Yohane Mukhuvuri A Basisa Ndlela

Se ku hundze malembe ya kwalomu ka 17 ku sukela enkarhini lowu Yesu a vutiseke vadyondzisi swivutiso loko a ha ri ni malembe ya 12. Se i ximun’wana xa lembe ra 29 C.E. Vanhu vo tala va vulavula hi xaka ra Yesu ku nga Yohane loyi a nga le ku chumayeleni etikweni hinkwaro leri nga evupeladyambu bya Nambu wa Yordani.

Yohane i wanuna wo hlamarisa swinene hi ndlela leyi a langutekaka ni ku vulavula hayona. Swiambalo swakwe swi endliwe hi voya bya kamela naswona u boha bandhi leri endliweke hi dzovo. Swakudya swakwe i tinjiya ni vulombe bya le nhoveni. Hi rihi rungula rakwe? Hi leri nge, “hundzukani, hikuva Mfumo wa matilo wu tshinele.”—Matewu 3:2.

Lava teke ku ta yingisela Yohane va tsakisiwa hi rungula rakwe. Vo tala va sungula ku swi xiya leswaku va fanele va hundzuka, leswi vulaka ku cinca miehleketo ni mahanyelo ya vona yo biha. Lava taka eka yena va huma “le Yerusalema ni le tikweni hinkwaro ra Yudiya ni tiko hinkwaro leri nga ekusuhi na Yordani.” (Matewu 3:5) Vo tala lava taka eka Yohane va hundzuka. Wa va khuvula hi ku va nyuperisa ematini ya Yordani. Hikwalahokayini?

U khuvula vanhu hi nkhuvulo lowu yimelaka ku hundzuka ka vona hi mbilu hinkwawo eka swidyoho leswi va swi endleke swo tlula ntwanano wa Nawu wa Xikwembu. (Mitirho 19:4) Kambe a hi hinkwavo lava fanelekaka ku khuvuriwa. Loko varhangeri va vukhongeri, Vafarisi ni Vasaduki va ta eku khuvuriweni, Yohane u va vula “vana va timhiri.” U ri eka vona: “Mitirho ya n’wina a yi kombise leswaku mi hundzukile. Mi nga tibyeli mi ku, ‘Tata wa hina i Abrahama.’ Ndzi mi byela ntiyiso leswaku Xikwembu xi nga vumbela Abrahama vana hi maribye lawa. Xihloka se xi lunghekele ku tsema timitsu ta mirhi. Murhi wun’wana ni wun’wana lowu nga humesiki mihandzu leyinene wu ta tsemiwa wu hoxiwa endzilweni.”—Matewu 3:7-10.

Leswi a ku ta vanhu vo tala eka Yohane naswona a ri ni rungula ra matimba ni leswi a a khuvula vanhu vo tala, vaprista ni Valevhi va rhumiwa leswaku va ya n’wi vutisa va ku: “Hi wena mani?”

Yohane u va hlamula a ku: “A hi mina Kreste.”

Hiloko va n’wi vutisa va ku: “Hi wena mani? Xana hi wena Eliya?”

A va hlamula a ku: “A ndzi yena.”

Va n’wi vutisa va ku: “Xana u Muprofeta?,” a va vulavula hi Muprofeta lonkulu loyi Muxe a vuleke leswaku a a ta ta.—Deteronoma 18:15, 18.

A tlhela a va hlamula a ku: “E-e!”

Hiloko va ya emahlweni va vutisa hi ku sindzisa va ku: “Hi wena mani? Hi byele leswaku hi ta kota ku ya hlamusela lava hi rhumeke. Xana u nga tihlamuserisa ku yini?” Hiloko Yohane a ku: “Ndzi rito ra un’wana loyi a huwelelaka emananga a ku, ‘Basisani ndlela ya Yehovha,’ hilaha muprofeta Esaya a vuleke hakona.”—Yohane 1:19-23.

Hiloko va n’wi vutisa va ku: “Hikwalaho ka yini u khuvula vanhu loko u nga ri Kreste, Eliya kumbe Muprofeta?” Yohane a va hlamula a ku: “Mina ndzi khuvula hi mati. Exikarhi ka n’wina ku yime munhu loyi mi nga n’wi tiviki, loyi a taka endzhaku ka mina.”—Yohane 1:25-27.

Yohane a a swi tiva leswaku u basisa ndlela hi ku endla leswaku timbilu ta vanhu ti lunghekela ku amukela Mesiya loyi ku profetiweke ha yena, loyi a a ta va Hosi. Yohane u vule leswi hi Hosi leyi: “Loyi a taka endzhaku ka mina wa ndzi tlula hi matimba, naswona a swi ndzi faneli ni ku n’wi hluvula maphaxani.” (Matewu 3:11) Kahlekahle Yohane u tlhela a ku: “Loyi a taka endzhaku ka mina i nkulu, hikuva u ve kona ndzi nga si va kona.”—Yohane 1:15.

Hikwalaho rungula ra Yohane leri nge, “Hundzukani, hikuva Mfumo wa matilo wu tshinele” ra fanela. (Matewu 3:2) A ku ri xitiviso eka vanhu xa leswaku vutirheli bya Hosi leyi vekiweke hi Yehovha ku nga Yesu Kreste a byi ri ekusuhi ni ku sungula.