Yehovha U Tisa Vana Vo Tala Eku Vangameni
“A swi fanela eka [Xikwembu ku] tisa vana vo tala eku vangameni, ku endla leswaku Murhangeri Lonkulu wa ku ponisiwa ka vona a hetiseka hi ku xaniseka.”—VAHEVERU 2:10.
1. Ha yini hi nga tiyisekaka leswaku xikongomelo xa Yehovha hi vanhu xi ta hetiseka?
YEHOVHA u vumbe misava leswaku yi va kaya leri nga heriki ra ndyangu lowu hetisekeke wa vanhu lowu a wu ta hanya hilaha ku nga heriki. (Eklesiasta 1:4; Esaya 45:12, 18) Kavula, tata wa hina Adamu u dyohile, xisweswo a hundzisela xidyoho ni rifu eka vana va yena. Kambe xikongomelo xa Xikwembu hi vanhu xi ta hetiseka hi Mbewu ya xona leyi Tshembisiweke, Yesu Kreste. (Genesa 3:15; 22:18; Varhoma 5:12-21; Vagalatiya 3:16) Ku rhandza ka Yehovha misava ya vanhu swi n’wi susumetele ku nyikela “N’wana wa [yena] la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Naswona rirhandzu ri susumetele Yesu “ku nyikela moya-xiviri wakwe wu va nkutsulo wa lavo tala.” (Matewu 20:28) “Nkutsulo [lowu] lowu yelanaka” wu tlhela wu xava timfanelo ni ntshembo lowu lahlekeleke Adamu ni ku endla leswaku ku hanya hilaha ku nga heriki swi koteka.—1 Timotiya 2:5, 6; Yohane 17:3.
2. Ku tirha ka gandzelo ra nkutsulo ra Yesu a ku fanekiseriwa njhani hi Siku ra Israyele ro Phahlelana Mariyeta lembe rin’wana ni rin’wana?
2 Ku tirha ka gandzelo ra nkutsulo ra Yesu ku fanekiseriwe hi Siku ro Phahlelana Mariyeta lembe na lembe. Hi siku rero, muprista lonkulu wa le Israyele a a rhanga hi ku nyikela nkuzi yi va gandzelo ra swidyoho, kutani ngati ya yona a yi nyikela eArekeni yo kwetsima eVukwetsimisisweni bya tabernakela, endzhaku a yi nyikela etempeleni. Leswi a swi endleriwa yena, ndyangu wakwe ni nyimba ya Levhi. Hi ku fanana, Yesu Kreste u nyikele ntikelo wa ngati ya yena eka Xikwembu leswaku ‘vamakwavo’ vakwe va moya va rivaleriwa swidyoho swa vona ku sungula. (Vaheveru 2:12; 10:19-22; Levhitika 16:6, 11-14) Hi Siku ro Phahlelana Mariyeta, muprista lonkulu nakambe a a nyikela mbuti yi va gandzelo ra swidyoho, a nyikela ngati ya yona eVukwetsimisisweni, xisweswo a endla gandzelo ro rivalela swidyoho swa tinyimba ta 12 ta Israyele leti a ti nga ri ta vaprista. Hi ku fanana, Muprista Lonkulu Yesu Kreste u ta tirhisa ngati yakwe ya vutomi leswaku ku pfuneka vanhu lava kombisaka ripfumelo, a sula swidyoho swa vona.—Levhitika 16:15.
