Ndzima 20

Singita Ra Vumbirhi eKana

LOKO Yesu a vuyela emutini wa ka vona endzhaku ka tsima ra ku chumayela ka nkarhi wo leha eYudiya, a nga vuyeli ku wisa. Kambe, u sungula vutirheli lebyi tlulaka byebyo eGaleliya, tiko leri a kuleleke eka rona. Kambe vadyondzisiwa vakwe, ematshan’wini yo tshama na yena, va tlhelela emindyangwini ya ka vona ni le mintirhweni leyi a va yi tirha.

Xana i mahungu wahi lawa Yesu a sungulaka ku ma chumayela? Hi lawa: “Mfumo wa Xikwembu wu le kusuhi; hundzukani, mi pfumela Evhangeli.” Vuyelo ku ve byihi ke? Vagaleliya va amukela Yesu. U xiximiwa hi hinkwavo. Hambi swi ri tano, leswi kahle-kahle a hi mhaka ya mahungu yakwe, kambe hi leswi vunyingi bya vona a byi ri eka Paseka eYerusalema tin’hweti emahlweni ka sweswo naswona byi voneke swikombiso leswi hlamarisaka leswi a swi endleke.

Kahle-kahle Yesu u sungula vutirheli byakwe lebyikulu bya Galeliya eKana. Emahlweninyana, u nga ha tsundzuka, loko a vuya hi le Yudiya, u hundzule mati ya va vhinya enkhubyeni wa vukati kwale. Eka xiendlakalo lexi xa vumbirhi, n’wana wa mutirhela-mfumo wa hulumendhe ya Hosi Heroda Antipasi u vabya swinene. Hi ku twa leswaku Yesu u vuyile hi le Yudiya a ta eKana, mutirhela-mfumo u teke riendzo ro leha ku suka ekaya kakwe eKapernawume a lava Yesu. Hi gome, wanuna wa n’wi kombela: ‘Wa nga rhelela, jahanyana ra mina ri nga si fa.’

Yesu a hlamula a ku: ‘Famba, n’wana wa wena u ta hanya.’ Ndhuna ya Heroda yi tshemba ivi yi khoma ndlela yi ya ekaya. Endleleni yi hlanganisiwa hi malandza ya yona, lama rhumiweke ku ta n’wi byela leswaku hinkwaswo swi famba kahle—n’wana wakwe u hanyile! ‘N’wana loyi u sungule rini ku antswa xana?’ a vutisa.

‘Tolo hi nkarhi wa 1:00 ni ndzhenga,’ ku hlamula vona.

Ndhuna yi xiya leswaku lowu hi wona nkarhi lowu ha wona Yesu a nga te, ‘N’wana wa wena u ta hanya.’ Endzhaku ka sweswo, wanuna loyi ni ndyangu wakwe hinkwawo va ve vadyondzisiwa va Kriste.

Xisweswo Kana ku vile xivandla lexi katekeke tanihi laha, loko a kombisa ku vuya ka yena hi le Yudiya, Yesu a endleke masingita kambirhi. Kavula, lawa a hi wona ntsena masingita lawa a ma endleke ku ta fika enkarhini lowu, kambe i ya risima hikuva ma funghile ku vuyela kakwe eGaleliya.

Yesu kutani u tlhelela ekaya eNazareta. I yini lexi n’wi rindzeleke kona xana? Yohane 4:43-54; Marka 1:14, 15; Luka 4:14, 15.

▪ Loko Yesu a tlhelela eGaleliya, ku endleka yini eka vadyondzisiwa vakwe, naswona vanhu va n’wi amukela hi ndlela yihi?

▪ I singita rihi leri Yesu a ri endlaka, naswona ri va khumba njhani lava katsekaka?

▪ Xana Kana xisweswo ri katekisiwe hi ndlela yihi hi Yesu ke?