa Yesu. A hi swi tivi, loko va ha kula, loko Yesu a hete nkarhi wo tala ni vafana lava, kambe endzhakunyana va ve vanghana lavakulu.

Yosefa a fanele ku tirha hi matimba leswaku a wundla ndyangu wa yena lowu kulaka. I muvatli. Yosefa u kurisa Yesu tanihi n’wana wa yena n’wini, kutani Yesu u vitaniwa “n’wana wa muvatli.” Yosefa u dyondzisa Yesu leswaku a va muvatli na yena naswona u dyondza kahle. Hi yona mhaka leyi vanhu endzhakunyana va nge hi Yesu, “Loyi i muvatli.”

Vutomi bya ndyangu wa Yosefa byi akiwe evugandzerini bya Yehova Xikwembu. Hi ku fambisana ni Nawu wa Xikwembu, Yosefa na Mariya va nyika vana va vona nkongomiso wa moya ‘loko va tshama endlwini ya vona, loko va famba endleleni, loko va etlela ni loko va pfuka.’ Ku na sinagoga eNazareta, naswona hi nga tiyiseka leswaku Yosefa na yena nkarhi na nkarhi u teka ndyangu wa yena ku ya gandzela kona. Kambe handle ko kanakana va kuma ntsako wa vona lowukulu emaendzweni ya nkarhi na nkarhi yo ya etempeleni ya Yehova eYerusalema. Matewu 13:55, 56; 27:56; Marka 15:40; 6:3; Deuteronoma 6:6-9.

▪ I vamakwavo vangani lavantsongo va xinuna ni va xisati lava Yesu a nga na vona, naswona mavito ya van’wana va vona i vamani?

▪ Vamakwavo wa Yesu vanharhu lava tivekaka kahle i vamani?

▪ I ntirho wihi wo tihanyisa lowu Yesu eku heteleleni a wu tekeke naswona ha yini?

▪ I nkongomiso wihi wa nkoka lowu Yosefa a wu nyikaka ndyangu wa yena?