Ntshunxeko Lowu Vangamaka Eka Vana Va Xikwembu Ku Nga Ri Khale

“Ntumbuluko wu vekiwe ehansi ka vuhava . . . exisekelweni xa ntshembo, leswaku ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.”—VARHOMA 8:20, 21.

1. Xana gandzelo ra Yesu ri fanekiseriwe njhani hi Siku ro Phahlelana Mariyeta?

YEHOVHA u nyikele N’wana wakwe la tswariweke a ri swakwe a va gandzelo ra nkutsulo leri pfuleleke vanhu va 144 000 ndlela yo ya hanya etilweni, vanhu lavan’wana va kuma ntshembo lowu nga heriki wo hanya emisaveni. (1 Yohane 2:1, 2) Hilaha swi kombisiweke hakona eka xihloko lexi hundzeke, gandzelo ra Yesu malunghana ni Vakreste lava tswariweke hi moya a ri fanekiseriwa hi loko muprista lonkulu wa le Israyele a nyikela nkuzi yi va gandzelo ra ku rivaleriwa ka swidyoho swa yena n’wini, ndyangu wa yena ni nyimba ya Levhi hi Siku ro Phahlelana Mariyeta lembe rin’wana ni rin’wana. Hi siku rero, a a nyikela mbuti yi va gandzelo ra swidyoho swa Vaisrayele lavan’wana hikwavo, tanihi leswi ni gandzelo ra Kreste ri nga ta pfuna vanhu hinkwavo. Mbuti leyi hanyaka a yi rhwala swidyoho hinkwaswo swa vanhu swa lembe leri hundzeke hi ndlela yo fanekisela, kutani yi nyamalala emananga.a—Levhitika 16:7-15, 20-22, 26.

2, 3. Ma vula yini marito ya Pawulo lama tsariweke eka Varhoma 8:20, 21?

² Endzhaku ko hlamusela ntshembo wa vanhu lava a va ta va “vana va Xikwembu” etilweni, muapostola Pawulo u hlamuserile a ku: “Ku langutela hi mahlongati ka ntumbuluko ku rindzele ku hlavuteriwa ka vana va Xikwembu. Hikuva ntumbuluko wu vekiwe ehansi ka vuhava, ku nga ri hi ku rhandza ka wona, kambe hikwalaho ka loyi a wu vekeke, exisekelweni xa ntshembo, leswaku ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.” (Varhoma 8:14, 17, 19-21) Xana marito lawa ma vula yini ke?

³ Loko tata wa hina Adamu a vumbiwile a ri munhu la hetisekeke, a a ri “n’wana wa Xikwembu.” (Luka 3:38) Hikwalaho ka ku dyoha, u ve “evuhlongeni bya ku onhaka” kutani a hundzisela xiyimo lexi erixakeni ra vanhu. (Varhoma 5:12) Xikwembu xi pfumelele leswaku vanhu va tswariwa va langutane ni “vuhava” hikwalaho ka ku nga hetiseki loku va tswariweke na kona, kambe xi va nyike ntshembo hi “mbewu,” Yesu Kreste. (Genesa 3:15; 22:18; Vagalatiya 3:16) Nhlavutelo 21:1-4 yi vulavula hi nkarhi lowu ‘rifu, ku kolola, xirilo ni xitlhavi swi nga ta va swi nga ha ri kona.’ Tanihi leswi lexi xi nga xitshembiso lexi tshembisiwaka “vanhu,” xa hi tiyisekisa leswaku vandla lerintshwa ra laha misaveni ra vanhu lava hanyaka ehansi ka vulawuri bya Mfumo ri ta va ni mianakanyo ni mimiri leyi nga ta va yi hanye kahle naswona ri ta hanya hilaha ku nga heriki tanihi “vana va Xikwembu” va laha misaveni. Hi nkarhi wa Mfumo wa Kreste wa Gidi ra Malembe, vanhu lava yingisaka va ta “ntshunxiwa evuhlongeni bya ku onhaka.” Loko va tikombise va ri lava tshembekaka eka Yehovha eka ndzingo wo hetelela, va ta ntshunxekela makumu eka xidyoho ni rifu leswi va tswariweke na swona. (Nhlavutelo 20:7-10) Kutani lava nga emisaveni va ta “va ni ntshunxeko lowu vangamaka wa vana va Xikwembu.”

