Timbhoni Ta Vukreste Leti Yaka eTilweni
“Kambe ra hina kaya ri le matilweni.”—VAFILIPIYA 3:20.
1. Hi xihi xikongomelo lexi hlamarisaka lexi Yehovha a nga na xona malunghana ni vanhu van’wana?
VANHU lava tswariweke tanihi vanhu vanyama va ta fuma tanihi tihosi ni vaprista etilweni, ni tintsumi ti ta va ehansi ka vona. (1 Vakorinto 6:2, 3; Nhlavutelo 20:6) Mawaku ntiyiso wo hlamarisa swonghasi! Kambe, i xikongomelo xa Yehovha xexo, naswona u xi hetisisa hi ku tirhisa N’wana wakwe la tswariweke a ri swakwe, Yesu Kreste. Ha yini Muvumbi wa hina a endla swilo swo tano? Naswona xana ku swi tiva ku fanele ku va khumba njhani Vakreste namuntlha? A hi voneni ndlela leyi Bibele yi hlamulaka swivutiso leswi ha yona.
2. I nchumu wihi lowuntshwa lowu Yohane Mukhuvuri a tiviseke leswaku Yesu u ta wu endla, naswona xana nchumu lowu lowuntshwa a wu fambisana na yini?
2 Loko Yohane Mukhuvuri a lunghiselela ndlela ya Yesu, u tivise leswaku Yesu a a ta endla nchumu wo karhi lowuntshwa. Rhekhodo yi ri: “[Yohane] a twarisa mahungu lama nge: ‘Wa ta un’wana endzhaku ka mina, loyi a ndzi tlulaka hi matimba, loyi swi nga ndzi fanelangiki ku korhama ndzi ntshunxa ngoti ya tintanghu ta yena. Mina ndzi mi khuvurile hi mati, kambe yena ú ta mi khuvula hi Moya lowo Kwetsima.’” (Marka 1:7, 8) Emahlweni ka nkarhi wolowo, a ku nga ri na munhu loyi a khuvuriwe hi moya lowo kwetsima. Leri a ku ri lunghiselelo lerintshwa leri katsaka moya lowo kwetsima, naswona a ri fambisana ni xikongomelo xa Yehovha lexi a xi ri kusuhi ni ku paluxiwa xo lunghiselela vanhu vutshamo bya le tilweni.
Ku “Tswariwa Ra Vumbirhi”
3. I swilo swihi leswintshwa malunghana ni Mfumo wa le tilweni leswi Yesu a swi byeleke Nikodema?
3 Eku hlanganeni ka yena exihundleni ni Mufarisi la dumeke, Yesu u paluxe swo tala malunghana ni xikongomelo lexi xa Xikwembu. Nikodema, wa Mufarisi, u ye eka Yesu ni vusiku, naswona Yesu u te eka yena: “A ku na munhu la nga vonaka Mfumo wa Xikwembu, loko a nga tlhelanga a tswariwa ra vumbirhi.” (Yohane 3:3) Nikodema, loyi tanihi Mufarisi a faneleke a dyondze Matsalwa ya Xiheveru, xisweswo a a tiva swo karhi hi ntiyiso lowu hlamarisaka wa Mfumo wa Xikwembu. Buku ya Daniyele yi vhumbe leswaku Mfumo a wu ta nyikiwa “uṅwana l’a fanaka ni ṅwana wa munhu” ni “tiko ra v̌ahlawuriwa v̌a Muungameri l’a tlakukeke.” (Daniyele 7:13, 14, 27) Mfumo a wu ta “seletela ni ku herisa” mimfumo leyin’wana hinkwayo ivi wu tshama hi laha ku nga heriki. (Daniyele 2:44) Swi nga ha endleka leswaku Nikodema a ehleketa leswaku vuprofeta lebyi byi ta hetiseka erixakeni ra Vayuda; kambe Yesu u vule leswaku loko a lava ku vona Mfumo, munhu u fanele ku tswariwa ra vumbirhi. Nikodema a nga swi twisisanga, kutani Yesu u ye emahlweni a ku: “Loko munhu a nga tswariwi hi mati ni Moya, a nga ka a nga ngheni eMfun’weni wa Xikwembu.”—Yohane 3:5.