Ku Tisiwa Eku Vangameni
3. Hi ku ya hi Vaheveru 2:9, 10, Xikwembu a xi endla yini hi malembe ya 1900?
3 Hi malembe ya 1900, Xikwembu a xi ri karhi xi endla swilo swo hlamarisa malunghana ni ‘vamakwavo’ va Yesu. Malunghana ni leswi, muapostola Pawulo u tsarile a ku: “Ha n’wi vona Yesu, loyi a a endliwe a va ehansinyana ka tintsumi, a a tlhandlekiwe harhi ya ku vangama ni ku xiximiwa hikwalaho ka leswi a a file, leswaku hi musa lowu nga faneriwiki wa Xikwembu a ta nantswa rifu hikwalaho ka vanhu hinkwavo. Hikuva a swi fanela eka [Yehovha Xikwembu] loyi swilo hinkwaswo swi nga kona hi mhaka yakwe ni loyi ha yena swilo hinkwaswo swi nga kona, hi xikongomelo xo tisa vana vo tala eku vangameni, ku endla leswaku Murhangeri Lonkulu wa ku ponisiwa ka vona a hetiseka hi ku xaniseka.” (Vaheveru 2:9, 10) Murhangeri Lonkulu wa ku ponisiwa i Yesu Kreste, loyi a dyondzeke ku yingisa loku hetisekeke hikwalaho ka swilo leswi a xanisekeke ha swona loko a ha hanya tanihi munhu wa nyama emisaveni. (Vaheveru 5:7-10) Yesu hi yena wo sungula ku tswariwa tanihi n’wana wa moya wa Xikwembu.
4. Yesu u tswariwe rini a va N’wana wa Xikwembu wa moya, naswona hi ndlela yihi?
4 Yehovha u tirhise moya wakwe lowo kwetsima kumbe matimba lama tirhaka, leswaku a tswala Yesu tanihi N’wana wakwe wa moya, leswaku a n’wi yisa eku vangameni ka le tilweni. Loko a ri na Yohane Mukhuvuri ntsena, Yesu u nyuperisiwe hi ku helela ematini, a kombisa ku tinyikela ka yena eka Xikwembu. Rungula ra Evhangeli ya Luka ri ri: “Loko vanhu hinkwavo va khuvuriwile, Yesu na yena u khuvuriwile naswona, loko a ri karhi a khongela, tilo ri pfuleka kutani moya lowo kwetsima hi xivumbeko xa tuva wu xikela ehenhla ka yena, kutani rito ri huma etilweni: ‘U N’wana wa mina, la rhandzekaka; ndzi ku amukerile.’” (Luka 3:21, 22) Yohane u vone moya lowo kwetsima wu xikela eka Yesu, kutani a twa Yehovha a vulavula a n’wi amukela erivaleni tanihi N’wana Wakwe la rhandzekaka. Enkarhini wolowo, Yehovha u tswale Yesu hi ku tirhisa moya lowo kwetsima, a va yena wo sungula eka ‘vana vo tala lava a va fanele va tisiwa eku vangameni.’
5. I vamani lava veke vo sungula ku pfuneka eka gandzelo ra Yesu, naswona i vangani?
5 ‘Vamakwavo’ va Yesu hi vona vo sungula ku pfuneka eka gandzelo ra yena. (Vaheveru 2:12-18) Exivonweni, muapostola Yohane u va vone ana se va ri eku vangameni eNtshaveni ya Siyoni ya le tilweni va ri ni Xinyimpfana, Hosi Yesu Kreste la pfuxiweke. Nakambe Yohane u boxe nhlayo ya vona, a ku: “Ndzi languta, kutani, waswivo, a ku ri ni Xinyimpfana xi yime eNtshaveni ya Siyoni, xi ri ni lava dzana makumemune-mune wa magidi va tsariwe vito ra xona ni vito ra Tata wa xona emimombyeni ya vona. . . . Lava va xaviwe evanhwini leswaku va va swirhangana eka Xikwembu ni le ka Xinyimpfana, naswona a ku kumiwanga mavunwa emilon’wini ya vona; a va na xisolo.” (Nhlavutelo 14:1-5) Kutani ntsengo wa ‘vana vo tala lava yisiwaka eku vangameni’ etilweni i 144 001 ntsena—Yesu ni vamakwavo va moya.
‘Ku Velekiwa Hi Xikwembu’
6, 7. I vamani lava ‘velekiwaka hi Xikwembu,’ naswona leswi swi vula yini eka vona?
