Yesu A Sungula Ku Endla Vadyondzisiwa

Endzhaku ka masiku ya 40 a ri emananga naswona a nga si tlhelela eGaleliya, Yesu u tlhelela eka Yohane loyi a n’wi khuvuleke. Loko a tshinela, Yohane u n’wi kombeterile kutani a byela lava a ri na vona a ku: “Vonani Xinyimpfana xa Xikwembu lexi susaka xidyoho emisaveni! Hi yena loyi a ndzi vula yena, loko ndzi ku: ‘Wanuna loyi a nga ta ta endzhaku ka mina i nkulu, hikuva u ve kona ndzi nga si va kona.’” (Yohane 1:29, 30) Hambi leswi Yohane a nga nkulu eka Yesu, wa swi tiva leswaku Yesu u ve kona yena a nga si va kona, a a ri xivumbiwa xa moya etilweni.

Eka Mavhiki ma nga ri mangani lama hundzeke, loko Yesu a tele ku ta khuvuriwa, Yohane a a vonaka a nga tiyiseki leswaku Yesu a a ta va Mesiya. Kutani Yohane u ri: “Na mina a ndzi nga n’wi tivi, kambe ndzi khuvula vanhu hi mati leswaku a ta tiveka eIsrayele.”—Yohane 1:31.

Yohane u ye emahlweni a hlamusela vayingiseri leswi endlekeke loko a khuvula Yesu, u te: “Ndzi vone moya lowo kwetsima wu xika ku fana ni tuva wu huma etilweni, wu fika wu tshama ehenhla ka yena. Na mina a ndzi nga n’wi tivi, kambe Loyi a ndzi rhumeke ku khuvula vanhu hi mati u te: ‘Loyi u nga ta vona moya lowo kwetsima wu ehla ivi wu fika wu tshama ehenhla ka yena, hi yena loyi a khuvulaka hi moya lowo kwetsima.’ Kutani ndzi swi vonile, naswona ndzi nyikele vumbhoni bya leswaku loyi i N’wana wa Xikwembu.”—Yohane 1:32-34.

Siku leri landzelaka Yohane a a yime ni vadyondzisiwa va yena vambirhi loko Yesu a ri karhi a ta. Yohane u te: “Vonani Xinyimpfana xa Xikwembu!” (Yohane 1:36) Hiloko vadyondzisiwa lava vambirhi va Yohane Mukhuvuri va landzela Yesu. Un’wana wa vona i Andriya. Swi nga ha endleka lowun’wana hi loyi a tsaleke rungula leri, loyi na yena a ku ri Yohane. Swi vonaka onge Yohane loyi i makwavo wa Yesu hi leswi a nga n’wana wa Salome. Swi nga ha endleka leswaku Salome i makwavo wa Mariya naswona nuna wakwe i Zebediya.

Loko Yesu a hundzuluka, a vona Andriya na Yohane va ri karhi va n’wi landzela, hiloko a ku: “Mi lava yini?”

Va n’wi vutisa va ku, “Rabi, xana u tshama kwihi?”

Yesu a va hlamula a ku: “A hi fambeni mi ya ku vona.”—Yohane 1:37-39.

A ku ri nkarhi wa kwalomu ka awara ya mune nindzhenga naswona Andriya na Yohane va tshame na Yesu dyambu hinkwaro. Andriya a tsake ngopfu lerova a famba a lava makwavo wa yena Simoni loyi a vuriwaka Petro, a fika a n’wi byela a ku: “Hi kume Mesiya.” (Yohane 1:41) Hiloko Andriya a yisa Petro eka Yesu. Swi tikomba onge hi ku famba ka nkarhi Yohane na yena u kume makwavo Yakobo kutani a ya na yena eka Yesu kambe Yohane a nga byi tsalanga vuxokoxoko byebyo eka rungula rakwe.

Hi siku leri landzelaka Yesu u kuma Filipi, loyi a humaka eBetsayida. Yi le kusuhi na le n’walungu wa ribuwa ra Lwandle ra Galeliya naswona i muti lowu Andriya na Petro va humaka eka wona. Yesu u rhamba Filipi a ku: “Vana mulandzeri wa mina.”—Yohane 1:43.

Filipi u kuma Nathaniyele loyi a vuriwaka Bartolomi kutani a ku: “Hi kume Yesu n’wana wa Yosefa, loyi a humaka eNazareta. Loyi ku vulavuriwaka hi yena eka Nawu wa Muxe ni le ka leswi tsariweke hi Vaprofeta.” Kambe Nathaniyele wa kanakana naswona u vutisa Filipi a ku: “Xana ku nga huma nchumu lowunene eNazareta?”

Filipi a n’wi hlamula a ku: “Tana u ta vona.” Loko Yesu a vona Nathaniyele a ri karhi a ta a ku: “Vonani Muisrayele loyi a nga riki na vukanganyisi.”

Nathaniyele a vutisa a ku: “U ndzi tivisa ku yini?”

Yesu a n’wi hlamula a ku: “Ndzi ku vone ehansi ka nkuwa, Filipi a nga si ku vitana.”

Nathaniyele a hlamula hi ku hlamala a ku: “Rabi, wena u N’wana wa Xikwembu, u Hosi ya Israyele.”

Yesu a n’wi vutisa a ku: “Xana u tshemba hileswi ndzi ku byeleke leswaku ndzi ku vone ehansi ka nkuwa? U ta vona swilo leswikulu ku tlula leswi.” Kutani Yesu a va tshembisa a ku: “Hakunene ndzi tiyisile ndzi ri eka n’wina, mi ta vona matilo ma pfuleka kutani tintsumi ta Xikwembu ti ta eka N’wana wa munhu ti huma hi le matilweni, ti tlhela ti tlhandlukela kona.”—Yohane 1:45-51.

Endzhakunyana ka sweswo, Yesu ni vadyondzisiwa vakwe lavantshwa va suka eNkoveni wa Yordani va teka riendzo va ya eGaleliya.