4. Eka lava tswariweke hi moya lowo kwetsima, xana vuxaka bya vona na Yehovha a byi ta cinca njhani?
4 Yohane Mukhuvuri u vulavule hi nkhuvulo wa moya lowo kwetsima. Sweswi, Yesu u tlhandlekela hi ku vula leswaku munhu u fanele ku tswariwa hi moya lowo kwetsima loko a ta nghena eMfun’weni wa Xikwembu. Hi ku tswariwa loku ko hlawuleka, vavanuna ni vavasati lava nga hetisekangiki va nghena evuxakeni lebyo hlawuleka swinene na Yehovha Xikwembu. Va hundzuka vana va yena va vuwundli. Ha hlaya: “Hinkwavo lava nga n’wi amukela [Yesu], lava nga pfumela eka vito ra yena, ú va nyikile matimba ya ku hundzuka vana va Xikwembu, lava tswariweke, ku nga ri hi ndlela va ntumbuluko, ku nga ri hi ku navela ka miri, ku nga ri hi ku rhandza ka wanuna, kambe ku ri hi Xikwembu.”—Yohane 1:12, 13; Varhoma 8:15.
Vana Va Xikwembu
5. Xana vadyondzisiwa vo tshembeka va khuvuriwe rini hi moya lowo kwetsima, naswona i ku tirha kwihi ka moya lowo kwetsima loku fambelanaka na kona loku humeleleke hi nkarhi wolowo?
5 Loko Yesu a vulavula na Nikodema, moya lowo kwetsima ana se a wu ri eka Yesu, wu n’wi totela vuhosi bya nkarhi lowu taka eMfun’weni wa Xikwembu, naswona Xikwembu xi tivise Yesu erivaleni tanihi N’wana wa xona. (Matewu 3:16, 17) Yehovha u tswale vana vo tala va moya hi Pentekosta ya 33 C.E. Vadyondzisiwa lavo tshembeka lava hlengeletaneke endlwini ya le henhla eYerusalema va khuvuriwe hi moya lowo kwetsima. Hi nkarhi lowu fanaka, va tswariwe ra vumbirhi hi moya lowo kwetsima leswaku va va vana va Xikwembu va moya. (Mintirho 2:2-4, 38; Varhoma 8:15) Ku tlula kwalaho, va totiwe hi moya lowo kwetsima hi xikongomelo xo ya dya ndzhaka ya le tilweni enkarhini lowu taka, naswona va funghiwe ro sungula hi moya lowo kwetsima tanihi xikombiso lexi tiyisaka ntshembo wolowo wa le tilweni.—2 Vakorinto 1:21, 22.
6. Hi xihi xikongomelo xa Yehovha malunghana ni Mfumo wa le tilweni, naswona ha yini swi fanerile leswaku vanhu va va ni xiphemu eka wona?