6 Lava tswariweke hi Yehovha va ‘velekiwe hi Xikwembu.’ Loko muapostola Yohane a vulavula na vanhu vo tano, u tsarile a ku: “Mani na mani la velekiweke hi Xikwembu a nga hambeti a endla xidyoho, hikuva mbewu ya xona ya ku tswala yi tshama eka lowo tano, kutani a nge hanyi hi ku endla xidyoho, hikuva u velekiwe hi Xikwembu.” (1 Yohane 3:9) “Mbewu [leyi] ya ku tswala” i moya lowo kwetsima wa Xikwembu. Hi ku hlangana ni rito ra xona, wu nyike un’wana ni un’wana wa lava 144 000 ‘ku velekiwa lokuntshwa’ eka ntshembo wo ya hanya etilweni.—1 Petro 1:3-5, 23.
7 Yesu a a ri N’wana wa Xikwembu loko a tswariwa emisaveni, tanihi leswi Adamu a a ri “n’wana wa Xikwembu” loko a ha ri munhu la hetisekeke. (Luka 1:35; 3:38) Hambiswiritano, endzhaku ka ku khuvuriwa ka Yesu, a swi ri swa nkoka leswi Yehovha a tiviseke a ku: “U N’wana wa mina, la rhandzekaka; ndzi ku amukerile.” (Marka 1:11) Loko Xikwembu xi tivisa xitiviso lexi lexi a xi fambisana ni ku chuluriwa ka moya, a swi ri erivaleni leswaku hi nkarhi wolowo a xi tswala Yesu a va N’wana wa xona wa moya. Hi ndlela yo fanekisela, Yesu hi nkarhi wolowo a a ‘velekiwa hi vuntshwa,’ a ri ni mfanelo ya ku tlhela a kuma vutomi tanihi N’wana wa Xikwembu wa moya etilweni. Ku fana na yena, vamakwavo va moya va 144 000 va “velekiwa ra vumbirhi.” (Yohane 3:1-8; vona Xihondzo xo Rindza xa November 15, 1992, matluka 3-6.) Nakambe, ku fana na Yesu, va totiwa hi Xikwembu ni ku lerisiwa ku huwelela mahungu lamanene.—Esaya 61:1, 2; Luka 4:16-21; 1 Yohane 2:20.
Vumbhoni Bya Ku Tswariwa
8. Hi byihi vumbhoni bya ku tswariwa hi moya lebyi a byi ri kona malunghana na (a) Yesu (b) vadyondzisiwa vakwe vo sungula?
8 A ku ri ni vumbhoni bya leswaku Yesu u tswariwe hi moya. Yohane Mukhuvuri u vone moya wu xikela ehenhla ka Yesu, a twa ni rito ra Xikwembu ri tivisa ku tswariwa ka Mesiya loyi a ha ku totiwaka leswaku a va n’wana wa moya. Kambe, xana vadyondzisiwa va Yesu a va ta swi tivisa ku yini leswaku va tswariwe hi moya? Hi siku leri Yesu a tlhandlukeleke etilweni ha rona, u te: “Yohane, hakunene, u khuvule hi mati, kambe n’wina mi ta khuvuriwa hi moya lowo kwetsima emasikwini ma nga ri mangani ku sukela sweswi.” (Mintirho 1:5) Vadyondzisiwa va Yesu va “[khuvuriwe] hi moya lowo kwetsima” hi siku ra Pentekosta ya 33 C.E. Ku chuluriwa koloko ka moya a ku fambisana ni ‘huwa leyi humaka etilweni leyi kotisaka rimoyana leri hungaka hi rivilo ra matimba’ kun’we ni “tindzimi leti fanaka ni ndzilo” ehenhla ka mudyondzisiwa un’wana ni un’wana. Lexi a xi xiyeka ngopfu a ku ri vuswikoti bya vadyondzisiwa “[byo] vulavula hi tindzimi to hambana-hambana, hilaha moya a wu va nyika hakona leswaku va vulavula.” Kutani a ku ri ni vumbhoni lebyi vonakaka ni lebyi twakalaka bya leswaku valandzeri va Kreste a va pfuleriwe ndlela yo ya eku vangameni ka le tilweni tanihi vana va Xikwembu.—Mintirho 2:1-4, 14-21; Yuwele 2:28, 29.
