Ndzima 14

Vadyondzisiwa Vo Sungula Va Yesu

ENDZHAKU ka masiku ya 40 emananga, Yesu u tlhelela eka Yohane, loyi a n’wi khuvuleke. Loko a tshinela, handle ko kanakana Yohane u kombetela eka yena kutani a huwelela eka lava nga kona a ku: “Vonani! Hi lexi Xinyimpfana xa Xikwembu lexi susaka swidyoho swa misava! Hi yena loyi ndzi vuleke ha yena, loko ndzi te: ‘Endzhaku ka mina ku ta wanuna la ndzi tlulaka hi vukulu, hikuva u vile kona mina ndzi nga si va kona.’” Hambi leswi Yohane a nga lonkulu eka makwavo wa yena Yesu, Yohane wa swi tiva leswaku Yesu u ve kona emahlweni ka yena tanihi munhu wa moya etilweni.

Hambi swi ri tano, mavhiki ma nga ri mangani emahlweni, loko Yesu a tile ku ta khuvuriwa, entiyisweni Yohane a nga swi tivi hi laha ku tiyeke leswaku Yesu a ta va Mesiya. Yohane wa xiya: “Mina a ndzi n’wi tivi, kambe ndzi tile ndzi ri la khuvulaka hi mati, leswaku a ta humeseriwa erivaleni eka Vaisraele.”

Yohane u ya emahlweni a hlamusela vayingiseri va yena leswi humeleleke loko a khuvula Yesu: “Ndzi vonile Moya wu xika hi le tilweni wu fana ni tuva, wu tshama ehenhla ka yena. Mina a ndzi nga n’wi tivi, kambe Xikwembu lexi ndzi rhumeke ku khuvula hi mati xi ndzi byerile xi ku: ‘Loyi u nga ta vona Moya wu xikela eka yena, wu tshama ehenhla ka yena, hi yena loyi a khuvulaka hi Moya lowo Kwetsima.’ Mina Yohane ndzi swi vonile, kutani ndzi vekile vumbhoni ndzi ku, loyi hi yena N’wana wa Xikwembu.”

Siku leri landzelaka Yohane u yime ni vadyondzisiwa va yena vambirhi. Nakambe, loko Yesu a tshinela, u ri: “Vonani! Hi lexi Xinyimpfana xa Xikwembu!” Kwalaho, vadyondzisiwa lava vambirhi va Yohane Mukhuvuri va landzela Yesu. Un’wana wa vona i Andriya, naswona lowun’wana handle ko kanakana i munhu loyi a rhekhodeke swilo leswi, loyi na yena a vitaniwaka Yohane. Yohane loyi, hi ku ya hi swikombiso, na yena i makwavo wa Yesu, handle ko kanakana i n’wana wa makwavo wa Mariya, Salome.

Loko a hundzuluka a vona Andriya na Yohane va n’wi landzela, Yesu wa va vutisa a ku: “Mi lava yini xana?”

Va vutisa va ku: “U tshama kwihi, Rabi?”

Yesu u hlamula a ku: “Tanani, mi ta vona.”

Nkarhi i kwalomu ka awara ya mune ni ndzhenga, naswona Andriya na Yohane va tshama na Yesu dyambu rero hinkwaro. Endzhaku Andriya u tsake ngopfu lerova u hatlisela ku ya kuma makwavo wa yena, loyi a vuriwaka Petro. Wa n’wi byela a ku: “Hi kumile Mesiya.” Kutani u yisa Petro eka Yesu. Kumbexana Yohane hi nkarhi wolowo u kuma makwavo wa yena Yakobo na yena a n’wi tisa eka Yesu; kambe, hi vumunhu Yohane u tlula rungula leri ra yena n’wini eka Evhangeli ya yena.

Siku leri landzelaka Yesu u kuma Filipi, loyi a a huma eBetsayida, muti lowu Andiriya na Petro va humaka eka wona. Wa n’wi rhamba: “Ndzi landze!”

Kutani Filipi u kuma Nathaniyele, loyi na yena a vitaniwaka Bartolomi, naswona u ri eka yena: “Hi kumile loyi Muxe a tsaleke timhaka ta yena eNawini; na vona vaprofeta va ti tsarile: I Yesu wa Nazareta n’wana Yosefa.” Nathaniyele wa kanakana. Wa vutisa: “Xana eNazareta ku nga huma xilo lexinene xana?”

Filipi wa khongotela: “Tana, u ta vona.” Loko va tshinelela Yesu, Yesu u ri eka Nathaniyele: “Vonani Muisrayele wa xiviri, loyi ku nga riki na ku kanganyisa eka yena.”

Nathaniyele wa vutisa: “U ndzi tivisa ku yini?”

Yesu wa hlamula: “Filipi a nga si ku vitana, ndzi ku vonile u ri ehansi ka nkuwa.”

Nathaniyele wa hlamala. U ri: “Rabi [hi leswaku Mudyondzisi], u N’wana wa Xikwembu, u Hosi ya Israyele.”

Yesu wa vutisa a ku: “Xana u pfumela hileswi ndzi nga te, ndzi ku vonile u ri ehansi ka nkuwa, xana? U ta vona leswikulu ku tlula sweswo.” Kutani wa tshembisa a ku: “Ndzi tiyisile ndzi ri ka n’wina: Mi ta vona tilo ri pfulekile, ni tintsumi ta Xikwembu ti ri karhi ti tlandlukela ehenhla ni ku xikela eka N’wana-wa-Munhu.”

Endzhakunyana ka leswi, Yesu, ni vadyondzisiwa va yena lavantshwa lava a va kumeke, va suka eNkoveni wa Yordani kutani va ya eGaleliya. Yohane 1:29-51.

▪ I vamani vadyondzisiwa vo sungula va Yesu?

▪ Petro kun’we na Yakobo, va titivisise njhani eka Yesu?

▪ I yini lexi khorwisaka Nathaniyele leswaku Yesu i N’wana wa Xikwembu?