A Endla Singita Rakwe Ro Sungula

Se i siku ra vunharhu Nathaniyele a ri un’wana wa vadyondzisiwa va Yesu vo sungula. Yesu ni van’wana va vadyondzisiwa vakwe vo sungula va kongoma en’walungwini exifundzheni xa Galeliya emugangeni wa ka vona. Va ya emutini wa Kana, ku nga muti lowu Nathaniyele a tshamaka eka wona. Kana yi kumeka eswintshabyanini leswi nga en’walungwini wa Nazareta laha Yesu a kuleleke kona. Va rhambiwe emucatweni le Kana.

Mana wa Yesu na yena u te emucatweni. Leswi Mariya a a tolovelane ni ndyangu wa lava a va cata, swi tikomba onge a a pfuneta eku khathaleleni ka vaendzi. Hikwalaho u hatla a swi vona ku swin’wana swa xota, kutani u byela Yesu a ku: “Va heleriwe hi vhinyo.”—Yohane 2:3.

Kutani Mariya u kombela Yesu leswaku a endla xan’wanchumu hi leswi vhinyo yi kayivelaka. Yesu u tirhisa xigaririmi ku komba leswaku a nga yimi na yona mhaka leyi loko a ku: “Sweswo swi hi khumba njhani mina na wena?” (Yohane 2:4) Leswi a nga Hosi leyi hlawuriweke hi Xikwembu, Yesu a a ta endla ntirho wakwe ntsena loko a lerisiwe hi Tata wakwe wa le tilweni ku nga ri swirho swa ndyangu kumbe vanghana. Hi vutlhari Mariya u yi tshikela n’wana wakwe mhaka leyi hi ku byela lava tirhaka a ku: “Endlani xin’wana ni xin’wana lexi a mi byelaka xona.”—Yohane 2:5.

Ku ni makhuwana ya tsevu yo chela mati naswona ha rin’we ri nga chela 40 wa tilitara ta mati. Yesu u lerisa lava nga kona a ku: “Tatani makhuwana hi mati.” Kutani Yesu a ku: “Sweswi kanani man’wana mi ya nyika mufambisi wa nkhuvo.”—Yohane 2:7, 8.

Mufambisi wa nkhuvo u tsakisiwa hi vhinyo leyinene kambe a a nga swi tivi leswaku yi endliwe hi singita. U vitana muteki ivi a ku: “Vanhu va rhanga hi ku humesa vhinyo leyinene, kutani loko vanhu va pyopyiwile, va humesa leyo phyama. Ya wena ya ha ri yinene ku ta fikela sweswi.”—Yohane 2:10.

Leri i singita ro sungula leri Yesu a ri endlaka. Loko vadyondzisiwa vakwe vo sungula va vona singita leri, va va ni ripfumelo eka yena. Endzhaku ka sweswo, hiloko Yesu, mana wakwe ni vamakwavo va ya emutini wa Kapernawume lowu nga en’walunguvupeladyambu bya Lwandle ra Galeliya.