Va Ri “Tana!”

4. Swi vula yini ku “[nwa] mati ya vutomi mahala”?

⁴ Vona ntshembo lowu hlamarisaka lowu vekiweke emahlweni ka vanhu! A swi hlamarisi leswi Vakreste lava tswariweke hi moya lava ha riki emisaveni va rhangelaka hi ku gingiriteka eku byeleni ka van’wana ha wona! Tanihi leswi masalela lama totiweke ma nga ta va swirho swa “mutekiwa” wa Xinyimpfana lexi vangamaka, Yesu Kreste, ma katseka eku hetisekeni ka marito ya vuprofeta lama nge: “Moya ni mutekiwa va hambeta va ku: ‘Tana!’ Naswona mani na mani la swi twaka a a vule a ku: ‘Tana!’ Mani na mani la khomiweke hi torha a a te; mani na mani la swi navelaka a a nwe mati ya vutomi mahala.” (Nhlavutelo 21:2, 9; 22:1, 2, 17) E-e, lava nga ta pfuneka eka gandzelo ra nkutsulo ra Yesu a hi vatotiwa lava 144 000 ntsena. Moya wa Xikwembu wu hambeta wu tirhisa masalela ya ntlawa wa mutekiwa emisaveni leswaku wu ku “Tana.” Un’wana ni un’wana loyi a swi twaka, loyi a nga ni torha ra vululami u rhambiwa ku vula a ku “Tana,” a tilunghiselela ku pfuniwa hi lunghiselelo lerikulu ra Yehovha ra ku ponisa.

5. I vamani lava Timbhoni ta Yehovha ti tsakaka ku va na vona exikarhi ka tona?

⁵ Timbhoni ta Yehovha ti ni ripfumelo eka lunghiselelo ra Xikwembu ra vutomi ha Yesu Kreste. (Mintirho 4:12) Ta tsaka ku va ni vanhu va timbilu letinene exikarhi ka tona, lava navelaka ku dyondza hi ta swikongomelo swa Xikwembu ni ku endla ku rhandza ka xona. Hinkwavo lava navelaka ku ‘ta va ta nwa mati ya vutomi mahala’ ‘enkarhini lowu wa makumu’ va amukeleka eTiholweni ta tona ta Mfumo.—Daniyele 12:4.

Ku Hundzuka Loku Veke Kona Hi Ku Famba Ka Nkarhi

6. Moya wa Xikwembu a wu tirha njhani eka malandza ya Yehovha eminkarhini yo hambana-hambana?

⁶ Xikwembu xi ni nkarhi wo hetisisa swikongomelo swa xona, naswona leswi swi khumba ndlela leyi xi khomaka vanhu ha yona. (Eklesiasta 3:1; Mintirho 1:7) Hambileswi moya wa Xikwembu wu xikeleke eka malandza ya xona ya le minkarhini ya le mahlweni ka Vukreste, a ma tswariwanga ma va vana va xona va moya. Hambiswiritano, ku sungula hi Yesu, ku fike nkarhi wa Yehovha wo tirhisa moya lowo kwetsima ku tswala vavanuna ni vavasati lava tinyiketeleke lava a va ta dya ndzhaka ya le tilweni. Naswona ku vuriwa yini hi siku ra hina? Moya lowu fanaka wa tirha eka “tinyimpfu tin’wana” ta Yesu, kambe a wu ti susumeteli ku va ni ntshembo ni ku navela ku ya hanya etilweni. (Yohane 10:16) Leswi Xikwembu xi va nyikeke ntshembo wo hanya hilaha ku nga heriki emisaveni ya paradeyisi, hi ntsako va seketela masalela lama totiweke eku nyikeleni ka vumbhoni hi nkarhi lowu wa ku hundzuka ka misava ya khale yi va misava leyintshwa yo lulama ya Xikwembu.—2 Petro 3:5-13.

