Ndzima 16

Ku Hisekela Vugandzeri Bya Yehova

VAMAKWAVO va Yesu hi tatana—vana van’wana va Mariya—i Yakobo, Yosefa, Simoni na Yudasi. Lava hinkwavo va nga si famba na Yesu ni vadyondzisiwa va yena ku ya eKapernawume, muti lowu nga kusuhi ni Lwandle ra Galeliya, kumbexana va yime ekaya ka vona eNazareta leswaku ndyangu wu ta longa swilo leswi va nga ta swi lava.

Kambe ha yini Yesu a ya eKapernawume ematshan’wini yo ya emahlweni ni vutirheli bya yena eKana, eNazareta, kumbe etindhawini tin’wana eswitsungeni swa Galeliya? Hi xikombiso, Kapernawume ri tiveka ngopfu naswona entiyisweni i muti lowukulu. Nakambe, vo tala va vadyondzisiwa va Yesu lava a va kumeke va tshama kona kumbe ekusuhi na Kapernawume, kutani a va nga boheki ku sukela makaya ya vona ku ya kuma ku leteriwa hi yena.

Enkarhini wa ku tshama ka yena eKapernawume, Yesu u endla mintirho leyi hlamarisaka, hi laha a swi endleke ha kona tin’hweti ti nga ri tingani endzhakunyana. Kambe hi ku hatlisa Yesu ni vanghana va yena va le gondzweni nakambe. I ximun’wana, naswona va le ndleleni ya vona yo ya eYerusalema ku ya hlanganyela Paseka ya 30 C.E. Loko va ri kwalaho, vadyondzisiwa va yena va vona swin’wana hi Yesu leswi kumbexana va nga si tshamaka va swi vona.

Hi ku ya hi Nawu wa Xikwembu, Vaisrayele va fanele ku endla magandzelo hi swiharhi. Kutani, leswi va hlamarisaka, vaxavisi va le Yerusalema va xavisa swiharhi kumbe matuva hikwalaho ka xikongomelo lexi. Kambe va ya xavisela kona endzeni ka tempele, naswona va dyelela vanhu hi ku va hakerisa mali yo tala.

Hi ku hlundzuka, Yesu u endla ximoko xa tingoti kutani a humesela vaxavisi ehandle. U chulula mali ya lava cincaka mali ni ku wisetela matafula ya vona. U huwelela lava xavisaka matuva a ku: “Susani swilo leswi la; mi nga teki yindlu ya Tata wa mina, mi yi endla ya ku bindzulela eka yona.”

Loko vadyondzisiwa va Yesu va vona leswi, va tsundzuka vuprofeta ehenhleni ka N’wana wa Xikwembu: “Ku hisekela yindlu ya wena, we Xikwembu, swa ndzi dya.” Kambe Vayuda va vutisa va ku: “U nga hi komba xikombiso xihi xa leswaku u na matimba yo endla leswi xana?” Yesu wa hlamula a ku: “Hindzimuxani Tempele leyi, kutani mina ndzi ta yi pfuxa hi masiku manharhu.”

Vayuda va ehleketa leswaku Yesu u vulavula hi tempele ya xiviri, kutani va vutisa va ku: “Tempele leyi yi tekile malembe ya 46, ku aka yona, kutani wena, xana u ri u ta yi pfuxa hi masiku manharhu xana?” Hambi swi ri tano, Yesu u vulavula hi tempele ya miri wa yena. Naswona malembe manharhu endzhakunyana, vadyondzisiwa va yena va tsundzuka marito lawa ya yena loko a pfuxiwile eku feni. Yohane 2:12-22; Matewu 13:55; Luka 4:23.

▪ Endzhaku ka nkhuvo wa le Kana, hi le tindhawini tihi laha Yesu a yaka kona?

▪ Ha yini Yesu a hlundzukile, naswona u endla yini?

▪ Xana vadyondzisiwa va Yesu va tsundzuka yini loko va vona swiendlo swa yena?

▪ Yesu u ri yini hi “tempele leyi,” naswona u vula yini?