6 Lava a ku ri vanhu vo sungula lava nga hetisekangiki lava hlawuriweke hi Xikwembu leswaku va nghena eMfun’weni. Hi leswaku, endzhaku ka ku fa ni ku pfuxiwa ka vona a va ta hundzuka xiphemu xa nhlengeletano ya Mfumo wa le tilweni lowu a wu ta fuma vanhu ni tintsumi. Yehovha u kunguhate leswaku hi ku tirhisa Mfumo wakwe, vito ra yena lerikulu a a ri ta hlawulekisiwa ni vuhosi byakwe byi lweriwa emahlweni ka swivumbiwa hinkwaswo. (Matewu 6:9, 10; Yohane 12:28) Mawaku ndlela leyi swi fanelaka ha yona leswaku vanhu volavo va va ni xiphemu eMfun’weni wolowo! Sathana u tirhise vanhu loko a tlakusa mphikamakaneta ya yena yo sungula ehenhleni ka vuhosi bya Yehovha le ndzhaku entangeni wa le Edeni, naswona sweswi Yehovha u kunguhata leswaku vanhu va ta katseka eku hlamuleni ka mphikamakaneta wolowo. (Genesa 3:1-6; Yohane 8:44) Muapostola Petro u tsalele vanhu lava hlawuleriweke ku ya fuma eMfun’weni wolowo: “A ku nkhensiwe Xikwembu, Tata wa Hosi ya hina Yesu Kriste! Hi musa wa yena lowukulu, ú hi tswarile ra vumbirhi, leswaku hi va ni ku tshemba loku hanyaka, hikwalaho ka ku pfuka ka Yesu Kriste exikarhi ka vafi, ni leswaku hi nyikiwa ndzhaka leyi nga boriki, leyi nga nyamisiwangiki, leyi nga vuniki. Mi vekeriwile yona ematilweni.”—1 Petro 1:3, 4.
7. I vuxaka byihi lebyo hlawuleka swin’we na Yesu lebyi tsakeriwaka hi lava khuvuriwaka hi moya lowo kwetsima?
7 Tanihi vana va vuwundli va Xikwembu, Vakreste lava lava hlawuriweke va hundzuke vamakwavo va Yesu Kreste. (Varhoma 8:16, 17; 9:4, 26; Vaheveru 2:11) Tanihi leswi Yesu a tikombeke a ri Mbewu leyi tshembisiweke Abrahama, Vakreste lava lava totiweke hi moya i vanghana va yena, kumbe xiphemu xin’wana xa Mbewu yoleyo, leyi nga ta tisela vanhu lava pfumelaka mikateko. (Genesa 22:17, 18; Vagalatiya 3:16, 26, 29) Mikateko yihi? Lunghelo ro kutsuriwa exidyohweni ni ku hlanganisiwa ni Xikwembu ni ku xi tirhela sweswi ni hi laha ku nga heriki. (Matewu 4:23; 20:28; Yohane 3:16, 36; 1 Yohane 2:1, 2) Vakreste lava totiweke lava nga emisaveni va yisa vanhu va timbilu letinene eka mikateko leyi hi ku twarisa vumbhoni malunghana ni makwavo wa moya Yesu Kreste ni hi Tata wa vona wa muwundli, Yehovha Xikwembu.—Mintirho 1:8; Vaheveru 13:15.
8. I yini ku ‘paluxiwa’ ka vana va Xikwembu lava tswariweke hi moya?
8 Bibele yi vulavula hi ku ‘paluxiwa’ ka vana lava va Xikwembu lava tswariweke hi moya. (Varhoma 8:19) Loko va nghena eMfun’weni tanihi tihosi-kulobye na Yesu, va hlanganyela eku loviseni ka mafambiselo ya swilo ya misava ya Sathana. Endzhaku ka sweswo, ku ringana malembe ya gidi, va pfuneta eku kongomiseni ka mimbuyelo ya gandzelo ra nkutsulo eka vanhu, xisweswo va yisa rixaka ra vanhu eku hetisekeni loku Adamu a ku lahleke. (2 Vatesalonika 1:8-10; Nhlavutelo 2:26, 27; 20:6; 22:1, 2) Ku paluxiwa ka vona ku katsa swilo leswi hinkwaswo leswi vuriweke. I swilo leswi swivumbiwa swa vanhu leswi pfumelaka swi swi languteleke hi matimba.