7. I ntirho wihi wa ntshovelo lowu Swichudeni swa Bibele a swi tikarhatela wona, kambe a swi tiva yini hi paradeyisi?

⁷ Xikwembu xi sungule ‘ku tisa vana vo tala eku vangameni’ loko ku chuluriwa moya lowo kwetsima hi Pentekosta ya 33 C.E., naswona handle ko kanakana xi veke nkarhi wo heta ku hlawuriwa ka “Israyele wa Xikwembu” loyi ntsengo wa yena wu nga 144 000. (Vaheveru 2:10; Vagalatiya 6:16; Nhlavutelo 7:1-8) Ku sukela hi 1879, magazini lowu a wu vulavula ngopfu hi ntirho wo tshovela lowu khumbaka Vakreste lava totiweke. Kambe Swichudeni swa Bibele (leswi sweswi swi vuriwaka Timbhoni ta Yehovha) nakambe a swi swi tiva leswaku Matsalwa ma tamele ntshembo wo hanya hilaha ku nga heriki emisaveni ya paradeyisi. Hi xikombiso, nkandziyiso wa Xihondzo xo Rindza (xa Xinghezi) wa July 1883 wu te: “Loko Yesu a tlhome mfumo wakwe, a herisa vuhomboloki ni swin’wana, misava leyi yi ta va paradeyisi, . . . naswona hinkwavo lava nga emasirheni ya vona va ta huma va nghena eka yona. Naswona va nga hanya eka yona hilaha ku nga heriki loko va yingisa milawu ya yona.” Hi ku famba ka nkarhi, ku tshoveriwa ka vatotiwa ku hungutekile, kutani hakatsongo-tsongo vanhu lava a va nga ri na ntshembo wa ku ya hanya etilweni va hlengeletiwile va nghena enhlengeletanweni ya Yehovha. Hi nkarhi lowu fanaka, Xikwembu xi nyike malandza ya xona lama totiweke, Vakreste lava tswariweke ra vumbirhi, ku twisisa lokukulu.—Daniyele 12:3; Vafilipiya 2:15; Nhlavutelo 14:15, 16.

8. Ku twisisa ntshembo wa ku hanya emisaveni ku ndlandlamuke njhani eku sunguleni ka va-1930?

⁸ Lava nga ni ntshembo wa ku hanya emisaveni a va ri karhi va hlanganyela ni vandlha ra Vukreste, ngopfu-ngopfu ku sukela hi 1931. Hi lembe rero, Yehovha u voningele masalela ya Vakreste lava tswariweke hi moya leswaku va vona leswaku Ezekiyele ndzima 9 yi vulavula hi ntlawa lowu wa laha misaveni, lowu fungheriwaka ku ponela emisaveni leyintshwa ya Xikwembu. Hi 1932 ku gimetiwe hileswaku vanhu vo tano lava fanaka ni tinyimpfu namuntlha a va fanekiseriwa hi nakulobye wa Yehu, ku nga Yonadabu (Yehonadabu). (2 Tihosi 10:15-17) Hi 1934, swi vekiwe erivaleni leswaku “Vayonadabu” va fanele va “tinyiketela” eka Xikwembu. Hi 1935, “vunyingi lebyikulu” kumbe “ntshungu lowukulu”—lowu eku sunguleni a ku anakanyiwa leswaku i ntlawa wa vumbirhi wa moya lowu a wu ta va “vanakulobye” va mutekiwa wa Kreste etilweni—wu lemukiwe wu ri tinyimpfu tin’wana leti nga ni ntshembo wa ku hanya laha misaveni. (Nhlavutelo 7:4-15; 21:2, 9; Pisalema 45:14, 15) Naswona ngopfu-ngopfu ku sukela hi 1935, vatotiwa va rhangerile eku lavisiseni ka vanhu lava lulameke lava navelaka ku hanya hilaha ku nga heriki emisaveni ya paradeyisi.

