Yesu Wa Khuvuriwa

Endzhaku ka tin’hweti ta tsevu Yohane a sungule ku chumayela, Yesu, loyi se a nga ni malembe ya kwalomu ka 30, u ta eka yena eNambyeni wa Yordani. Yesu u ya endla yini? A ngo n’wi vhakela ntsena. Naswona a nga yeli ku ya vona leswaku ntirho wa Yohane wu famba njhani. Kambe Yesu u ta eka Yohane leswaku a ta kombela ku khuvuriwa.

Kambe Yohane u ri eka Yesu: “Hi wena loyi u faneleke u khuvula mina, hikwalaho ka yini wena u ta eka mina?” (Matewu 3:14) Yohane wa swi tiva leswaku Yesu i n’wana wo hlawuleka wa Xikwembu. Tsundzuka leswaku loko Yohane a ha ri ekhwirini ra mana wakwe, u tsakile loko Mariya loyi a a tike Yesu a endzele mana wakwe Elizabeta. A swi kanakanisi leswaku hi ku famba ka nkarhi, mana wa Yohane u n’wi byerile Yohane hi mhaka leyi. Naswona swi nga endleka a twe na hi ta ntsumi leyi tiviseke hi ta ku velekiwa ka Yesu na hi ntsumi leyi humeleleke eka varisi hi vusiku lebyi Yesu a velekiweke ha byona.

Yohane wa swi tiva leswaku nkhuvulo lowu a wu endlaka i wa lava hundzukaka eswidyohweni swa vona. Kambe Yesu a nga na xidyoho. Ku nga khathariseki leswi Yohane a swi vuleke, Yesu u ri eka yena: “U nga ndzi siveli, leswaku hi ta kota ku endla hinkwaswo leswi Xikwembu xi swi lavaka.”—Matewu 3:15.

Hikwalahokayini swi fanela leswaku Yesu a khuvuriwa? Yesu a nga khuvuriwi tanihi xikombiso xa leswaku u hundzukile eka swidyoho swakwe. Kambe ku khuvuriwa ka yena a swi kombisa leswaku wa tinyikela leswaku a ta endla ku rhandza ka Tata wakwe. (Vaheveru 10:5-7) Yesu i muvatli kambe se nkarhi wa ku sungula vutirheli byakwe lebyi Tata wakwe wa le Tilweni a n’wi rhumeke leswaku a ta byi endla laha misaveni wu fikile. Xana u ehleketa leswaku Yohane u langutele leswaku ku endleka nchumu lowu nga tolovelekangiki loko Yesu a khuvuriwa?

Hi ku famba ka nkarhi, Yohane u vule leswi: “Loyi a ndzi rhumeke ku khuvula vanhu hi mati u te: ‘Loyi u nga ta vona moya lowo kwetsima wu ehla ivi wu fika wu tshama ehenhla ka yena, hi yena loyi a khuvulaka hi moya lowo kwetsima.’” (Yohane 1:33) Hikwalaho Yohane u rindzele ku vona moya lowo kwetsima wa Xikwembu wu xikela ehenhla ka munhu wo karhi loyi a n’wi khuvulaka. Loko Yesu a huma ematini, swi nga endleka Yohane a nga hlamalanga loko a vona “moya wa Xikwembu wu xika ku fana ni tuva wu ta ehenhla ka [Yesu].”—Matewu 3:16.

Kambe ku endleke swo tlula sweswo hi nkarhi lowu Yesu a khuvuriweke ha wona. U vone ‘matilo ma pfuleka.’ Kambe a swi vula yini sweswo? Swi nga endleka swi vula leswaku Yesu u tsundzuke vutomi bya yena loko a ha ri etilweni. Hikwalaho sweswi Yesu u tsundzuka vutomi byakwe tanihi n’wana wa Yehovha wa moya ku katsa ni ntiyiso lowu Xikwembu xi n’wi dyondziseke wona loko a ha ri etilweni a nga se ta laha misaveni.

Ku engeta kwalaho, loko Yesu a khuvuriwa ku tlhele ku twala rito leri humaka etilweni, ri ku: “Loyi i N’wananga, la rhandzekaka, loyi ndzi n’wi amukeleke.” (Matewu 3:17) A ku ri rito ra mani? A ku nge vi ra Yesu; hikuva u swin’we na Yohane. A ku ri rito ra Xikwembu. Swi le rivaleni leswaku Yesu i n’wana wa Xikwembu. A hi yena Xikwembu.

I swa nkoka ku xiya leswaku Yesu i n’wana wa Xikwembu la nga munhu ku fana ni munhu wo sungula Adamu. Endzhaku ka loko mudyondzisiwa Luka a hlamusele hi ta ku khuvuriwa ka Yesu u tsale a ku: “Loko Yesu a sungula ntirho wakwe a a ri ni malembe ya kwalomu ka 30, naswona hilaha a a tiviwa hakona, a a ri n’wana wa Yosefa, n’wana wa Heli, . . . n’wana wa Davhida, . . . n’wana wa Abrahama, . . . n’wana wa Nowa, . . . n’wana wa Adamu, n’wana wa Xikwembu.”—Luka 3:23-38.

Tanihi leswi Adamu a a ri “n’wana wa Xikwembu” na Yesu i n’wana wa Xikwembu. Loko Yesu a khuvuriwa, u ve ni vuxaka lebyintshwa ni Xikwembu, u ve N’wana wa Xikwembu wa Moya. Hikwalaho, Yesu u le xiyin’weni xa kahle xo dyondzisa ntiyiso hi Xikwembu ni ku komba vanhu ndlela yo kuma vutomi. Yesu u sungula ku hanya vutomi lebyi nga ta endla leswaku a hetelela hi ku nyikela hi vutomi byakwe tanihi munhu wa nyama byi va xitlhavelo xa swidyoho swa vanhu.