9. Xana Bibele yi kombetela eka huvo ya misava hinkwayo ya Vakreste lava totiweke hi ndlela yihi?
9 Huvo ya misava hinkwayo ya Vakreste lava totiweke i “nhlengeletan[o] ya vanhu va mativula lava marito ya vona ma tsariweke etilweni.” (Vaheveru 12:23) I vo sungula ku vuyeriwa eka gandzelo ra Yesu ra nkutsulo. Nakambe i “miri wa Kriste,” leswi kombisaka vuxaka bya vona lebyikulu exikarhi ka vona ni le ka Yesu. (1 Vakorinto 12:27) Pawulo u tsarile: “Miri i wun’we, hambileswi wu nga ni swirho leswo tala; naswona swirho, eku taleni ka swona, swi endla miri wun’we ntsena. Kutani na wona miri wa Kriste, wu tano. Hinkwerhu, hambi hi ri Vayuda kumbe Vagriki, mahlonga kumbe lava tifumaka, hi hundzukile miri wun’we, hi ku khuvuriwa ka hina eMoyeni wun’we; hinkwerhu hi nyikiwile ku nwa Moya wun’we ntsena.”—1 Vakorinto 12:12, 13; Varhoma 12:5; Vaefesa 1:22, 23; 3:6.
‘Israyele Wa Xikwembu’
10, 11. Hi lembe-xidzana ro sungula, ha yini ku laveke Israyele lontshwa, naswona xana tiko leri lerintshwa ri vumbiwe hi vamani?
10 Ku tlula malembe ya 1 500 emahlweni ka ku ta ka Yesu tanihi Mesiya la tshembisiweke, tiko ra Israyele wa nyama a ri ri vanhu va Yehovha lava hlawulekeke. Ku nga khathariseki switsundzuxo swa nkarhi na nkarhi, tiko hinkwaro a ri nga tshembeki. Loko Yesu a humelela, tiko ri n’wi arile. (Yohane 1:11) Xisweswo, Yesu u byele varhangeri va vukhongeri va Vayuda a ku: “Mi ta tekeriwa Mfumo wa Xikwembu; kutani wu ta nyikiwa tiko rin’wana leri nga ta veka mihandzu ya wona.” (Matewu 21:43) Ku xiya ‘tiko rero leri humesaka mihandzu ya Mfumo’ i swa nkoka leswaku hi ponisiwa.
11 Tiko lerintshwa i vandlha ra Vakreste lava totiweke, leri tswariweke hi Pentekosta ya 33 C.E. Swirho swa rona swo sungula a ku ri vadyondzisiwa va Yesu va Vayuda lava n’wi amukeleke tanihi Hosi ya vona ya le tilweni. (Mintirho 2:5, 32-36) Hambi swi ri tano, a va ri swirho swa tiko ra Xikwembu lerintshwa, ku nga ri hikwalaho ka leswi va tswariweke va ri Vayuda, kambe hi xisekelo xa ripfumelo eka Yesu. Xisweswo, Israyele loyi lontshwa wa Xikwembu a ku ri nchumu lowu hlawulekeke—tiko ra moya. Loko vunyingi bya Vayuda byi ala ku amukela Yesu, xirhambo xa ku va xiphemu xa tiko lerintshwa xi hundziseriwe eka Vasamariya ni le ka Vamatiko. Tiko lerintshwa a ri vuriwa ‘Israyele wa Xikwembu.’—Vagalatiya 6:16.
12, 13. Xana swi ve erivaleni hi ndlela yihi leswaku Israyele lontshwa a nga ri mpambukwa wa Vuyuda ntsena?
12 EIsrayele wa khale, loko lava a va nga ri Vayuda va hundzuke vaproselita, a va fanele ku titsongahatela Nawu wa Muxe, naswona vavanuna a va fanele ku swi kombisa hi ku yimbisiwa. (Eksoda 12:48, 49) Vakreste van’wana va Vayuda a va vona onge mhaka leyi fanaka a yi fanele ku tirha ni le ka lava nga riki Vayuda eka Israyele wa Xikwembu. Hambi swi ri tano, Yehovha a ri ni swin’wana leswi hambaneke ni sweswo emianakanyweni. Moya lowo kwetsima wu kongomise muapostola Petro ekaya ra Korneliyo wa Vamatiko. Loko Korneliyo ni ndyangu wakwe va amukele ku chumayela ka Petro, va nyikiwe moya lowo kwetsima—hambi leswi a va nga si khuvuriwa ematini. Leswi swi kombise kahle leswaku Yehovha a a amukele Vamatiko lava tanihi swirho swa Israyele wa Xikwembu handle ko va sindzisa leswaku va titsongahatela Nawu wa Muxe.—Mintirho 10:21-48.
