Ndzima 24

Lexi Endleke Leswaku Yesu A Ta eMisaveni

SIKU ra Yesu eKapernawume ni vadyondzisiwa vakwe va mune i ra bizi, ri hela loko nimadyambu vanhu va Kapernawume va n’wi tisela vavabyi va vona hinkwavo ku ta hanyisiwa. Ku hava nkarhi wo wisa.

Sweswi i mahlamba-ndlopfu ya mixo lowu landzelaka. Loko wa ha ri munyama, Yesu wa pfuka ivi a humela ehandle a ri swakwe. Ku ya exivandleni lexi nga ni ku rhula laha a nga khongelaka eka Tata wakwe exihundleni. Kambe ku va swakwe ka Yesu i ka xinkarhana hikuva loko Petro ni van’wana va xiya leswaku a nga kona, va famba va n’wi lava.

Loko va kuma Yesu, Petro a ku: “Hinkwavo va ku lava.” Vanhu va Kapernawume va lava leswaku Yesu a tshama na vona. Hakunene va tlangela leswi a va endlelaka swona! Kambe xana Yesu u tile emisaveni ngopfu-ngopfu ku ta hanyisa hi masingita yo tano ke? U ri yini hi leswi?

Hi ku ya hi rungula rin’wana ra Bibele, Yesu u hlamula vadyondzisiwa vakwe a ku: “A hi yeni kun’wana, emitini leyi nge kusuhi, leswaku na kona ndzi ta twarisa Evhangeli, hikuva ndzi tele swona.” Hambi leswi vanhu va sindzisaka Yesu ku tshama, wa va byela: “Ndzi fanele ku ya emitini yin’wana, leswaku nakona ndzi ya twarisa Evhangeli ya Mfumo wa Xikwembu, hikuva ndzi rhumeriwe swona.”

Ina, Yesu u te emisaveni ngopfu-ngopfu ku ta chumayela hi ta Mfumo wa Xikwembu, lowu nga ta lwela vito ra Tata wakwe ni ku ya susela makumu mavabyi hinkwawo ya vanhu. Hambi swi ri tano, ku nyika vumbhoni bya leswaku u rhumiwile hi Xikwembu, Yesu u hanyisa hi masingita. Hi ndlela leyi fanaka, Muxe, malembe xidzana emahlweni ka kwalaho, u endlile masingita ku tiyisa vumbhoni byakwe tanihi nandza wa Xikwembu.

Sweswi, loko Yesu a suka eKapernawume ku ya chumayela eka yin’wana miti, vadyondzisiwa vakwe va mune va ya na yena. Lava va mune i Petro ni makwavo Andriya, na Yohane ni makwavo Yakobo. U ta tsundzuka leswaku vhiki ntsena emahlweni ka kwalaho, va rhambiwile va va vatirhi-kulobye vo sungula lava famba-fambaka na Yesu.

Pfhumba ra Yesu ro chumayela eGaleliya ni vadyondzisiwa vakwe va mune ri humelele hi ndlela yo hlamarisa! Entiyisweni, xiviko xa mintirho yakwe xi hangalake ku ya fika ni le Siriya hinkwaro. Mintshungu leyikulu leyi taka hi le Galeliya, Yudiya ni ku tsemakanya Nambu wa Yordani yi sala Yesu ni vadyondzisiwa vakwe endzhaku. Marka 1:35-39; Luka 4:42, 43; Matewu 4:23-25; Eksoda 4:1-9, 30, 31.

▪ Ku endleka yini nimixo endzhaku ka siku ra Yesu ra migingiriko eKapernawume?

▪ Hikwalaho ka yini Yesu a rhumiwile emisaveni, naswona masingita yakwe ya tirhela xikongomelo xihi?

▪ I vamani va fambaka na Yesu eriendzweni rakwe ro chumayela eGaleliya, naswona mintirho ya Yesu yi tekisiwa ku yini?