A Dyondzisa Nikodema Nivusiku

Loko a ha ri eYerusalema ku ya tlangela paseka ya lembe ra 30 C.E., Yesu u endla masingita lamakulu. Sweswo swi endle leswaku vanhu vo tala va va ni ripfumelo eka yena. Sweswo swi tsakise Nikodema lowa Mufarisi tlhelo xirho xa khotonkulu ya Vayuda leyi vuriwaka Sanedri. Leswi a a lava ku dyondza swo tala, u vhakela Yesu nivusiku kumbexana hi leswi a a chava leswaku ndhuma yakwe eka varhangeri lavan’wana va Vayuda yi nga onhaka loko vo n’wi vona.

Nikodema u ri: “Rabi, ha swi tiva leswaku u huma eka Xikwembu, hikuva a nga kona loyi a nga endlaka masingita lawa u ma endlaka loko a nga seketeriwi hi Xikwembu.” Yesu u hlamula Nikodema hi ku n’wi byela leswaku munhu a nge ngheni eMfun’wini wa Xikwembu loko a nga “velekiwanga ra vumbirhi.”—Yohane 3:2, 3.

Nikodema a vutisa a ku: “Munhu a nga velekiwa njhani se a kurile? Xana a nga tlhelela ekhwirini ra mana wakwe leswaku a tlhela a velekiwa?”—Yohane 3:4.

Sweswo a swi vuli swona ku velekiwa ra vumbirhi. Yesu a hlamula a ku: “Hakunene ndzi tiyisile ndzi ri eka wena, munhu a nge ngheni eMfun’weni wa Xikwembu a nga velekiwanga hi mati ni moya.” (Yohane 3:5) Loko Yesu a khuvuriwa naswona moya lowo kwetsima wu xikela ehenhla ka yena hi ndlela yoleyo a a velekiwa “hi mati ni moya.” Hi nkarhi wolowo ku tlhele ku twala rito leri humaka ematilweni, ri ku: “Loyi i N’wananga, la rhandzekaka, loyi ndzi n’wi amukeleke.” (Matewu 3:16, 17) Hi ndlela yoleyo Xikwembu xi tivise leswaku xi tise Yesu tanihi n’wana wa moya loyi a nga ni ntshembo wo nghena eMfun’wini wa le tilweni. Endzhakunyana hi Pentekosta ya 33 C.E., van’wana lava khuvuriweke va ta chululeriwa moya lowo kwetsima naswona hi ndlela yoleyo va ta va va velekiwa nakambe tanihi vana va moya va Xikwembu.—Mitirho 2:1-4.

Swa n’wi tikela Nikodema ku twisisa leswi Yesu a n’wi dyondzisaka swona mayelana ni Mfumo. Kutani Yesu u n’wi hlamusela hi vuenti mayelana ni xikhundlha xakwe tanihi N’wana wa Xikwembu la nga munhu wa nyama. Yesu u ri: “N’wana wa munhu u ta hayekiwa emhandzini hilaha Muxe a hayekeke nyoka hakona ehenhla ka mhandzi emananga, leswaku loyi a pfumelaka eka yena a ta kuma vutomi lebyi nga heriki.”—Yohane 3:14, 15.

Khale loko Vaisrayele volavo va lumiwa hi nyoka leyi nga ni vuxungu a va fanele va languta nyoka ya koporo leswaku va hola. (Tinhlayo 21:9) Hilaha ku fanaka, vanhu hinkwavo va fanele va va ni ripfumelo eka N’wana wa Xikwembu leswaku va ponisiwa eka rifu ni leswaku va kuma vutomi lebyi nga heriki. Loko Yesu a hlamusela matitwelo ya Yehovha emhakeni leyi, u byele Nikodema a ku: “Hikuva Xikwembu xi rhandze misava swinene lerova xi nyikela hi N’wana wa xona loyi a tswariweke a ri swakwe, leswaku loyi a pfumelaka eka yena a nga lovisiwi kambe a kuma vutomi lebyi nga heriki.” (Yohane 3:16) Hiyonamhaka eka tin’hweti ta tsevu endzhaku ka loko Yesu a sungule vutirheli byakwe, u swi veke erivaleni ku hi yena ndlela ya leswaku vanhu va ponisiwa.

Yesu u byela Nikodema a ku: “Xikwembu a xi rhumanga N’wana wa xona emisaveni leswaku a ta yi avanyisa.” Leswi swi vula leswaku a nga rhumiwanga leswaku a ta avanyisa vubihi ni ku endla leswaku vanhu hinkwavo va lovisiwa. Ematshan’wini ya sweswo, u rhumiwe leswaku “a ta yi ponisa.”—Yohane 3:17.

Leswi Nikodema a a chava, u ye eka Yesu nivusiku. Kutani swa tsakisa leswi Yesu a gimetaka bulo ra vona hi ku vula a ku: “Leswi nga ta endla leswaku vanhu va avanyisiwa hi leswi: ku vonakala [loku Yesu a ku kombiseke hi vutomi ni tidyondzo takwe] ku te emisaveni, kambe vanhu va rhandze munyama ku ri ni ku rhandza ku vonakala hikuva va endla swilo swo biha. Hikuva loyi a hanyaka hi swilo swo biha u venga ku vonakala naswona a nga ti eku vonakaleni, leswaku mitirho yakwe yi nga vonaki. Kambe loyi a endlaka leswinene u ta eku vonakaleni, leswaku mitirho yakwe yi ta vonaka leswaku yi fambisana ni ku rhandza ka Xikwembu.”—Yohane 3:19-21.

Se swi salele Mufarisi tlhelo mudyondzisi wa le Israyele, Nikodema leswaku a tirhisa leswi Yesu a n’wi byeleke swona mayelana ni ntirho wa Yesu eka xikongomelo xa Xikwembu.