9. Endzhaku ka 1935, ha yini Vakreste van’wana va tshike ku dya swifanekiselo eXilalelweni xa Hosi?

⁹ Endzhaku ka 1935, Vakreste van’wana lava a va dya xinkwa ni ku nwa vhinyo eXilalelweni xa Hosi va tshike ku dya. Ha yini? Hikuva va swi lemukile leswaku a va ri ni ntshembo wa ku hanya emisaveni, hayi etilweni. Wansati un’wana loyi a khuvuriweke hi 1930 u te: “Hambileswi [ku dya] a swi tekiwa swi fanerile, ngopfu-ngopfu eka vatirheli va nkarhi hinkwawo lava hisekaka, mina a ndzi nga kholwi leswaku ndzi ni ntshembo wa ku hanya etilweni. Kutani, hi 1935, hi hlamuseriwe kahle leswaku a ku hlengeletiwa ntshungu lowukulu lowu nga ni ntshembo wa ku hanya hilaha ku nga heriki emisaveni. Vo tala va hina swi hi tsakisile ku twisisa leswaku a hi ri swirho swa ntshungu wolowo lowukulu, kutani hi tshike ku dya swifanekiselo.” Ni tinhlamuselo ta leswi a swi tsariwa etibukwini ta Vukreste ti cincile. Tanihi leswi leto sungula a ti tsaleriwa ngopfu valandzeri va Yesu lava tswariweke hi moya, ku sukela hi 1935 Xihondzo xo Rindza ni tibuku tin’wana ta “hlonga ro tshembeka” ti phamele swakudya swa moya leswi a swi enerisa swilaveko swa vatotiwa ni vanakulobye va vona lava nga ni ntshembo wo hanya laha misaveni.—Matewu 24:45-47.

10. Mutotiwa loyi a nga ha tshembekiki a nga siviwa njhani?

¹⁰ A hi nge mutotiwa u hundzuka la nga tshembekiki. Xana wa siviwa ke? Pawulo u kombise leswaku wa siviwa eka nhlamuselo yakwe ya mutlhwari wo fanekisela. (Varhoma 11:11-32) Loko munhu la tswariweke hi moya a fanele a siviwa, handle ko kanakana Xikwembu xi nyika un’wana xirhambo xo ya etilweni, loyi ripfumelo ra yena ri veke xikombiso loko a ri karhi a xi endlela ntirho wo kwetsima malembe yo tala.—Ringanisa Luka 22:28, 29; 1 Petro 1:6, 7.

Hi Ni Swivangelo Swo Tala Swa Ku Tlangela

11. Ku nga khathariseki muxaka wa ntshembo wa hina, Yakobo 1:17 yi hi tiyisekisa hi yini?

¹¹ Kwihi ni kwihi laha hi tirhelaka Yehovha hi ku tshembeka hi ri kona, u ta enerisa swilaveko swa hina ni ku navela ka hina loku faneleke. (Pisalema 145:16; Luka 1:67-74) Hambiloko hi ri ni ntshembo wa ntiyiso wa ku hanya etilweni kumbe hi ri ni wa ku hanya emisaveni, hi ni swivangelo swo tala swo tlangela Xikwembu. Minkarhi hinkwayo xi endla swilo leswi pfunaka lava xi rhandzaka. Mudyondzisiwa Yakobo u vule leswaku “nyiko yin’wana ni yin’wana leyinene ni nyiko yin’wana ni yin’wana leyi hetisekeke yi huma ehenhla, hikuva yi xika hi le ka Tata wa mavoningo ya le xibakabakeni,” Yehovha Xikwembu. (Yakobo 1:17) A hi xiyeni tinyiko ni mikateko yi nga ri yingani yo tano.