13 Vapfumeri van’wana swi va nonon’hwerile ku swi amukela, naswona hi ku hatlisa mhaka hinkwayo yi kaneriwe hi vaapostola ni vakulu va le Yerusalema. Huvo yoleyo leyi simekiweke yi yingisele vumbhoni lebyi a byi hlamusela ndlela leyi moya lowo kwetsima wu tirheke ha yona eka vapfumeri lava nga riki Vayuda. Ku kambisisiwa ka Bibele ku kombise leswaku leswi a swi hetisisa vuprofeta lebyi huhuteriweke. (Esaya 55:5; Amosi 9:11, 12) Ku fikeleriwe xiboho lexi faneleke: Vakreste lava nga riki Vayuda a va nga boheki ku titsongahatela Nawu wa Muxe. (Mintirho 15:1, 6-29) Xisweswo, Israyele wa moya a ri tiko lerintshwa ku nga ri mpambukwa wa Vuyuda ntsena.
14. Xana Yakobo a kombisa yini loko a vula vandlha ra Vukreste a ku i “tinyimba ta 12, [leti] hangalakeke hinkwako ematikweni”?
14 Hi ku pfumelelana ni leswi, loko a tsalela Vakreste lava totiweke va lembe-xidzana ro sungula, mudyondzisiwa Yakobo u kongomise papila rakwe eka “tinyimba ta 12, [leti] hangalakeke hinkwako ematikweni.” (Yakobo 1:1; Nhlavutelo 7:3-8) Kavula, vaaki va Israyele lontshwa a va nga averiwanga eka tinyimba to karhi. A ku nga ri na ku avana ka tinyimba ta 12 leti hambaneke eka Israyele wa moya hi laha a swi ri ha kona eka Israyele wa nyama. Hambi swi ri tano, marito ya Yakobo lama huhuteriweke ma kombisa leswaku hi langutelo ra Yehovha Israyele wa Xikwembu u sive tinyimba ta 12 ta Israyele wa ntumbuluko hi ku helela. Loko Muisrayele wa ntumbuluko a hundzuke xiphemu xa tiko lerintshwa, rixaka ra yena ra nyama—hambi loko a ri wa nyimba ya Yuda kumbe ya Levhi—a ri nga ri ra nkoka.—Vagalatiya 3:28; Vafilipiya 3:5, 6.
Ntwanano Lowuntshwa
15, 16. (a) Xana Yehovha u swi languta njhani swirho swa Israyele wa Xikwembu leswi nga riki Vayuda? (b) Xana Israyele lontshwa a a simekiwe exisekelweni xihi xa le nawini?
15 Hi ku ya hi langutelo ra Yehovha, swirho swa tiko lerintshwa leswi nga riki Vaisrayele i Vayuda va moya lava heleleke! Muapostola Pawulo u hlamuserile: “Ku va Muyuda wa xiviri, a swi tikombi hi le handle ntsena; ni ku yimba ka xiviri, a ku vonaki ehandle, emirini. Kambe Muyuda wa xiviri, hi loyi a nga yena exihundleni xa mbilu, ni ku yimba ka xiviri, i ku yimba ka mbilu, loku endliwaka emoyeni, ku nga ri hi leswi tsariweke swa Nawu; ku dzunisiwa ka munhu loyi a ku humi ka vanhu, kambe ku huma eka Xikwembu.” (Varhoma 2:28, 29) Vamatiko vo tala va amukele xirhambo xo va xiphemu xa Israyele wa Xikwembu, naswona xiendlakalo lexi xi hetisise vuprofeta bya Bibele. Hi xikombiso, muprofeta Hosiya u tsarile: “Ndzi ta tsetselela loyi a nga kombisiwangiki tintswalo, naswona ndzi ta ku eka lava nga riki vanhu va mina: ‘Mi vanhu vanga’; naswona vona va ta ku: ‘U Xikwembu xa mina.’”—Hosiya 2:23, NW; Varhoma 11:25, 26.
