U Kulela Enazareta

Yesu u kulela eNazareta, eximutanini lexi nga nyawuriki. Xi kumeka en’walungwini wa Yudiya, endhawini ya tintshava leyi vuriwaka Galeliya, evupeladyambu bya tiva lerikulu leri tivekaka tanihi Lwandle ra Galeliya.

Yesu u tisiwa laha hi Yosefa na Mariya loko va huma Egipta kumbexana a a ri ni malembe mambirhi. Hi nkarhi lowu swi tikomba ku ri yena ntsena n’wana loyi va nga na yena. Hambiswiritano, hi ku famba ka nkarhi ku tswariwe vamakwavo va xinuna ku nga, Yakobo, Yosefa, Simoni na Yudasi. Yosefa na Mariya va tlhele va va ni vana va vanhwanyana ku nga vamakwavo va Yesu vaxisati. Leswi vulaka leswaku Yesu u ni vamakwavo va tsevu.

Yesu u ni maxaka man’wana. Se hi twile hi ta Elizabeta ni n’wana wakwe Yohane. Va tshama ekule na yena, edzongeni wa Yudiya. Loyi a tshamaka eGaleliya ekusuhi na yena i Salome makwavo wa Mariya, leswi vulaka leswaku i mhanitsongo wa Yesu. Nuna wa Salome i Zebediya. Swi vonaka onge vana va vona vambirhi, Yohane na Yakobo hi vona vamakwavo va Yesu vo sungula. A hi swi tivi loko Yesu a hete nkarhi na vafana lava loko va ri karhi va kula kambe ha swi tiva leswaku va hetelele va ri vanghana vakwe lavakulu, va tirha tanihi vaapostola vakwe.

Yosefa u fanele a tirha hi matimba leswaku a khathalela ndyangu wakwe lowu yaka wu kula. I muvatli. Yosefa u kurisa Yesu tanihi n’wana wakwe, hi yona mhaka Yesu a vitaniwaka “n’wana wa muvatli.” (Matewu 13:55) Yosefa u dyondzisa Yesu ku vatla naswona u hetelela a ri muvatli. Kahlekahle hi ku famba ka nkarhi vanhu a va vitana Yesu va ku: ‘Loyi i muvatli.’—Marka 6:3.

Ndyangu wa Yosefa wu gandzela Yehovha. Leswaku va landzela Nawu wa Xikwembu, Yosefa na Mariya va dyondzisa vana va vona hi Xikwembu ‘loko va tshamile ekaya niloko va ri endleleni niloko va etlela niloko va pfuka.’ (Deteronoma 6:6-9) ENazareta ku na sinagoga. A swi kanakanisi leswaku nkarhi na nkarhi Yosefa u famba ni ndyangu wakwe leswaku va ya gandzela eka yona. Endzhakunyana ku vuriwe leswaku Yesu u ye esinagogeni “hilaha a a tolovele ku endla hakona hi siku ra Savata.” (Luka 4:16) Ndyangu lowu wu tlhela wu tiphina hi ku teka maendzo va ya etempeleni ya Yehovha eYerusalema.