12. Ha yini hi nga vulaka leswaku Yehovha u nyike un’wana ni un’wana wa malandza yakwe ntshembo lowu hlamarisaka?

¹² Yehovha u nyike nandza wakwe un’wana ni un’wana la tshembekaka ntshembo lowu hlamarisaka. Van’wana u va rhambele ku ya hanya etilweni. Yehovha u nyike timbhoni takwe ta le mahlweni ka Vukreste ntshembo lowu vangamaka wa ku pfuxeriwa ku hanya hilaha ku nga heriki emisaveni. Hi xikombiso, Abrahama a a ri ni ripfumelo eku pfuxiweni ka lava feke, kutani u rindzele “muti lowu nga ni masungulo lama tiyeke”—Mfumo wa le tilweni lowu a nga ta pfuxeriwa ku ya hanya emisaveni ehansi ka wona. (Vaheveru 11:10, 17-19) Nakambe, enkarhini lowu wa makumu, Xikwembu xi nyika vanhu va timiliyoni ntshembo wo hanya hilaha ku nga heriki emisaveni ya paradeyisi. (Luka 23:43; Yohane 17:3) Kunene, mani na mani loyi Yehovha a n’wi nyikeke ntshembo wo tano lowu hlamarisaka u fanele a wu tlangela swinene.

13. Moya lowo kwetsima wa Xikwembu wu tirhe njhani eka vanhu va xona?

¹³ Yehovha u nyika vanhu vakwe moya wakwe lowo kwetsima tanihi nyiko. Vakreste lava nyikiweke ntshembo wa le tilweni va totiwe hi moya lowo kwetsima. (1 Yohane 2:20; 5:1-4, 18) Kambe malandza ya Xikwembu lama nga ni ntshembo wo hanya emisaveni ma pfuniwa hi moya ni ku kongomisiwa hi wona. Un’wana wa vona a ku ri Muxe, loyi a a ri ni moya wa Yehovha, kun’we ni vavanuna va 70 lava vekiweke leswaku va n’wi pfuna. (Tinhlayo 11:24, 25) Hi ku susumetiwa hi moya lowo kwetsima, Besalele u ve mutshila lonkulu eka tabernakela ya Israyele. (Eksoda 31:1-11) Moya wa Xikwembu wu ve ehenhla ka Gidiyoni, Yefta, Samsoni, Davhida, Eliya, Elixa ni van’wana. Hambileswi vanhu lava va minkarhi ya khale va nga ta ka va nga yisiwi eku vangameni ka le tilweni, va kongomisiwile ni ku pfuniwa hi moya lowo kwetsima, hilaha swi nga hakona hi tinyimpfu tin’wana ta Yesu namuntlha. Kutani ku va ni moya wa Xikwembu a swi vuli leswaku hi ni xirhambo xo ya etilweni. Kambe moya wa Yehovha wa hi kongomisa, wu hi pfuna ku chumayela ni ku hetisisa swiavelo swin’wana leswi hi nyikiweke swona hi Xikwembu, wu hi nyika matimba lama nga tolovelekangiki, naswona wu endla leswaku hi va ni mihandzu ya rirhandzu, ntsako, ku rhula, ku lehisa mbilu, musa, vunene, ripfumelo, ku verhama ni ku tikhoma. (Yohane 16:13; Mintirho 1:8; 2 Vakorinto 4:7-10; Vagalatiya 5:22, 23) Xana a hi fanelanga hi yi nkhensa nyiko leyi ya tintswalo leyi humaka eka Xikwembu?

