Ndzima 22

Ku Vitaniwa Vadyondzisiwa Va Mune

ENDZHAKU ka matshalatshala yo dlaya Yesu edorobeni ra ka vona ra Nazareta, u rhurhele emutini wa Kapernawume ekusuhi na Lwandle ra Galeliya. Leswi swi hetisisa vuprofea byin’wana bya Esaya. Hi byona byi vhumbeke leswaku vanhu va Galeliya lava va tshamaka kusuhi na lwandle a va ta vona ku vonakala lokukulu.

Loko Yesu a ri karhi a hetisisa ntirho wakwe lowu nga ni ku vonakala wa Mfumo kwalaho, u vitana vadyondzisiwa vakwe va mune. Vona a va fambe na yena eku sunguleni kambe va tlhelela endzhaku entirhweni wa vona wa ku phasa tinhlampfi loko va vuye na Yesu hi le Yudiya. Hi ku fanana, sweswi Yesu u lavana na vona, tanihi leswi ku nga nkarhi wa leswaku a va ni vapfuni lava tiyeke va nkarhi hinkwawo, lava a nga va letelaka ku yisa vutirheli emahlweni endzhaku ka loko a fambile.

Kute loko Yesu a ri karhi a famba eribuweni ra lwandle kutani a vona Simoni Petro ni vanghana vakwe va ri karhi va hlantswa tinkoka ta vona, a ya eka vona. A khandziya byatso bya Petro kutani a n’wi kombela leswaku a byi humeselanyana ehandle. Loko va humile mpfhukanyana, Yesu a tshama ebyatsweni kutani a sungula ku dyondzisa ntshungu eribuweni.

Endzhaku ka sweswo, Yesu u byela Petro a ku: “Tlutelani exidziveni, mi peta tinkoka ta n’wina kona leswaku mi phasa.”

“N’wini wa nga,” ku hlamula Petro, “Hi tirhile ngopfu vusiku hinkwabyo, hi nga phasi nchumu; kambe hi ku vula ka wena, ndzi ta peta tinkoka.”

Loko tinkoka ti petiwile, va phasa tinhlampfi leto tala ngopfu lerova tinkoka ti sungula ku handzuka. Hi ku anghwetla, vavanuna va koweta vatirhi-kulobye lava a va ri ebyatsweni byin’wana kusuhi na vona leswaku va ta va ta pfuna. Hi ku hatlisa mabyatso hinkwawo a ma tele lerova ma sungula ku mbombomela. Hi ku vona leswi, Petro a nkhinsama emahlweni ka Yesu kutani a ku: “Suka ka mina Hosi, hikuva ndzi mudyohi.”

“U nga chavi,” ku hlamula Yesu. “Ku sukela sweswi u ta va la phasaka vanhu.”

Nakambe Yesu u rhamba Andriya makwavo wa Petro. A va khutaza a ku: “Ndzi landzeni, ndzi ta mi endla vaphasi va vanhu.” Vaphasi-kulobye va tinhlampfi Yakobo na Yohane, vana va Zebediya, va nyikiwe xirhambo lexi fanaka, kutani na vona va xi amukela handle ko kanakana. Kutani lava va mune va tshika bindzu ra vona ra ku phasa tinhlampfi kutani va va valandzeri va mune vo sungula lava tiyeke va Yesu, va nkarhi hinkwawo. Luka 5:1-11; Matewu 4:13-22; Marka 1:16-20; Esaya 9:1, 2.

▪ Hikwalaho ka yini Yesu a vitana vadyondzisiwa va yena leswaku va n’wi landzela, naswona i vamani?

▪ I singita rihi leri chavisaka Petro?

▪ I muxaka wihi wa ku phasa tinhlampfi lowu Yesu a rhambelaka vadyondzisiwa vakwe ku wu endla?