16 Loko Vaisrayele va moya a va nga ri ehansi ka ntwanano wa Nawu wa Muxe, xana a va ri xiphemu xa tiko lerintshwa hi xisekelo xihi? Yehovha u endle ntwanano lowuntshwa hi ku tirhisa Yesu hi tiko leri ra moya. (Vaheveru 9:15) Loko Yesu a sungule Xitsundzuxo xa rifu ra yena, hi Nisan 14, 33 C.E., u hundzise xinkwa ni vhinyo eka vaapostola va yena vo tshembeka va 11 kutani a vula leswaku vhinyo a yi yimela “ngati ya ntwanano.” (Matewu 26:28; Yeremiya 31:31-34) Hi laha swi hlamuseriweke ha kona emhakeni ya Luka, Yesu u vule leswaku xinwelo xa vhinyo a xi yimela “ntwanano lowuntshwa.” (Luka 22:20) Eku hetisekeni ka marito ya Yesu, loko moya lowo kwetsima wu chuluriwile hi Pentekosta naswona Israyele wa Xikwembu a tswariwile, Mfumo wu susiwile eka Israyele wa nyama wu nyikiwa tiko lerintshwa, ra moya. Ematshan’weni ya ku va Israyele wa nyama, tiko leri lerintshwa sweswi a ri ri nandza wa Yehovha, loyi a vumbiweke hi timbhoni takwe.—Esaya 43:10, 11.
“Yerusalema Lowuntshwa”
17, 18. I tinhlamuselo tihi leti nyikeriwaka ebukwini ya Nhlavutelo malunghana ni mikateko leyi yimeleke Vakreste lava totiweke?
17 Mawaku mikateko leyi rindzeleke lava nga ni lunghelo ro hlanganyela eku vitaneriweni ka le tilweni! Naswona mawaku ndlela leyi swi tsakisaka ha yona ku dyondza hi swihlamariso leswi va rindzeleke! Buku ya Nhlavutelo yi hi nyika swivono leswi nyanyulaka swa ndzhaka ya vona ya le tilweni. Hi xikombiso, eka Nhlavutelo 4:4, ha hlaya: “Xiluvelo [xa Yehovha] a xi rhendzeriwile hi swiluvelo swin’wana swa 24, ku tshamile vakulukumba va 24 eka swona, lava a va ambele tinguvu leto basa, va ri ni tiharhi ta nsuku etinhlokweni.” Vakulukumba lava va 24 i Vakreste lava totiweke, lava pfuxiweke ni lava sweswi va nga le xikhundleni xa le tilweni lexi Yehovha a va tshembiseke xona. Tiharhi ni swiluvelo swa vona swi hi tsundzuxa vuhosi. Nakambe, anakanya hi lunghelo ra vona leri hlamarisaka ro tirha va rhendzele xiluvelo xa Yehovha!
18 Eka Nhlavutelo 14:1, hi kuma xivono xin’wana xa vona: “Ndzi languta, kutani ndzi vona Xinyimpfana xi yimile entshaveni ya Siyoni, xi ri ni vanhu va 144 000 lava mimombo ya vona yi tsariweke vito ra xona ni ra Tata wa xona.” Laha hi vona nhlayo leyi pimiweke ya vatotiwa lava—144 000. Xikhundla xa vona xa vuhosi xi twisisiwa hi leswi va yimeke ni Hosi ya Yehovha leyi nga exiluvelweni, Yesu “Xinyimpfana.” Naswona va le Ntshaveni ya Siyoni ya le tilweni. Ntshava ya Siyoni ya laha misaveni a yi ri ndhawu ya Yerusalema, doroba-nkulu ra vuhosi ra Israyele. Ntshava ya Siyoni ya le tilweni yi yimela xikhundla lexi tlakukeke xa Yesu ni vadyandzhaka-kulobye, lava endlaka Yerusalema wa le tilweni.—2 Tikronika 5:2; Pisalema 2:6.
