Ku Tswariwa Ra Vumbirhi

Nhlamuselo: Ku tswariwa ra vumbirhi swi katsa ku khuvuriwa hi mati (‘ku tswariwa hi mati’) ni ku velekiwa hi moya wa Xikwembu (‘ku tswariwa hi moya’), xisweswo u va n’wana wa Xikwembu u langutela ku kuma xivandla eMfun’weni wa Xikwembu. (Yoh. 3:3-5) Leswi swi humelerile eka Yesu, ku kotisa lava va 144 000 lava nga vadyandzhaka va Mfumo wa le tilweni swin’we na yena.

Ha yini swi fanerile leswaku Mukreste un’wana ni un’wana a “tswariwa ra vumbirhi”?

Xikongomelo xa Xikwembu i ku hlanganisa vanhu vo tshembeka va nhlayo leyi pimiweke kun’we na Yesu Kreste eka Mfumo wa le tilweni

Lk. 12:32: “Mi nga chavi n’wina va ntlhambinyana, hikuva Tata wa n’wina ú tsakele ku mi nyika Mfumo.”

Nhlav. 14:1-3: “Ndzi languta, kutani ndzi vona Xinyimpfana [Yesu Kreste] xi yimile entshaveni ya Siyoni, xi ri ni vanhu va 144 000 . . . lava [xaviweke, NW] emisaveni.” (Vona matluka 281-2, ehansi ka xihloko lexi nge “Tilo.”)

Vanhu a va nge yi etilweni ni mimiri ya nyama ni ngati

1 Kor. 15:50: “Leswi ndzi vulaka swona, vamakwerhu, hi leswi: Nyama ni ngati swi nga ka swi nga dyi ndzhaka ya Mfumo wa Xikwembu, naswona leswi hatlaka ku onhaka swi nga ka swi nga dyi ndzhaka ya leswi nga onhakiki.”

Yoh. 3:6: “Nyama yi tswala swa nyama; kambe Moya wu tswala swa moya.”

Vanhu lava nga “tswariwa ra vumbirhi,” xisweswo va va vana va Xikwembu, hi vona ntsena lava nga hlanganyelaka eMfun’weni wa le tilweni

Yoh. 1:12, 13: “Hinkwavo lava nga n’wi amukela [Yesu Kreste], lava nga pfumela eka vito ra yena, ú va nyikile matimba ya ku hundzuka vana va Xikwembu, lava tswariweke, ku nga ri hi ndlela ya ntumbuluko, ku nga ri hi ku navela ka miri, ku nga ri hi ku rhandza ka wanuna, kambe ku ri hi Xikwembu.” (“Hinkwavo lava nga n’wi amukela” a ku vuriwi vanhu hinkwavo lava pfumeleke eka Kreste. Xiya lava ku vuriwaka vona, hi laha swi kombisiwaka ha kona eka ndzimana 11 [“varikwavo,” Vayuda]. Lunghelo leri fanaka ri nyikiwe vanhu van’wana, kambe i “ntlhambinyana” ntsena.)

Rhom. 8:16, 17: “Moya lowu wu yima ni mimoya ya hina ku tiyisa leswaku hi vana va Xikwembu. Kutani leswi hi nga vana, naswona hi vadyandzhaka; hi vadyandzhaka va Xikwembu, ni vadyandzhaka swin’we na Kriste; leswi kunene hi xanisekaka na yena, swi vula leswaku hi ta kwetsimisiwa na yena.”

1 Pet. 1:3, 4: “A ku nkhensiwe Xikwembu, Tata wa Hosi ya hina Yesu Kriste! Hi musa wa yena lowukulu ú hi tswarile ra vumbirhi, leswaku hi va ni ku tshemba loku hanyaka, hikwalaho ka ku pfuka ka Yesu Kriste exikarhi ka vafi, ni leswaku hi nyikiwa ndzhaka leyi nga boriki, leyi nga nyamisiwangiki, leyi nga vuniki. Mi vekeriwile yona ematilweni.”

Xana va ta endla yini etilweni?

Nhlav. 20:6: “Va ta va vaprista va Xikwembu ni va Kriste, kutani va ta fuma swin’we na Kriste malembe ya 1 000.”

