Ndzima 42

Yesu U Tshinya Vafarisi

LOKO ku ri hi matimba ya Sathana lama a hlongolaka mademona ha wona, Yesu wa khutaza, kutani Sathana u avanile. “Vonani murhi lowunene: Na yona mihandzu ya wona hi leyinene,” u ya emahlweni, “vonani murhi lowo biha: Na yona mihandzu ya wona hi leyo biha; hikuva murhi wu tiviwa hi mihandzu ya wona.”

I vuphukuphuku ku vula leswaku mihandzu leyinene yo hlongola mademona i vuyelo bya Yesu byo tirhela Sathana. Loko muhandzu wu ri wunene, murhi wu nga ka wu nga vi lowu biheke. Hi tlhelo rin’wana, mihandzu ya Vafarisi leyo biha ya ku hehla loku humeke endleleni ni ku kaneta loku nga riki na timitsu ka Yesu i vumbhoni bya leswaku yi bihile. “Rixaka ra timhiri,” ku vula Yesu, “mi nga swi kotisa ku yini ku humesa marito lamanene, leswi mi nga lavo biha ke? Hikuva nomu wu vula leswi mbilu yi teleke swona.”

Tanihi leswi marito ya hina ya kombaka xiyimo xa timbilu ta hina, leswi hi swi vulaka swi nyika xisekelo xa ku avanyisa. “Ndza mi byela,” Ku vula Yesu, “leswaku, hi siku ra ku avanyisiwa, vanhu va ta tihlamulela eka rito rin’wana ni rin’wana ra hava leri va tshameke va ri vula; hikuva wena, u ta hlayiwa la lulameke hi marito ya wena; naswona, u ta avanyisiwa hi marito ya wena.”

Ku nga khathariseki mintirho ya Yesu hinkwayo ya matimba, vatsari ni Vafarisi va kombela va ku: “Mudyondzisi, hi lava ku ku vona u endla mahlori.” Hambi leswi vavanuna lava vo huma eYerusalema va nga vaka va nga si vona mahlori yakwe, vumbhoni lebyi nga kanetekiki lebyi voniweke hi mahlo mayelana na wona byi kona. Kutani Yesu u byela varhangeri va Vayuda: “Rixaka leri ro biha, leri sandzaka Xikwembu, ri kombela mahlori, kambe ri nga ka ri nga nyikiwi wona, loko ya nga ri ya muprofeta Yonasi.”

Loko a hlamusela leswi a vulaka swona, Yesu u ya emahlweni a ku: “Hi laha Yonasi a heteke ha kona masiku manharhu ni vusiku bya kona ekhwirini ra nhlampfi leyikulu, N’wana-wa-Munhu na yena u ta heta masiku manharhu ni vusiku bya kona emarhumbyini ya misava.” Endzhaku ka loko a mitiwile hi nhlampfi, Yonasi u hume wonge hi loko a pfuxiwile, kutani Yesu a vhumba leswaku u ta fa kutani hi siku ra vunharhu u ta pfuxiwa a ri karhi a hanya. Kambe, varhangeri va Vayuda, hambi loko Yesu a pfuxiwile endzhaku, va ala ‘mahlori ya Yonasi.’

Xisweswo Yesu u vula leswaku vavanuna va Ninivha lava hundzukeke hi ku chumayela ka Yonasi va ta humelela eku avanyiseni leswaku va ta sola Vayuda lava aleke Yesu. Hi laha ku fanaka, u nyikela ku fana ni le ka hosi ya wansati ya Sheba, leyi sukeke emakun’wini ya misava ku ta yingisa vutlhari bya Solomoni ni ku hlamarisiwa hi leswi a swi voneke ni ku swi twa. “Kutani maswivo!” ku xiya Yesu, “leswi nga kwala i swikulu ku tlula Solomoni.”

Kutani Yesu u nyikela xifaniso xa munhu loyi moya wa thyaka wu humeke eka yena. Hambi swi ri tano, munhu loyi a nga ka a nga sivi swa hava hi swilo leswinene, kutani a ngheniwa hi mimoya yin’wana ya nkombo leyo biha ku tlurisa. “Swi ta va tano eka rixaka leri ro biha,” ku vula Yesu. Rixaka ra Israyele a ri basisiwile naswona a ri tokote mindzhundzuluko—ku fana ni ku suka ka xinkarhana ka moya wa thyaka. Kambe ku fularhela ka tiko vaprofeta va Xikwembu, loku heteleleke hi nkaneto wa rona eka Kriste hi yexe, ku hlavutela xiyimo xa rona lexo biha ku ri lexi nyanyaka ku tlula eku sunguleni ka rona.

Loko Yesu a ri karhi a vulavula, mana wa yena ni vamakwavo va fika ivi va yima ehandle ka ntshungu. Kutani munhu un’wana u ri: “Vona, mana wa wena ni vamakwenu, hi lava la handle, va lava ku vulavula na wena.”

“Manana i mani xana, ni vamakwerhu i vamani xana?” Ku vutisa Yesu. Loko a komba vadyondzisiwa va yena hi voko, u ri: “Manana ni vamakwerhu hi volava; hikuva un’wana ni un’wana la endlaka ku rhandza ka Tata wa mina la nge tilweni, hi yena makwerhu wa xinuna, ni wa xisati, na manana.” Hi ndlela leyi Yesu u komba leswaku ku nga khathariseki leswi swiboho swi rhandzekisaka swona leswi n’wi pfalaka mahlo eka maxaka yakwe, lexi rhandzekaka i xinakulobye xa yena ni vadyondzisiwa vakwe. Matewu 12:33-50; Marka 3:31-35; Luka 8:19-21.

▪ Xana Vafarisi va hluleka ku endla “murhi” ni “muhandzu” lowunene hi ndlela yihi?

▪ ‘Mahlori ya Yonasi’ a ku ri yini, naswona ya ariwe njhani endzhakunyana?

▪ Tiko ra Israyele ra lembe xidzana ro sungula a ri fana ni munhu loyi moya wa thyaka wu humeke eka yena hi ndlela yihi?

▪ Yesu u kombisa vuxaka byakwe lebyikulu ni vadyondzisiwa vakwe hi ndlela yihi?