Ndzima 17

A Dyondzisa Nikodema

LOKO a ri ePasekeni ya 30 C.E., Yesu u endla swikombiso leswi xiyekaka, kumbe mahlori. Hikwalaho, vanhu vo tala va veka ripfumelo ra vona eka yena. Nikodema, xirho xa Sanedri, huvo leyi tlakukeke ya Vayuda, u tsakile naswona u lava ku dyondza swo tala. Kutani u endzela Yesu ni vusiku, kumbexana hi ku chava leswaku ndhuma ya yena eka varhangeri van’wana va Vayuda yi ta onhiwa loko o voniwa.

U ri: “Mufundhisi, ha swi tiva leswaku u mudyondzisi la humaka eka Xikwembu, hikuva a ku na munhu la endlaka mahlori lawa u ma endlaka, loko Xikwembu xi nga ri na yena.” Loko a hlamula, Yesu u byela Nikodema leswaku loko a ta kota ku nghena eMfun’weni wa Xikwembu, munhu u fanele ku “tswariwa ra vumbirhi.”

Hambi swi ri tano, munhu a nga tswarisiwa ku yini ra vumbirhi? Nikodema wa vutisa a ku: “Xana a nga swi kota ku vuyela endzeni ka mana wa yena, a tlhela a tswariwa ra vumbirhi xana?”

E-e, sweswo a hi swona leswi ku tswariwa ra vumbirhi swi vulaka swona. Yesu wa hlamusela: “Ndzi tiyisile ndzi ri ka wena, loko munhu a nga tswariwi hi mati ni moya, a nga ka a nga ngheni eMfun’weni wa Xikwembu.” Loko Yesu a khuvuriwile naswona moya lowo kwetsima wu xikele henhla ka yena, xisweswo u tswariwe hi “mati ni moya.” Hi ku twarisiwa loku humaka tilweni, ‘loyi i N’wana nga loyi ndzi n’wi rhandzaka,’ Xikwembu xi twarise leswaku xi chululele moya eka n’wana la nga ni ntshembo wo nghena eMfun’weni wa le tilweni. Endzhakunyana, hi Pentekosta ya 33 C.E., van’wana lava khuvuriweke va ta amukela moya lowo kwetsima naswona xisweswo va ta va lava tswariweke ra vumbirhi tanihi vana va moya va Xikwembu.

Kambe xiphemu xo hlawuleka xa N’wana wa Xikwembu la nga munhu wa nyama i xa nkoka. Yesu u byela Nikodema a ku: “Ku fana na leswi Muxe a tshamaka a hayeka nyoka emananga, N’wana-wa-Munhu na yena u ta fanela ku hayekiwa hi mukhuva wolowo, ku endlela leswaku un’wana ni un’wana la pfumelaka eka yena, a kuma vutomi lebyi nga heriki.” Ina, tanihi leswi Vaisrayele volavo lava lumiweke hi tinyoka ta vuxungu a va fanele ku languta eka nyoka ya koporo leswaku va pona, kutani vanhu va fanele ku kombisa ripfumelo eka N’wana wa Xikwembu leswaku va ponisiwa eka xiyimo xa vona xa ku fa.

Loko a tiyisa xiphemu xa Yehova xa rirhandzu eka leswi, Yesu nakambe u byela Nikodema a ku: “Hikuva Xikwembu xi rhandzile misava swonghasi, xi ko xi nyika n’wana wa xona la nga un’we, leswaku un’wana ni un’wana la pfumelaka eka yena, a nga lovi, kambe a va ni vutomi lebyi nga heriki.” Xisweswo, ku ringana tin’hweti ta tsevu endzhaku ka ku sungula vutirheli bya yena laha eYerusalema, Yesu u swi veka erivaleni leswaku hi yena xitirho xa Yehova Xikwembu xo ponisa vanhu.

Yesu u ya emahlweni a hlamusela swin’wana eka Nikodema a ku: “Xikwembu a xi rhumanga N’wana wa xona emisaveni ku ta avanyisa misava,” hi leswaku ku nga ri ku avanyisa vabihi, kumbe ku va herisa, ku avanyisela rixaka ra vanhu eku lovisiweni. Ematshan’wini ya sweswo, hi laha Yesu a vulaka ha kona, u rhumeriwile “leswaku misava yi ta ponisiwa ha yena.”

Nikodema hi ku chava u te eka Yesu ni vusiku. Kutani swa tsakisa leswi Yesu a gimetaka bulo ra yena na yena hi ku vula leswaku: “Ku avanyisa ku ta hi mhaka leyi: Hi leswaku ku vonakala [loku Yesu a ku kombiseke hi vutomi ni ku dyondzisa ka yena] ku tile emisaveni, kambe vanhu va rhandzile munyama ku tlula ku vonakala, hikuva mintirho ya vona a yi ri leyo biha. Un’wana ni un’wana la endlaka leswo biha, u venga ku vonakala, kutani a nga ti eku vonakaleni, hi ku chava leswaku mintirho ya yena yi nga ta humela erivaleni. Kambe loyi a hanyaka entiyisweni, wa ta eku vonakaleni, leswaku mintirho ya yena yi ta vonaka yi ri leyi endliweke hi ku yingisa Xikwembu.” Yohane 2:23–3:21; Matewu 3:16, 17; Mintirho 2:1-4; Tinhlayo 21:9.

▪ I yini lexi susumetelaka ku endza ka Nikodema, naswona ha yini a ta ni vusiku?

▪ “Ku tswariwa ra vumbirhi” swi vula yini?

▪ Yesu u xi hlamusela njhani xiphemu xa yena eku ponisiweni ka hina?

▪ Xana swi vula yini leswaku Yesu a nga telanga ku avanyisa misava?