I Vamani Lava Tswariwaka Ra Vumbirhi?
XANA vanhu lavanene hinkwavo va ya etilweni? Vo tala va ehleketa tano, kambe Yesu Kreste a nga swi pfumelanga sweswo. Loko a vulavula ni mufumi wa Muyuda Nikodema, loyi a teke eka yena hi ku tifihla ni vusiku, Yesu u te: “A ku na munhu loyi a tshamaka a tlhandlukela ematilweni.”—Yohane 3:13.
Hambi swi ri tano, Yesu u kombise Nikodema leswaku nkarhi a a wu ta ta lowu vanhu van’wana a a va ta nghena eMfun’weni wa matilo. Malunghana ni leswi, Yesu u te: “Loko munhu a nga tswariwi hi mati ni Moya, a nga ka a nga ngheni eMfun’weni wa Xikwembu. Nyama yi tswala swa nyama; kambe Moya wu tswala swa moya. U nga hlamali loko ndzi te ka wena, swa fanela leswaku mi tlhela mi tswariwa ra vumbirhi.” Kambe Nikodema u hlamarile leswaku munhu a nga tswarisiwa ku yini ra vumbirhi.—Yohane 3:1-9.
Kumbexana na wena wa hlamala leswaku Yesu a a vula yini. Xana marito yakwe ma tirha eka swiendlakalo swa ku cinca loku nga vonekiki loku vuriwaka hi vo tala lava titwaka va tele hi moya wo kwetsima wa Xikwembu?
Mintlhaveko Ni Mianakanyo
Van’wana va vula leswaku lexi ku voniwaka ha xona leswaku munhu u tlhele a tswariwa ra vumbirhi, xa nkoka i ku twa matimba ya moya. Kambe, timbilu ta hina ni mianakanyo swi nga hi kanganyisa, ngopfu-ngopfu loko hi susumetiwa hi mintlhaveko ya matimba.—Yeremiya 17:9.
William Sargant, mulavisisi wa leswi vangiwaka hi mintlhaveko ya mianakanyo, u kombisa xilaveko xa ku “tivonela eka ripfumelo leri vaka kona loko hi nyanyukile, laha mabyongo ya hina ma nga ha vaka ma hi xisa.” Hi ku ya hi Sargant, xikombiso xin’wana i vuyelo bya ku chumayela hi ku pfuxetiwa ni ku chavisiwa hi nxupulo wa ndzilo wa le tiheleni. I mani loyi a a nga ta swi lava ku tlhela a tswariwa ra vumbirhi leswaku a ya etilweni loko handle ka swona u boheka ku xaniseka hi laha ku nga heriki? Sargant u vula leswaku ehansi ka ntshikilelo wo tano, “ku anakanya ku vekeriwa etlhelweni, byongo bya yimisiwa swa nkarhinyana, ivi mianakanyo ni ntshembo lowuntshwa swi amukeriwa handle ko tipfinyinga.”—The Mind Possessed.
Kutani ke, xana munhu a nga swi vonisa ku yini loko ntshembo emhakeni ya ku tlhela u tswariwa ra vumbirhi a wu ‘amukele handle ko tipfinyinga’? Ndlela ya vutlharhi bya ntiyiso i ku kongomisiwa hi xin’wana ni xin’wana lexi moya wo kwetsima wa Xikwembu wu endleke leswaku vatsari va Bibele va xi tsala. Vakreste va khutaziwa ku gandzela Xikwembu ‘hi matimba ya vona ya ku anakanya’ naswona va fanele ku tiyiseka leswaku leswi va swi pfumelaka i ntiyiso.—Varhoma 12:1, 2; 1 Vatesalonika 5:21.
Ku va la tswariweke ra vumbirhi swi tisa lunghelo rin’wana lerikulu eka lama tshameke ma nyikiwa vanhu. Swi hlanganisiwa ni xiendlakalo lexikulu swinene xa ku hetisisa kungu ra Xikwembu. Hambi leswi hinkwaswo leswi swi nga ntiyiso, swivutiso swo fana ni leswi swa tlakuka: I vamani lava tswariwaka ra vumbirhi? Xana leswi swi endlekisa ku yini? I ku langutela kwihi loku vekeriweke vanhu vo tano? Naswona xana hi vona ntsena lava nga ta ponisiwa?
[Xifaniso lexi nga eka tluka 3]
Nikodema u hlamarile leswaku munhu a nga tlhela a tswariwa njhani ra vumbirhi