19, 20. (a) Xana Vakreste lava totiweke va ta va xiphemu xa nhlengeletano yihi ya le tilweni? (b) Xana Yehovha u hlawule lava nga ta ya etilweni ku ringana nkarhi wo tanihi kwihi?
19 Ku pfumelelana ni leswi, vatotiwa exikhundleni xa vona xa le tilweni na vona va vuriwa “Yerusalema [L]owuntshwa.” (Nhlavutelo 21:2) Yerusalema wa le misaveni a wu ri “muti wa Hosi leyikulu” kun’we ni ndhawu ya tempele. (Matewu 5:35) Yerusalema Lowuntshwa wa le tilweni i nhlengeletano ya Mfumo wa vuhosi leyi eka yona Yehovha, Hosi leyikulu, ni Hosi yakwe leyi vekiweke, Yesu, sweswi a fumaka ni leyi ntirho wa vuprista wu endliwaka eka yona tanihi leswi mikateko leyi fuweke yi khulukaka yi huma exiluvelweni xa Yehovha leswaku yi hanyisa vanhu. (Nhlavutelo 21:10, 11; 22:1-5) Exivonweni xin’wana Yohane u twa hi ta Vakreste lava totiweke, lavo tshembeka, lava pfuxiweke, lava hlamuseriwaka tanihi ‘nsati wa Xinyimpfana.’ Mawaku nhlamuselo yo tsakisa swonghasi leyi leswi swi yi nyikelaka malunghana ni vuxaka lebyi va nga ta tiphina ha byona na Yesu ni ku titsongahata eka yena hi ku swi rhandza! Anakanya hi ntsako lowu nga ta va kona etilweni loko wo hetelela wa vona eku heteleleni a amukela hakelo ya yena ya le tilweni. Sweswi, eku heteleleni, “vukati bya Xinyimpfana” byi nga endliwa! Hi nkarhi wolowo nhlengeletano ya vuhosi ya le tilweni yi ta va yi helerile.—Nhlavutelo 19:6-8.
20 Ina, mikateko leyi hlamarisaka yi vekeriwe lava muapostola Pawulo a vulavuleke ha vona loko a ku: “Kambe ra hina kaya ri le matilweni.” (Vafilipiya 3:20) Ku lava ku ringana malembe ya magidi-mbirhi, Yehovha a ri karhi a hlawula vana va yena va moya ni ku va lunghiselela ndzhaka ya le tilweni. Hi ku ya hi vumbhoni hinkwabyo, ntirho lowu wa ku hlawula ni ku lunghiselela wu kusuhi ni ku hela. Kambe ka ha ta landzela swo tala, hi laha Yohane a paluxeriweke swona ha kona exivonweni lexi rhekhodiweke eka Nhlavutelo ndzima 7. Kutani sweswi, ntlawa wun’wana wa Vakreste wu lava nyingiso wa hina, naswona hi ta bula ha wona exihlokweni lexi landzelaka.
Wa Tsundzuka Xana?
◻ Xana hi kwihi ku tirha loku hambaneke ka moya eka lava nga ni ndzhaka ya le tilweni?
◻ Xana i vuxaka byihi lebyikulu lebyi vatotiwa va byi tsakelaka na Yehovha? na Yesu?
◻ Xana vandlha ra Vakreste lava totiweke ri hlamuseriwa njhani eBibeleni?
◻ Xana Israyele wa Xikwembu u simekiwe exisekelweni xihi xa le nawini?
◻ I malunghelo wahi ya le tilweni lama yimeleke Vakreste lava totiweke?
[Swifaniso leswi nga eka tluka 10]
Enkarhini lowu lavaka ku tlula malembe ya magidi-mbirhi, Yehovha u hlawule lava nga ta fuma eMfun’weni wa le tilweni