14. Hi pfuneka njhani eka tinyiko ta Xikwembu ta vutivi ni vutlhari?

¹⁴ Vutivi ni vutlhari i tinyiko leti humaka eka Xikwembu leti hi faneleke hi ti tlangela, hambiloko hi ri ni ntshembo wa ku hanya etilweni kumbe emisaveni. Ku tiva Yehovha hi ku kongoma swi hi pfuna ku “tiyiseka hi swilo swa nkoka swinene” ni “[ku] famba hi mukhuva lowu fanelaka eka Yehovha leswaku [hi] n’wi tsakisa hi ku helela.” (Vafilipiya 1:9-11; Vakolosa 1:9, 10) Vutlhari bya Xikwembu i xisirhelelo ni vukongomisi evuton’wini. (Swivuriso 4:5-7; Eklesiasta 7:12) Vutivi ni vutlhari bya ntiyiso byi sekeriwe eRitweni ra Xikwembu, naswona vatotiwa lava nga riki vangani lava ha riki kona va tsakisiwa swinene hi leswi ri swi vulaka malunghana ni ntshembo wa vona wa ku hanya etilweni. Hambiswiritano, ku rhandza Rito ra Xikwembu ni ku ri twisisa swinene a hi ndlela ya Xikwembu yo kombisa leswaku hi rhamberiwe ku ya hanya etilweni. Vavanuna vo tanihi Muxe na Daniyele va tsale ni swiyenge swo karhi swa Bibele, kambe va ta pfuxeriwa ku hanya emisaveni. Hambiloko hi ri ni ntshembo wo hanya etilweni kumbe emisaveni, hinkwerhu ka hina hi nyikiwa swakudya swa moya hi “hlonga ro tshembeka ni ro tlhariha” leri amukeriweke hi Yehovha. (Matewu 24:45-47) Hinkwerhu ha byi tlangela swinene vutivi lebyi hi byi kumeke hi ndlela yoleyo!

15. Hi yihi yin’wana ya tinyiko letikulu ta Xikwembu, naswona u yi languta njhani?

¹⁵ Yin’wana ya tinyiko ta Xikwembu letikulu i lunghiselelo ra rirhandzu ra gandzelo ra nkutsulo ra Yesu, leri hi pfunaka hambiloko hi ri ni ntshembo wa ku hanya etilweni kumbe emisaveni. Xikwembu xi rhandzile misava ya vanhu “swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Naswona rirhandzu ra Yesu ri n’wi susumetele “ku nyikela moya-xiviri wakwe wu va nkutsulo wa lavo tala.” (Matewu 20:28) Hilaha muapostola Yohane a hlamuseleke hakona, Yesu Kreste “i gandzelo ra ku vuyelelana ra swidyoho swa hina [vatotiwa], kambe ku nga ri swa hina ntsena, ni swa misava hinkwayo.” (1 Yohane 2:1, 2) Kutani hinkwerhu hi fanele hi ri tlangela swinene lunghiselelo leri ra rirhandzu ra ku kutsuleriwa evuton’wini lebyi nga heriki.b

Xana U Ta Va Kona Ke?

16. Hi xihi xiendlakalo xa nkoka lexi nga ta tsundzukiwa loko dyambu ri perile hi April 11, 1998, naswona i vamani lava faneleke va va kona?

¹⁶ Ku tlangela nkutsulo lowu lunghiseleriweke hi Xikwembu hi ku tirhisa N’wana wa xona, swi fanele swi hi susumetela ku va kona eTiholweni ta Mfumo kumbe etindhawini tin’wana laha Timbhoni ta Yehovha ti nga ta va ti hlangane kona loko dyambu ri perile hi April 11, 1998, ti ta tsundzuka rifu ra Kreste. Loko a simeka nkhuvo lowu ni vaapostola vakwe lava tshembekaka evusikwini byo hetelela bya ku hanya ka yena laha misaveni, Yesu u te: “Tshamani mi ri karhi mi endla leswi leswaku mi ndzi tsundzuka.” (Luka 22:19, 20; Matewu 26:26-30) Masalela lama nga riki mangani lama saleke ma ta dya xinkwa xo kala comela, lexi fanekiselaka miri wa Yesu wa nyama lowu a wu nga ri na xidyoho, ma nwa ni vhinyo yo tshwuka leyi nga pfanganisiwangiki na nchumu, leyi fanekiselaka ngati yakwe leyi halatiweke tanihi gandzelo. I Vakreste lava tswariweke hi moya ntsena lava faneleke va dya, hikuva hi vona ntsena lava nga eka ntwanano lowuntshwa ni le ka ntwanano wa Mfumo, naswona va tiyisekisiwa hi moya lowo kwetsima wa Xikwembu leswaku va ni ntshembo wa ku ya etilweni. Vanhu van’wana va timiliyoni va ta va kona tanihi vahlaleri lava nga ni xichavo lava tlangelaka rirhandzu leri kombisiweke hi Xikwembu na Kreste malunghana ni gandzelo ra Yesu leri endlaka leswaku ku hanya hi masiku swi koteka.—Varhoma 6:23.