9. Hi byihi vumbhoni lebyi a byi ri kona bya leswaku Vasamariya, Korneliyo ni van’wana eka lembe-xidzana ro sungula a va tswariwe hi moya?
9 Endzhakunyana, Filipi muvuri wa evhangeli u chumayele eSamariya. Hambileswi Vasamariya va amukeleke rungula rakwe kutani va khuvuriwa, a va nga ri na vumbhoni bya leswaku Xikwembu xi va tswarile va va vana va xona. Loko muapostola Petro na muapostola Yohane va khongelela ni ku tlhandleka vapfumeri volavo mavoko, “va [kume] moya lowo kwetsima” hi ndlela yo karhi leyi a yi xiyiwa hi vahlaleri. (Mintirho 8:4-25) Lebyi a byi ri vumbhoni bya leswaku Vasamariya lava pfumeleke a va tswariwe hi moya tanihi vana va Xikwembu. Hi ku fanana, hi 36 C.E., Korneliyo ni Vamatiko van’wana va amukele ntiyiso wa Xikwembu. Petro ni vapfumeri va Vayuda lava fambeke na yena “a va hlamele, hikuva nyiko ya mahala ya moya lowo kwetsima a yi chululeriwa ni le ka vanhu va matiko. Hikuva a va va twa va vulavula hi tindzimi va twarisa Xikwembu.” (Mintirho 10:44-48) Vakreste vo tala va lembe-xidzana ro sungula va kume “tinyiko ta moya,” to tanihi ku vulavula hi tindzimi. (1 Vakorinto 14:12, 32) Xisweswo vanhu lava va ve ni vumbhoni lebyi xiyekaka bya leswaku va tswariwe hi moya. Kambe xana Vakreste va le ndzhaku a va ta swi tivisa ku yini leswaku va tswariwe hi moya kumbe e-e?
Vumbhoni Bya Moya
10, 11. Hi ku ya hi Varhoma 8:15-17, u nga swi hlamusela njhani leswaku moya wu nyikela vumbhoni eka lava va nga vadyandzhaka swin’we na Kreste?
10 Vakreste hinkwavo va 144 000 lava totiweke va ve ni vumbhoni lebyi tiyeke bya leswaku va ni moya wa Xikwembu. Malunghana ni leswi, Pawulo u tsarile a ku: “Mi amukele moya wa ku vekiwa tanihi vana, moya lowu hi huwelelaka ha wona hi ku: ‘Abba, Tatana!’ Moya hi woxe wu nyikela vumbhoni swin’we ni moya wa hina leswaku hi vana va Xikwembu. Kutani loko hi ri vana, nakambe hi vadyandzhaka: vadyandzhaka hakunene va Xikwembu, kambe vadyandzhaka-kulobye na Kreste, ntsena loko hi xaniseka swin’we leswaku hi ta tlhela hi vangamisiwa swin’we.” (Varhoma 8:15-17) Vakreste lava totiweke va titwa leswaku i vana va Tata wa vona wa le tilweni. (Vagalatiya 4:6, 7) Va tiyiseka swinene leswaku va tswariwe hi Xikwembu tanihi vana va xona va moya leswaku va va vadyandzaka-kulobye na Kreste eMfun’weni wa le tilweni. Eka leswi, moya lowo kwetsima wa Yehovha wu tirha swinene.
