Singita Ravumbirhi Ekana

Endzhaku ka masiku mambirhi Yesu a ri eSamariya, u ye ekaya ka vona. A a khomekile hi ku chumayela eYudiya kambe a a nga yi eGaleliya leswaku a ya wisa. Ku ri na sweswo, u sungule ku endla ntirho lowukulu wo chumayela etikweni leri a kuleleke eka rona. Yesu a a nga rindzelanga ku amukeriwa hi mandla mambirhi le Galeliya hikuva u te, “muprofeta a nga xiximiwi etikweni ra rikwavo.” (Yohane 4:44) Ematshan’weni ya leswaku vadyondzisiwa vakwe va tshama na yena, va tlhelele emindyangwini ya vona ni le ka mitirho ya vona ya khale.

Hi rihi rungula leri Yesu a a chumayela ha rona? Hi leri nge: “Mfumo wa Xikwembu wu tshinele. Hundzukani mi va ni ripfumelo eka mahungu lamanene.” (Marka 1:15) Vanhu va angule njhani? Vanhu vo tala eGaleliya va n’wi amukele hi mandla mambirhi Yesu va tlhela va n’wi xixima. A ku nga ri hikwalaho ka rungula rakwe ntsena. Vagaleliya van’wana a va ri kona loko ku tlangeriwa Paseka eYerusalema eka tin’hweti leti nga hundza naswona va ma vonile masingita lama Yesu a ma endleke.—Yohane 2:23.

Yesu u wu sungule kwihi ntirho wakwe lowukulu wo chumayela loko a ri eGaleliya? Swi nga endleka a wu sungule eKana laha a nga fika a hundzula mati ma va vhinyo. Eka xiendlakalo xa vumbirhi a ha ri eKana, Yesu u twe hi ta jaha leri a ri vabya swinene lerova a ri ri kusuhi ni ku fa. I n’wana wa nandza wa Heroda Antipasi, ku nga hosi leyi leriseke leswaku ku tsemiwa nhloko ya Yohane Mukhuvuri. Nandza loyi u twe leswaku Yesu u huma eYudiya, u ya eKana. Kutani wanuna loyi u teka riendzo a suka ekaya ka yena eKapernawume a ya eka Yesu eKana. Wanuna loyi, loyi a karhatekeke swinene u byela Yesu a ku: “Hosi, tana, n’wana wa mina a nga si fa.”— Yohane 4:49.

Yesu u hlamula hi ndlela leyi hlamarisaka wanuna loyi: “Muka; n’wana wa wena u horile.” (Yohane 4:50) Nandza wa Heroda u n’wi tshembile Yesu kutani u teke riendzo a tlhelela ekaya. Loko a ha ri endleleni u hlanganise hi mahlonga yakwe lama a ma tsutsumela ku ta n’wi byela mahungu lamanene. N’wana wakwe u horisiwile! Leswi a a lava ku yi twisisa kahle mhaka leyi, u ma vutise a ku: ‘U hole rini?’

Ma n’wi hlamula ma ku: “U hole tolo hi awara ya vunkombo.”—Yohane 4:52.

Nandza wa hosi a swi lemuka leswaku u hole hi nkarhi lowu Yesu a nga te: “n’wana wa wena u horile.” Endzhaku ka sweswo wanuna loyi, loyi a fuweke lerova a faneriwa hi ku va ni malandza, yena ni ndyangu wa yena hinkwavo va ve valandzeri va Kreste.

EKana hilaha Yesu a endleke masingita kambirhi, a hundzula mati ma va vhinyo ni ku horisa jaha a ri ekule na rona hi 26 wa tikhilomitara. Masingita lama a hi wona ntsena lama a ma endleke. Kambe singita leri ra ku horisa munhu a ku ri ra nkoka hikuva a ku ri xikombiso xa leswaku se u vuyile eGaleliya. Hakunene i muprofeta loyi a hlawuriweke hi Xikwembu kambe xana ‘muprofeta loyi u ta xiximiwa ku fikela rini etikweni ra rikwavo’?

Sweswo swi ta vonaka kahle loko Yesu a kongoma ekaya eNazareta. I yini leswi nga ta endleka loko a ri kwale?