Ndzima 12

Ku Khuvuriwa Ka Yesu

KWALOMU ka tin’hweti ta tsevu endzhaku ka loko Yohane a sungule ku chumayela, Yesu, loyi sweswi a nga ni malembe ya 30 hi vukhale, u ta eka yena eYordani. Hikwalaho ka yini? Ku endla riendzo ra xinghana? Xana Yesu u nyanyuriwa ntsena hi ndlela leyi ntirho wa Yohane wu humelelaka ha yona? Doo, Yesu u kombela Yohane leswaku a n’wi khuvula.

Hi nkarhi wolowo Yohane wa ala a ku: “Hi mina loyi a fanelaka ku khuvuriwa hi wena, kasi wena u ta eka mina!” Yohane u tiva leswaku makwavo wa yena Yesu i N’wana la hlawulekeke wa Xikwembu. Phela, Yohane u tlule hi ntsako ekhwirini ra mana wa yena loko Mariya, loyi a tikeke Yesu, a va endzerile! A swi kanakanisi Elizabeta, mana wa Yohane, a nga va a n’wi byerile ha leswi. Nakambe a nga va a n’wi byele hi xitiviso xa ntsumi xa ku velekiwa ka Yesu ni ta ku humelela ka tintsumi eka varisi vusiku lebyi Yesu a velekiweke ha byona.

Kutani Yohane u tiva Yesu. Naswona Yohane u tiva leswaku nkhuvulo wa yena a hi wa Yesu. I wa lava va hundzukaka eswidyohweni, kambe Yesu a nga na xidyoho. Hambi swi ri tano, ku nga khathariseki ku ala ka Yohane, Yesu wa sindzisa: “Ndzi pfumelele sweswi, hikuva swa fanela leswaku hi hetisisa leswo lulama hinkwaswo hi ndlela leyi.”

Ha yini swi lulamile leswaku Yesu a khuvuriwa? Hikuva ku khuvuriwa ka Yesu i xikombiso, ku nga ri xa ku hundzuka eswidyohweni, kambe xa ku tinyiketela ku endla ku rhandza ka Tata wa yena. Yesu a a ri muvatli, kambe sweswi nkarhi wu fikile wa leswaku a sungula vutirheli lebyi Yehova Xikwembu a n’wi rhumeleke emisaveni ku ta byi endla. Xana u ehleketa leswaku Yohane u langutela swin’wana leswi nga tolovelekangiki leswaku swi humelela loko a khuvula Yesu?

Ina, Yohane endzhakunyana wa vika: “Xikwembu lexi ndzi rhumeke ku khuvula hi mati, xi ndzi byerile, xi ku: ‘Loyi u nga ta vona Moya wu xikela ka yena, wu tshama henhla ka yena, hi yena loyi a khuvulaka hi Moya lowo Kwetsima.’” Kutani Yohane u langutele ku vona moya wa Xikwembu wu ta ehenhla ka un’wana loyi a n’wi khuvulaka. Kumbexana, a nga hlamali loko, loko Yesu a huma ematini, Yohane a vona “moya lowo kwetsima wu xikela henhla ka yena, wu ri ni xivumbeko lexi fanaka ni xa tuva.”

Kambe leswi tlulaka sweswo swa humelela loko Yesu a khuvuriwa. ‘Matilo ma n’wi pfulekela.’ Xana leswi swi vula yini? Entiyisweni swi vula leswaku loko a khuvuriwa, miehleketo ya vutomi bya yena bya le mahlweni ka ku va munhu wa nyama etilweni byi vuyela eka yena. Xisweswo, sweswi Yesu hi laha ku heleleke u tsundzuka vutomi bya yena tanihi n’wana wa moya wa Yehova Xikwembu, ku katsa ni swilo hinkwaswo leswi Xikwembu xi vulavuleke na yena ha swona etilweni eka vukona bya yena emahlweni ka ku va munhu wa nyama.

Ku engetela kwalaho, enkarhini wa ku khuvuriwa ka yena, rito leri humaka etilweni ra twarisa ri ku: “Loyi i n’wananga la rhandzekaka, loyi ndzi n’wi tsakelaka.” I rito ra mani rero? Xana i ra Yesu hi yexe? Doo! I ra Xikwembu. Entiyisweni, Yesu i N’wana wa Xikwembu, ku nga ri Xikwembu hi xoxe, hi laha vanhu van’wana va vulaka ha kona.

Hambi swi ri tano, Yesu i n’wana wa Xikwembu, hi laha a swi ri ha kona hi munhu wo sungula, Adamu. Mudyondzisiwa Luka, endzhaku ko hlamusela ku khuvuriwa ka Yesu wa tsala: “Yesu a a ri kusuhi ni malembe ya 30 loko a sungula ntirho wa yena; kutani hi ku ehleketa ka vanhu, a a ri n’wana Yosefa wa Heli, . . . wa Davhida, . . . wa Abrahama, . . . wa Nowa, . . . wa Adamu, wa Xikwembu.”

Tanihi leswi Adamu a a ri “N’wana wa Xikwembu” wa munhu, swi tano na hi Yesu. Yesu i nghwazi leyi tshameke yi hanya, leswi vaka erivaleni loko hi kambisisa vutomi bya Yesu. Hambi swi ri tano, eku khuvuriweni ka yena, Yesu u nghene eka vuxaka lebyintshwa na Xikwembu, nakambe a va N’wana wa moya wa Xikwembu. Xikwembu sweswi xi n’wi vitanela etilweni nakambe, hi laha a swi ri ha kona, eku sunguleni ka xiendlo lexi a xi ta yisa eku nyikeleni ka vutomi bya yena lebyi nga heriki byi va gandzelo hikwalaho ka vanhu lava avanyisiweke. Matewu 3:13-17; Luka 3:21-38; 1:34-36, 44; 2:10-14; Yohane 1:32-34; Vaheveru 10:5-9.

▪ Ha yini Yohane a a tiva Yesu?

▪ Tanihi leswi a a nga ri na swidyoho, ha yini Yesu a khuvuriwa?

▪ Hi langutelo ra leswi Yohane a a swi tiva hi Yesu, ha yini a nga tshukanga loko moya wa Xikwembu wu ta ehenhla ka Yesu?