Vadyondzisiwa Va Mune Va Ta Va Vaphasi Va Vanhu

Endzhaku ka loko vanhu va le Nazareta va ringete ku dlaya Yesu, u rhurhele emutini wa Kapernawume ekusuhi ni lwandle ra Galeliya leri vuriwaka “tiva ra Genesareta.” (Luka 5:1) Leswi swi hetisisa vuprofeta lebyi nga eka buku ya Esaya bya leswaku vanhu va le Galeliya lava tshamaka etlhelo ka lwandle, a a va ta vona ku vonakala lokukulu.—Esaya 9:1, 2.

Loko Yesu a ri eGaleliya, u ye emahlweni a chumayela leswaku “Mfumo wa matilo wu tshinele.” (Matewu 4:17) Yesu u kume vadyondzisiwa vakwe va mune. A va famba na yena eku sunguleni kambe loko va vuya hi le Yudiya va tlhelele eka ntirho wa vona wo phasa tihlampfi. (Yohane 1:35-42) Kambe sweswi se a ku ri nkarhi wa leswaku va tshama va ri na Yesu nkarhi hinkwawo leswaku a ta va letela ku yisa emahlweni ntirho wo chumayela loko a nga ha ri kona.

Loko Yesu a ri karhi a famba etlhelo ka lwandle u vone Simoni Petro ni buti wa yena Andriya ni van’wana lava tirhaka na vona va ri karhi va lunghisa tinete ta vona. Yesu u fike a khandziya xikepe xa Petro kutani a n’wi kombela leswaku a xi nghenisanyana etiveni. Loko se va ri ekulenyana, Yesu u tshame ehansi kutani a sungula ku dyondzisa ntshungu lowu a wu hlengeletane etlhelo ka lwandle ntiyiso hi Mfumo.

Endzhaku ka sweswo, Yesu u byele Petro a ku: “Yanani laha ku nga enta, mi peta tinete ta n’wina mi ta phasa.” Kambe Petro u hlamula a ku: “Mudyondzisi, hi tirhe vusiku hinkwabyo kambe a hi phasanga nchumu, kambe ndzi ta peta hikwalaho ka leswi u vulaka tano.”—Luka 5:4, 5. 

Va pete tinete kutani va sungula ku phasa tihlampfi to tala lerova tinete ta vona ti sungula ku handzuka! Hi ku hatlisa, vavanuna lava va kombela ku pfuniwa eka lava va nga eka xikepe lexi nga ekusuhi. Swi nga si ya kwihi, swikepe haswimbirhi leswi a swi tele hi tihlampfi swi sungule ku mbombomela! Loko Petro a vona sweswo, a khinsama emahlweni ka Yesu, a ku: “Suka eka mina Hosi, hikuva ndzi mudyohi.” Yesu a hlamula a ku: “U nga chavi. Ku sukela sweswi u ta phasa vanhu va ri karhi va hanya.”—Luka 5:8, 10.

Yesu a byela Petro na Andriya a ku: “Ndzi landzeleni, ndzi ta mi endla vaphasi va vanhu.” (Matewu 4:19) U tlhele a byela Yakobo na Yohane vana va Zebediya lava na vona a va ri eku phaseni ka tihlampfi. Xikan’wekan’we na vona va n’wi landzela. Lava mune va tshike ntirho wa vona wo phasa tihlampfi kutani va va vadyondzisiwa va Yesu vo sungula va nkarhi hinkwawo.