11 Hi ku susumetiwa hi moya lowo kwetsima wa Xikwembu, moya kumbe langutelo lerikulu ra vatotiwa ri va susumetela ku angula kahle eka leswi Rito ra Xikwembu ri swi vulaka malunghana ni ntshembo wa ku hanya etilweni. Hi xikombiso, loko va hlaya leswi Matsalwa ma swi vulaka malunghana ni vana va moya va Yehovha, hi ntumbuluko va swi lemuka leswaku marito yo tano ma tirha eka vona. (1 Yohane 3:2) Va swi tiva leswaku va “[khuvuriwe] eka Kreste Yesu” ni le ka rifu rakwe. (Varhoma 6:3) Lexi va tiyisekaka swinene ha xona hileswaku i vana va moya va Xikwembu, lava nga ta fa ivi va pfuxeriwa eku vangameni ka le tilweni, ku fana na Yesu.
12. I yini leswi moya wa Xikwembu wu swi ngheniseke eka Vakreste lava totiweke?
12 Ku tswaleriwa ku va n’wana wa moya a swi ti hi ku navela loku hlakuleriweke. Vanhu lava tswariweke hi moya a va lavi ku ya etilweni hikwalaho ka maxangu ya mintshikilelo ya namuntlha emisaveni. (Yobo 14:1) Ku ri na sweswo, moya wa Yehovha wu nghenise ntshembo ni ku navela eka vatotiwa va xiviri, loku vanhu ntsena va nga riki na kona. Vanhu lava tswariweke hi ndlela yoleyo va swi tiva leswaku vutomi lebyi nga heriki eka vanhu lava hetisekeke, lava rhendzeriweke hi ndyangu lowu tsakeke ni vanghana byi ta va lebyi hlamarisaka emisaveni ya paradeyisi. Hambiswiritano, vutomi byo tano a hi nchumu lowu naveriwaka ngopfu hi timbilu ta vona. Vatotiwa va ni ntshembo lowu tiyeke swinene wo ya hanya etilweni, lerova va tiyimisela ku titsona mintshembo hinkwayo ya laha misaveni ni leswi va swi rhandzaka.—2 Petro 1:13, 14.
13. Hi ku ya hi 2 Vakorinto 5:1-5, i yini leswi Pawulo a a swi “navela swinene,” naswona leswi swi kombisa yini malunghana ni lava tswariweke hi moya?
13 Ntshembo lowu nyikiwaka hi Xikwembu wo ya hanya etilweni wu tiyile swinene eka vanhu vo tano lerova va titwa ku fana na Pawulo, loyi a tsaleke a ku: “Ha swi tiva leswaku loko yindlu ya hina ya laha misaveni, ku nga ntsonga lowu, yi hahluka, hi ta kuma muako lowu humaka eka Xikwembu, ku nga yindlu leyi nga endliwangiki hi mavoko, leyi nga riki na makumu ematilweni. Hikuva endlwini leyi ya ku tshama eka yona ha konya hakunene, hi navela swinene ku ambala leyi nga ya hina leyi humaka etilweni, leswaku, loko hi yi ambarile hakunene, a hi nge kumiwi hi nga ambalanga. Entiyisweni, hina lava hi nga entsongeni lowu ha konya, hi tshikileriwile; hikuva a hi lavi ku yi hluvula, kambe hi lava ku ambala yin’wana, leswaku leswi faka swi mitiwa hi vutomi. Kutani loyi a hi lunghiseleleke xilo xolexi i Xikwembu, lexi hi nyikeke mfungho wa leswi nga ta ta, ku nga moya.” (2 Vakorinto 5:1-5) Leswi Pawulo a a swi “navela swinene” a ku ri ku pfuxeriwa etilweni tanihi xivumbiwa xa moya lexi nga fiki. Loko a vulavula hi miri wa munhu, u tirhise xigego xa ntsonga lowu hohlokaka, lowu nga vutshamo bya rivovo ni bya nkarhinyana loko byi ringanisiwa ni yindlu yinene. Hambileswi va hanyaka emisaveni hi mimiri ya nyama leyi faka, Vakreste lava nga ni moya lowu nga xikombiso xa vutomi bya nkarhi lowu taka xa ku ya hanya etilweni, va langutele “muako lowu humaka eka Xikwembu,” miri wa moya lowu nga fiki, lowu nga onhakiki. (1 Vakorinto 15:50-53) Ku fana na Pawulo, va nga vula hi ku tiyiseka va ku: “Hi ni xivindzi lexi tiyeke naswona hi swi tsakela swinene ku hambana ni miri [wa nyama] ni ku endla kaya ra hina [etilweni] swin’we ni Hosi.”—2 Vakorinto 5:8.