1 Kor. 6:2: “Xana a mi tivi leswaku vahlawuriwa va Xikwembu va ta avanyisa misava xana?”

Xana munhu loyi a nga ‘tswariwangiki ra vumbirhi’ a nga ponisiwa?

Nhlav. 7:9, 10, 17: “Endzhaku ka sweswo [endzhaku ka loko muapostola Yohane a twe nhlayo ya lava va nga “tswariwa ra vumbirhi,” lava a va ta vumba Israyele wa moya ni lava a va ta va na Kreste etilweni; ringanisa Varhoma 2:28, 29 na Vagalatiya 3:26-29], ndzi languta, kutani ndzi vona ntshungu lowukulu wa vanhu; a ku nga ri na un’we la kotaka ku va hlaya. A va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato. A va yimile emahlweni ka xiluvelo ni le mahlweni ka Xinyimpfana va ambele tinguvu to leha leto basa, va tamele mincindzu emandleni ya vona. A va huwelela hi rito leri tlakukeke va ku: ‘Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!’ . . . ‘Xinyimpfana [Yesu Kreste] lexi nge xiluvelweni xi ta va murisi wa vona; xi ta va yisa eswihlobyeni swa mati ya vutomi.’”

Endzhaku ko longoloxa vanhu vo tala va ripfumelo va le mahlweni ka Vukreste, Vaheveru 11:39, 40 yi ri: “Vanhu lava hinkwavo, hambiloko ku pfumela ka vona ku tikombile swinene, a va kumanga leswi a va tshembisiwile swona. Hikuva Xikwembu a xi ri ni makungu man’wana lama antswaka hi tlhelo ra hina, leswaku va nga endliwi lava hetisekeke ehandle ka hina.” (Xana “hina” ku vuriwa vamani laha? Vaheveru 3:1 yi kombisa leswaku i ‘vahlanganyeri va ku vitaniwa ka le tilweni.’ Kutani, vanhu va ripfumelo va le mahlweni ka Vukreste, va fanele va ri ni ntshembo wa vutomi lebyi hetisekeke eka ndhawu yin’wana handle ka le tilweni.)

Ps. 37:29: “La’v̌o lulama v̌a ta fuma misav̌a, v̌a ta ṭhama ka yona hi masiku.”

Nhlav. 21:3, 4: “Vonani, vuako bya Xikwembu byi le vanhwini. Xi ta aka na vona kutani va ta va vanhu va xona; Xikwembu hi xoxe xi ta va na vona, xi va Xikwembu xa vona. Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”

Xana swa koteka leswaku munhu a kuma moya wa Xikwembu kambe a nga ‘tswariwi ra vumbirhi’?

Malunghana na Yohane mukhuvuri, ntsumi ya Yehovha yi te: “Ú ta tala Moya lowo Kwetsima a nga si velekiwa.” (Lk. 1:15) Naswona endzhakunyana Yesu u te: “Exikarhi ka vanhu lava tswariweke hi vavasati, a ku humelelanga loyi a tlulaka Yohane Mukhuvuri kasi la nga lontsongo eka hinkwavo eMfun’weni wa matilo i nkulukumba eka yena [Ha yini? Hikuva Yohane a nga ta ya etilweni kutani a xi nga ri kona xilaveko xa leswaku a “tswariwa ra vumbirhi”]. Kambe ku sukela enkarhini wa Yohane Mukhuvuri ku fikela enkarhini wa sweswi [loko Yesu a vula leswi], ku ngheniwa eMfun’weni wa matilo hi ku tirhisa matimba.”—Mt. 11:11, 12.

Moya wa Yehovha a wu ‘tirha’ eka Davhida naswona “wu v̌ulav̌ula” ha yena (1 Sam. 16:13; 2 Sam. 23:2), kambe a ku kona laha Bibele yi vulaka leswaku u ‘tswariwe ra vumbirhi.’ A ku nga ri na xilaveko xa leswaku a “tswariwa ra vumbirhi,” hikuva, hi laha Mintirho 2:34 yi vulaka ha kona: “Davhida a nga tlhandlukelanga etilweni.”

