Ndzima 15

Hlori Ro Sungula Ra Yesu

A KA HA ku hundza siku rin’we kumbe mambirhi kusukela loko Andriya, Petro, Yohane, Filipi, na Nathaniyele kumbexana na Yakobo va ve vadyondzisiwa vo sungula va Yesu. Lava sweswi va le ndleleni ya vona yo ya ekaya exifundzeni xa Galeliya, laha hinkwavo ka vona va humaka kona. Laha va yaka kona hi le Kana, doroba ra Nathaniyele, leri nga eswitsungeni leswi nga riki kule na Nazareta, laha Yesu hi yexe a kuleleke kona. Va rhamberiwe enkhubyeni wa vukati eKana.

Mana wa Yesu na yena u tile enkhubyeni. Tanihi munghana wa ndyangu wa lava tekiwaka, Mariya u humelela tanihi loyi a katsekaka ngopfu eku khathaleleni ka swilaveko swa vaendzi vo tala. Kutani u hatlisela ku xiya ku kayivela, loku a ku vikaka eka Yesu: “A va ha ri na vhinyo.”

Xisweswo loko Mariya, entiyisweni a ringanyeta leswaku Yesu a endla swin’wana hi ku kayivela ka vhinyo, Yesu eku sunguleni a nga endli nchumu. Wa vutisa: “Hikwalaho ka yini u nghenelela etimhakeni ta mina ke?” Tanihi Hosi leyi hlawuriweke ya Xikwembu, a yi fanelanga ku kombeteriwa eka ntirho wa yona hi vandyangu ni vanghana. Kutani Mariya hi vutlhari u tshikela mhaka emavokweni ya n’wana wa yena, hi ku olova u byela lava va tirhaka a ku: “Endlani hinkwaswo leswi a nga ta mi byela swona.”

Ina, ku na makhuwana ya mati lamakulu ya tsevu lama endliweke hi ribye, rin’wana ni rin’wana ra wona ri nga khoma tilitara leti tlulaka 40. Yesu u lerisa lava tirhaka a ku: “Tatani tinkho leti hi mati.” Kutani vatirhi va ti tata ti fika hi le milon’wini. Kutani Yesu a ku: “Kelelani [man’wana] sweswi, mi yisa eka mufambisi wa nkhuvo.”

Mufambisi u tsakisiwa hi nkoka lowunene wa vhinyo, a nga swi xiyi leswaku yi endliwe hi hlori. Loko a vitana muteki u ri: “Vanhu hinkwavo va toloverile ku humesa vhinyo leyo nandziha eku sunguleni, kutani loko ku nwiwile swinene, va humesa leyo ka yi nga nandzihi ngopfu; kambe wena u hlayisile vhinyo leyo nandziha ku fikela sweswi!”

Leri i hlori ro sungula ra Yesu, naswona loko va ri vona, ripfumelo ra vadyondzisiwa va yena lavantshwa ra tiyisiwa. Endzhaku, yena ni mana wa yena ni vamakwavo hi tatana, va ya emutini wa Kapernawume ekusuhi ni Lwandle ra Galeliya. Yohane 2:1-12.

▪ Hi rini laha hi nkarhi wa vutirheli bya Yesu nkhuvo wa vukati wu humelelaka eKana?

▪ Ha yini Yesu a ale xiringanyeto xa mana wa yena?

▪ I hlori rihi leri Yesu a ri endlaka, naswona ri va ni nkucetelo wihi eka van’wana?