Ku Nghenisiwa Eka Mintwanano Yo Hlawuleka
14. Loko Yesu a simeka ku tlangeriwa ka Xitsundzuxo, i ntwanano wihi lowu a wu boxeke ku sungula, naswona wu pfuna yini malunghana ni Vaisrayele va moya?
14 Vakreste lava tswariweke hi moya va tiyiseka leswaku va nghenisiwe eka mintwanano mimbirhi yo hlawuleka. Yesu u boxe wun’wana wa yona loko a tirhisa xinkwa xo kala comela ni vhinyo leswaku a simeka Xitsundzuxo xa rifu rakwe leri a ri tshinele ivi a vula leswi landzelaka hi xinwelo xa vhinyo: “Xinwelo lexi xi vula ntwanano lowuntshwa hikwalaho ka ngati ya mina, leyi nga ta halateriwa n’wina.” (Luka 22:20; 1 Vakorinto 11:25) Xana i vamani lava hlanganyelaka eka ntwanano lowuntshwa? I Yehovha Xikwembu ni swirho swa Israyele wa moya—lava Yehovha a tiyimiseleke ku va yisa eku vangameni ka le tilweni. (Yeremiya 31:31-34; Vagalatiya 6:15, 16; Vaheveru 12:22-24) Tanihi leswi ntwanano lowuntshwa wu endliweke lowu tirhaka hikwalaho ka ngati ya Yesu leyi halatiweke, wu hlawula vanhu va vito ra Yehovha ematikweni, wu endla Vakreste lava va tswariweke hi moya va va swirho swa “mbewu” ya Abrahama. (Vagalatiya 3:26-29; Mintirho 15:14) Ntwanano lowuntshwa wu endla leswaku Vaisrayele hinkwavo va moya va tisiwa eku vangameni hi ku pfuxeriwa evuton’wini lebyi nga riki ni ku fa etilweni. Tanihi leswi wu nga “ntwanano lowu nga heriki,” mimpfuno ya wona yi ta va kona hilaha ku nga heriki. Swi ta tikomba loko ntwanano lowu wu ta tlhela wu pfuna hi tindlela tin’wana hi nkarhi wa Mfumo wa Gidi ra Malembe ni le ndzhaku ka wona.—Vaheveru 13:20.
15. Hi ku ya hi Luka 22:28-30, valandzeri va Yesu lava totiweke va sungule ku nghenisiwa eka ntwanano wihi wun’wana, naswona rini?
15 “Vana vo tala” lava Yehovha a tiyimiseleke ku va ‘tisa eku vangameni’ nakambe va nghenisiwe ha un’we-un’we eka ntwanano wa Mfumo wa le tilweni. Malunghana ni ntwanano lowu a wu endleke ni valandzeri va mikondzo ya yena, Yesu u te: “Hi n’wina mi khomeleleke swin’we na mina emiringweni ya mina; kutani ndzi endla ntwanano swin’we na n’wina; hilaha Tata wa mina a endleke hakona ntwanano wa mfumo swin’we na mina, leswaku mi ta dya ni ku nwa etafuleni ra mina emfun’weni wa mina, kutani mi tshama eswiluvelweni leswaku mi avanyisa tinyimba ta khume-mbirhi ta Israyele.” (Luka 22:28-30) Ntwanano wa Mfumo wu sunguriwe loko vadyondzisiwa va Yesu va totiwa hi moya lowo kwetsima hi Pentekosta ya 33 C.E. Ntwanano wolowo wu ta tirha hilaha ku nga heriki exikarhi ka Kreste ni tihosi-kulobye. (Nhlavutelo 22:5) Kutani Vakreste lava tswariweke hi moya va tiyiseka leswaku va le ka ntwanano lowuntshwa ni le ka ntwanano wa Mfumo. Hikwalaho, loko ku tlangeriwa Xilalelo xa Hosi, i vatotiwa lava nga riki vangani ntsena lava ha riki emisaveni lava dyaka xinkwa, lexi yimelaka miri wa Yesu wa nyama lowu a wu nga ri na xidyoho, ni ku nwa vhinyo, leyi yimelaka ngati yakwe leyi hetisekeke leyi halatiweke loko a fa, kutani yi endla leswaku ntwanano lowuntshwa wu tirha.—1 Vakorinto 11:23-26; vona Xihondzo xo Rindza xa February 1, 1989, matluka 17-20.
