A Ndlandlamuxa Ntirho Wakwe Egaleliya

Yesu a a khomekile swinene hi siku leri a ri ni vadyondzisiwa vakwe va mune eKapernawume. Nimadyambu vaakatiko va le Kapernawume va tise vanhu lava vabyaka leswaku a ta va horisa. Phela siku rero Yesu a nga tshamanga na le hansi a ku hefu!

Kutani hi mahlambandlopfu, Yesu u pfukile kutani a ya ehandle a ri yexe. U kume ndhawu leyi rhuleke, leyi a a ta khongela Tata wakwe a nga kavanyeti hi munhu. Kambe Yesu a nga tekanga nkarhi wo leha a ri yexe. Loko va xiya leswaku a nga kona, “Simoni ni lava a va ri na yena” va fambe va lava Yesu. Swi nga endleka Petro a a rhange mahlweni hikuva Yesu a a ri ekaya ka yena.—Marka 1:36; Luka 4:38.

Loko va n’wi kuma, Petro a ku: “Vanhu hinkwavo va lavana na wena.” (Marka 1:37) Vaakatiko va le Kapernawume a va lava leswaku Yesu a nga fambi. A va swi tlangela leswi a va endleleke swona kutani va “ringeta ku n’wi sivela leswaku a nga fambi.” (Luka 4:42) Hambiswiritano, xana Yesu u te la misaveni leswaku a ta endla masingita yo horisa vanhu? Naswona xana a a ta tshika ku ya chumayela etindhawini tin’wana kutani a tshama eKapernawume? Yesu u endle yini?

Yesu u hlamule vadyondzisiwa vakwe a ku: “A hi yeni kun’wana, emadorobeni lama nga kusuhi, leswaku na kona ndzi ta chumayela, hikuva ndzi tele sweswo.” Yesu u tlhele a byela vanhu lava a va lava leswaku a nga fambi a ku: “Ndzi fanele ku chumayela mahungu lamanene ya Mfumo wa Xikwembu ni le mitini yin’wana, hikuva ndzi tele sweswo.”—Marka 1:38; Luka 4:43.

Xivangelonkulu lexi endleke leswaku Yesu a ta emisaveni a ku ri ku ta chumayela hi Mfumo wa Xikwembu. Mfumo lowu wu ta kwetsimisa vito ra Tata wakwe ni ku herisa mavabyi hinkwawo. Ku va Yesu a endla masingita ya ku horisa vanhu, a a kombisa leswaku u rhume hi Xikwembu. Hilaha ku fanaka, eka madzana ya malembe lama hundzeke Muxe u endle mitirho yo hlamarisa leyi a yi kombisa leswaku u rhumiwe hi Xikwembu.—Eksoda 4:1-9, 30, 31.

Kutani Yesu u suke eKapernawume ni vadyondzisiwa vakwe va mune va ya chumayela emitini yin’wana. Vadyondzisiwa lava mune a ku ri Petro ni makwavo Andriya ku katsa na Yohane ni makwavo Yakobo. Eka vhiki leri nga hundza Yesu a a va rhambe leswaku va va vadyondzisiwa vakwe vo sungula.

Ntirho wo chumayela lowu Yesu ni vadyondzisiwa vakwe va mune a va wu endla eGaleliya a wu tsakisa swinene! Kahlekahle mhaka ya Yesu yi fike ni le kule. “Ndhuma yakwe yi hangalaka etikweni hinkwaro ra Siriya,” exifundzheni xa Dekapolisi ni le tindhawini leti a ti ri etlhelo ka Nambu wa Yordani. (Matewu 4:24, 25) Mitshungu leyi a yi huma etindhawini teto ku katsa ni le Yudiya yi landzele Yesu ni vadyondzisiwa vakwe. Vo tala va tise lava vabyaka eka yena. Yesu a a nga va khomisi ribye—u horise lava vabyaka ni ku hlongola mimoya yo biha eka lava nga ni madimona.