Xana va tikomba ha yini namuntlha vanhu lava nga ni moya wa Xikwembu?

Vona matluka 156-7, ehansi ka xihloko-nkulu lexi nge “Moya.”

Loko Munhu A Ku—

‘Mina ndzi tswariwe ra vumbirhi’

U nga ha hlamula u ku: ‘Sweswo swi vula leswaku siku rin’wana u langutela ku va na Kreste etilweni, a swi tano ke? . . . Xana u tshame u tivutisa leswaku lava yaka etilweni va ta ya endla yini kona?’ Kumbexana u nga engetela u ku: (1) ‘Va ta va tihosi ni vaprista lava fumaka na Kreste. (Nhlav. 20:6; 5:9, 10) Yesu u vule leswaku va ta va “ntlhambinyana” ntsena. (Lk. 12:32)’ (2) ‘Loko va ri tihosi, ku fanele ku va ni vanhu lava va nga ta va fuma. Xana ku ta va vamani? . . . Hi leti tinhla leti ti ndzi tsakiseke loko ndzi titwa. (Ps. 37:11, 29; Swiv. 2:21, 22)’

‘Xana u tswariwile ra vumbirhi?’

U nga ha hlamula u ku: ‘Ndzi kuma leswaku leswi vanhu va swi vulaka hi ku “tswariwa ra vumbirhi” a swi fani. Xana u nga ndzi byela leswaku eka wena swi vula yini?’

Kumbe u nga ha ku: ‘Xana u lava ku tiva loko Yesu ndzi n’wi amukerile tanihi Muponisi wa mina ni loko ndzi wu amukerile moya wo kwetsima, a hi swona ke? Loko swi ri tano nhlamulo i Ina; handle ka sweswo a ndzi nga ta vulavula na wena malunghana na Yesu.’ Kumbexana u engetela u ku: (1) ‘Kambe loko ndzi ehleketa hi mhaka yo kuma moya wo kwetsima, ndzi kuma leswaku moya wolowo a wu vonaki eka vo tala lava tivulaka Vakreste. (Gal. 5:22, 23)’ (2) ‘Xana a wu ta swi tsakela ku hanya emisaveni leyi loko un’wana ni un’wana a a kombisa timfanelo teto ta Xikwembu? (Ps. 37:10, 11)’

Swin’wana leswi u nga swi vulaka: ‘Loko u lava ku tiva leswaku, “Xana ndzi n’wi amukerile Kreste tanihi Muponisi wa mina?” nhlamulo i Ina. Timbhoni ta Yehovha hinkwato ti n’wi amukerile. Kambe, eka hina, ku tswariwa ra vumbirhi swi katsa ni swin’wana swo tlula sweswo.’ Kumbexana u nga engetela u ku: (1) ‘Loko Yesu a vulavula hi ku tswariwa ra vumbirhi u te a swi fanerile loko munhu a ta nghena eMfun’weni wa Xikwembu, hi leswaku, a va xiphemu xa Mfumo wa Xikwembu, hulumendhe ya xona ya le tilweni. (Yoh. 3:5)’ (2) ‘Bibele nakambe yi kombisa leswaku vanhu vo tala lava endlaka ku rhandza ka Xikwembu va ta hanya la misaveni, tanihi vafumiwa lava tsakeke va Mfumo wolowo. (Mt. 6:10; Ps. 37:29)’

Xiringanyeto xin’wana: Lava va nga xiphemu xa ntlawa wa le tilweni va nga hlamula va ku: ‘Ina, ndzi tswariwile ra vumbirhi. Kambe Bibele ya hi tsundzuxa hinkwerhu leswaku hi nga titshembi ku tlula mpimo hi xiyimo xa hina. Hi fanele hi tikambisisa nkarhi hinkwawo hi tiyiseka leswaku hi endla leswi Xikwembu na Kreste va lavaka hi swi endla. (1 Kor. 10:12)’ Kumbexana u nga engetela u ku: ‘Hi byihi vutihlamuleri lebyi Yesu a byi rhwexeke vadyondzisiwa vakwe va ntiyiso? (Mt. 28:19, 20; 1 Kor. 9:16)’