Lava Vitaniweke, Lava Hlawuriweke Ni Lava Tshembekeke
16, 17. (a) Leswaku hinkwavo lava 144 000 va tisiwa eku vangameni, i yini lexi faneleke xi va ntiyiso hi vona? (b) I vamani “tihosi ta khume,” naswona ti ma khoma njhani masalela lama nga kona emisaveni ya ‘vamakwavo’ va Kreste?
16 Ku tirha ko sungula ka gandzelo ra Yesu ra nkutsulo ku endla leswaku swi koteka eka lava 144 000 ku vitaneriwa ku ya hanya etilweni ni ku hlawuriwa hi ku tswariwa hi moya hi Xikwembu. Kavula, leswaku va tisiwa eku vangameni, va fanele va ‘endla hinkwaswo leswi va nga swi kotaka leswaku va tiyisekisa ku vitaniwa ni ku hlawuriwa ka vona,’ naswona va fanele va tshembeka ku fikela eku feni. (2 Petro 1:10; Vaefesa 1:3-7; Nhlavutelo 2:10) Masalela lamatsongo ya vatotiwa lava ha riki emisaveni ma hlayisa vutshembeki bya wona hambiloko ma kanetiwa hi “tihosi ta khume” leti yimelaka mimfumo hinkwayo ya politiki. “Ti ta lwa ni Xinyimpfana,” ku vula ntsumi, “kambe, leswi xi nga Hosi ya tihosi ni Mufumi wa vafumi, Xinyimpfana xi ta ti hlula. Nakambe, lava vitaniweke, lava hlawuriweke naswona va tshembekeke, lava nga na xona, va ta ti hlula na vona.”—Nhlavutelo 17:12-14.
17 Ku hava lexi vafumi va vanhu va nga xi endlaka ku lwisana na Yesu, “Hosi ya tihosi,” hikuva u le tilweni. Kambe va kombisa rivengo eka masalela ya ‘vamakwavo’ wa yena lava ha riki emisaveni. (Nhlavutelo 12:17) Sweswo swi ta hela enyimpini ya Xikwembu ya Armagedoni, loko ku tiyisekisiwa ku hlula ka “Hosi ya tihosi” ni ‘vamakwavo’ va yona—“lava vitaniweke, lava hlawuriweke naswona va tshembekeke.” (Nhlavutelo 16:14, 16) Hi nkarhi lowu fanaka, Vakreste lava tswariweke hi moya va khomekile swinene. Xana va endla yini sweswi, emahlweni ko va va tisiwa eku vangameni hi Yehovha?
Hi Yihi Nhlamulo Ya Wena?
◻ I vamani lava Xikwembu xi va ‘tisaka eku vangameni ka le tilweni’?
◻ Swi vula yini ku ‘velekiwa hi Xikwembu’?
◻ ‘Moya wu nyikela vumbhoni’ hi ndlela yihi eka Vakreste van’wana?
◻ Lava tswariweke hi moya va nghenisiwe eka mintwanano yihi?
[Xifaniso lexi nga eka tluka 15]
Hi Pentekosta ya 33 C.E., ku nyikiwe vumbhoni bya leswaku ndlela yo ya eku vangameni ka le tilweni a yi pfuriwile