Ndzima 11

Yohane A Lulamisa Ndlela

MALEMBE ya khume-nkombo ma hundzile ku sukela loko Yesu a ri n’wana wa malembe ya 12 a vutisa vadyondzisi etempeleni. I ximun’wana xa lembe ra 29 C.E., naswona un’wana ni un’wana, swi tikomba onge u vulavula hi Yohane makwavo wa Yesu, loyi a chumayelaka etikweni hinkwaro etlhelweni ka Nambu wa Yordani.

Hakunene Yohane i wanuna la tsakisaka, hi xivumbeko ni ku vulavula. Swiambalo swa yena i swa voya bya kamela, naswona u ambala vamba ra xikhumba emasengeni ya yena. Swakudya swa yena i tinjiya ni vulombe. Xana rungula ra yena hi rihi? “Hundzukani, hikuva Mfumo wa matilo wu le kusuhi.”

Rungula leri ri nyanyula vayingiseri va yena. Vo tala va xiya xilaveko xa vona xa leswaku va hundzuka, ku nga ku cinca langutelo ra vona ni ku ala ndlela ya vona ya khale ya vutomi tanihi leyi nga tsakisiki. Kutani ensin’wini hinkwayo eYordani, ni le Yerusalema, vanhu va ta ka Yohane hi nhlayo leyikulu naswona wa va khuvula, a va peta endzeni ka mati ya Yordani. Ha yini?

Yohane u khuvula vanhu hi xikombiso kumbe ku pfumela, ku hundzuka ka mbilu hinkwalaho ka swidyoho ehenhla ka ntwanano wa Nawu wa Xikwembu. Xisweswo, loko Vafarisi ni Vasaduki van’wana va ta eYordani, Yohane wa va avanyisa. U ri: “Rixaka ra timhiri, vekani mihandzu leyi fambelanaka ni ku hundzuka ka n’wina naswona mi nga anakanyi mi ku; ‘Hi na Abrahama, a nga yena tata wa hina. Hikuva ndza mi byela leswaku: Xikwembu xi nga pfuxela Abrahama vana hi maribye lawa. Nisweswi xihloka xi vekiwile etimitsweni ta mirhi; murhi wun’wana ni wun’wana lowu nga vekiki mihandzu leyinene, wu ta tsemiwa wu hoxiwa endzilweni.”

Hikwalaho ka nyingiso hinkwawo lowu Yohane a wu kumaka, Vayuda va rhumela vaprista ni Valevhi eka yena. Va vutisa: “Hi wena mani ke?”

Yohane wa tiyisa, “Mina a hi mina Mesiya.”

Va vutisa: “Loko swi ri tano, hi wena mani ke? Hi wena Eliya xana?”

U hlamula a ku: “A ndzi yena.”

“Hi wena Muprofeta xana?”

“E-e!”

Kutani ke va lavisisa: “Hi wena mani xana? Hi lava ku tlhela na nhlamulo eka lava va hi rhumeke. Xana wena ke, u tivitana mani?”

Yohane wa hlamusela: “Mina ndzi rito ra munhu la huwelelaka emananga a ku: ‘Lulamisani ndlela ya [Yehova],’ hi laha muprofeta Esaya a vuleke ha kona.”

Va lava ku tiva: “Leswi u nga riki Mesiya, u nga riki Eliya, u nga riki yena Muprofeta wa kona, hikwalaho ka yini u khuvula xana?”

U hlamula a ku: “Mina ndzi khuvula hi mati; exikarhi ka n’wina, ku yimile un’wana loyi mi nga n’wi tiviki; hi yena loyi a taka endzhaku ka mina.”

Yohane u lulamisa ndlela hi ku veka vanhu eka xiyimo lexi faneleke xa mbilu leswaku va amukela Mesiya, loyi a nga ta va Hosi. Hi ta Loyi, Yohane u ri: “Loyi a taka endzhaku ka mina, wa ndzi tlula hi matimba; a swi ndzi fanelanga ku n’wi hluvula tintanghu.” Entiyisweni, Yohane u tlhela a ku: “La taka endzhaku ka mina, wa ndzi tlula hi vukulu, hikuva ú vile kona mina ndzi nga si va kona.”

Xisweswo, rungula ra Yohane, leri nge “mfumo wa matilo wu le kusuhi,” ri tirha tanihi xitsundzuxo xa le rivaleni xa leswaku vutirheli bya Hosi leyi totiweke ya Yehova, Yesu Kriste, byi ta sungula ku nga ri khale. Yohane 1:6-8, 15-28; Matewu 3:1-12; Luka 3:1-18; Mintirho 19:4.

▪ Yohane i wanuna wa njhani?

▪ Ha yini Yohane a khuvula vanhu?

▪ Ha yini Yohane a vula leswaku Mfumo wu le kusuhi?