17. Hi fanele hi tsundzuka yini malunghana ni ku totiwa hi moya?

¹⁷ Tidyondzo ta khale ta vukhongeri, mintlhaveko ya matimba leyi vangiwaka hi rifu ra murhandziwa, swiphiqo swa namuntlha leswi fambisanaka ni vutomi bya laha misaveni, kumbe ku titwa onge Yehovha u va nyike nkateko wo karhi lowu hlawulekeke, swi nga susumetela van’wana ku va ni ntshembo lowu hoxeke wa leswaku va rhamberiwe ku ya hanya etilweni. Kambe hinkwerhu hi fanele hi tsundzuka leswaku Matsalwa a ma hi lerisi ku dya swifanekiselo swa Xitsundzuxo leswaku hi kombisa ku tlangela ka hina gandzelo ra nkutsulo ra Kreste. Ku tlula kwalaho, ku totiwa hi moya “a swi titsheganga hi loyi a navelaka hambi ku ri hi loyi a tsutsumaka, kambe swi titshege hi Xikwembu,” lexi tswaleke Yesu a va N’wana wa moya ni lexi tisaka vana van’wana va 144 000 ntsena eku vangameni.—Varhoma 9:16; Esaya 64:8.

18. Hi yihi mikateko leyi rindzeleke vunyingi bya lava tirhelaka Yehovha namuntlha?

¹⁸ Ku hanya hilaha ku nga heriki emisaveni ya paradeyisi i ntshembo lowu Xikwembu xi wu nyikeke vunyingi lebyikulu bya vanhu lava tirhelaka Yehovha emasikwini lawa ya makumu. (2 Timotiya 3:1-5) Ku nga ri khale, va ta tsakela paradeyisi leyi leyi hlamarisaka. Tihosana hi nkarhi wolowo ti ta fambisa timhaka ta le misaveni ehansi ka vulawuri bya le tilweni. (Pisalema 45:16) Ku ta va ni swiyimo swo rhula loko vaaki va misava va fambisana ni milawu ya Xikwembu ni ku dyondza leswi engetelekeke hi tindlela ta Yehovha. (Esaya 9:6, 7; Nhlavutelo 20:12) Ku ta va ni ntirho wo tala lowu nga ta endliwa wo aka makaya ni ku fuma misava. (Esaya 65:17-25) Naswona anakanya hi ku hlanganisiwa loku tsakisaka ka mindyangu loko vafi va tlhela va hanya! (Yohane 5:28, 29) Endzhaku ka ndzingo wo hetelela, vuhomboloki hinkwabyo byi ta va byi nga ha ri kona. (Nhlavutelo 20:7-10) Endzhaku misava yi ta talela makumu hi vanhu lava hetisekeke lava nga “ntshunxiwa evuhlongeni bya ku onhaka kutani [va] va ni ntshunxeko lowu vangamaka wa vana va Xikwembu.”

[Tinhlamuselo ta le hansi]

A Wu Ta Hlamurisa Ku Yini Ke?

◻ Ku “[nwa] mati ya vutomi mahala” swi vula yini?

◻ Hambiloko hi ri ni ntshembo wa ku hanya etilweni kumbe emisaveni, hi ni swivangelo swihi swo tlangela Xikwembu?

◻ Hi wihi nkhuvo wa lembe na lembe lowu hinkwerhu hi faneleke hi hlanganyela eka wona?

◻ Vumundzuku byi va khomele yini vo tala va vanhu va Yehovha?

[Xifaniso lexi nga eka tluka 18]

Vanhu va timiliyoni va ‘nwa mati ya vutomi mahala.’ Xana u un’wana wa vona ke?