Yesu A Hisekela Vugandzeri Bya Ntiyiso

Endzhaku ka mucato wa le Kana, Yesu u ya eKapernawume. Mana wa Yesu ni vamakwavo—Yakobo, Yosefa, Simoni na Yudasi—va famba swin’we na yena.

Hikwalahokayini Yesu a ya eKapernawume? Muti lowu wa tiveka ku tlula Nazareta kumbe Kana naswona swi le rivaleni leswaku i wukulu. Nakambe vadyondzisiwa vo tala va Yesu lavantshwa va huma eKapernawume kumbe ekusuhi na kona. Hikwalaho Yesu u ta kota ku va letela endhawini leyi va tshamaka eka yona.

Loko a ri Kapernawume, Yesu u endla masingita man’wana. Hikwalaho vo tala emutini wolowo ni le tindhawini ta le kusuhi va twa leswi Yesu a swi endlaka. Yesu ni vanghana vakwe lava nga Vayuda lava tinyiketeleke, ku nga ri khale va fanele va ya eYerusalema va ya tlangela paseka ya lembe ra 30 C.E.

Loko va ri etempeleni le Yerusalema, vadyondzisiwa va Yesu va vona nchumu wun’wana wo hlamarisa swinene eka Yesu, lowu hambaneke ni lowu va tshameke va wu vona.

Nawu wa Xikwembu wu lerisa leswaku Vaisrayele va endla switlhavelo hi swifuwo etempeleni naswona vaendzi va fanele va kuma swakudya hi nkarhi wa riendzo ra vona. Nawu wu pfumelela leswaku vanhu lava taka eYerusalema va huma etindhawini ta le kule, va fanele va ta ni mali leswaku va xava “tihomu, tinyimpfu, timbuti” ni swilo swin’wana leswi a va ta swi lava loko va ha ri kwalaho. (Deteronoma 14:24-26) Hikwalaho, van’wamabindzu va le Yerusalema va xavisa swifuwo kumbe swinyenyana endzeni ka xivava lexikulu xa tempele. Van’wana va rhoba vanhu hi ku va durhisela swilo.

Yesu swi n’wi nyangatsile, kutani a hangalasa mali ya nsimbi ya vacincisi va mali, a wisetela ni matafula ya vona a tlhela a va hlongola. Kutani Yesu a ku: “Susani swilo leswi laha! Tshikani ku endla yindlu ya Tatana yi va yindlu ya mabindzu!”—Yohane 2:16.

Loko vadyondzisiwa va Yesu va vona leswi va tsundzuke vuprofeta lebyi vulavulaka hi N’wana wa Xikwembu, lebyi nge: “Ku hisekela yindlu ya wena ku ta ndzi dya.” Kambe Vayuda va n’wi vutisa va ku: “Xana u ta hi endlela singita rihi, ku kombisa leswaku u ni mfanelo yo endla swilo leswi?” Kutani Yesu a va hlamula a ku: “Wisani tempele leyi, kutani ndzi ta yi pfuxa hi masiku manharhu.”—Yohane 2:17-19; Pisalema 69:9.

Vayuda va ehleketa leswaku Yesu u vulavula hi tempele leyi nga eYerusalema, hiloko va ku: “Swi teke malembe ya 46 ku va tempele leyi yi akiwa, xana u nga yi pfuxa hi masiku manharhu?” (Yohane 2:20) Kambe Yesu u vulavula hi miri wakwe tanihi tempele. Endzhaku ka malembe manharhu, vadyondzisiwa va Yesu va tsundzuke marito lama loko a pfuxiwa.