Yesu A Tshinya Vafarisi

Leswi a va ala leswaku Yesu u hlongola madimona hi ku tirhisa matimba ya Xikwembu, swi endle leswaku vatsari ni Vafarisi va va ekhombyeni ro sandza moya lowo kwetsima. Xana va ta yima na Xikwembu kumbe na Sathana? Yesu u ri: “Endlani murhi wu va lowunene ni mihandzu ya wona yi va leyinene kumbe mi endla murhi wu va lowu boleke ni mihandzu ya wona yi va leyi boleke, hikuva murhi wu tiviwa hi mihandzu ya wona.”—Matewu 12:33.

I vuphukuphuku ku vula leswaku mihandzu leyinene yo hlongola madimona yi va kona hileswi Yesu a tirhelaka Sathana. Yesu u swi veke erivaleni eka Dyondzo yakwe ya le Ntshaveni leswaku loko mihandzu yi va leyinene ni murhi wu va wu ri wunene naswona wu va wu nga bolanga. Xana swihehlo leswi nga twaliki leswi Vafarisi va hehleke Yesu hi swona, swi kombisa leswaku Vafarisi i mihandzu ya njhani? I mihandzu leyi boleke. Yesu u va byela a ku: “Vana va timhiri, xana mi ta vulavurisa ku yini swilo leswinene mi ri vaendli va leswo biha? Hikuva nomu wu vulavula leswi mbilu yi taleke swona.”—Matewu 7:16, 17; 12:34.

Leswi hi swi vulaka swi kombisa leswi nga etimbilwini ta hina naswona van’wana va nga ha hi avanyisa hikwalaho ka swona. Hi yona mhaka Yesu a nga te: “Ndzi mi byela ntiyiso, swilo hinkwaswo leswi nga pfuniki nchumu leswi vanhu va swi vulaka va ta tihlamulela mayelana na swona hi Siku ra Vuavanyisi; hikuva mi ta vuriwa lava lulameke hikwalaho ka marito ya n’wina naswona marito ya n’wina hi wona ma nga ta endla leswaku mi va ni nandzu.”—Matewu 12:36, 37.

Hambileswi Yesu a endlaka mitirho yo hlamarisa, vatsari ni Vafarisi va lava leswi engetelekeke hi ku vula va ku: “Mudyondzisi, hi lava ku ku vona u endla singita.” Swi nga ri na mhaka leswaku va n’wi vonile hi ku kongoma kumbe a va n’wi vonanga loko a endla masingita, vo tala a va swi vona leswi a swi endla. Kutani Yesu u byela varhangeri va Vayuda a ku: “N’wina xitukulwana xo homboloka ni lexi nga tshembekiki eka Xikwembu mi tshamela ku lava singita, kambe a ku na singita leri mi nga ta ri vona handle ka singita ra muprofeta Yonasi.”—Matewu 12:38, 39.

Yesu a nga va tshikanga va sala va tivutisa hi leswi a swi vula kambe u ri: “Tanihi leswi Yonasi a a ri ekhwirini ra nhlampfi leyikulu masiku manharhu ni vusiku bya kona, ni N’wana wa munhu u ta va ehansi ka misava masiku manharhu ni vusiku bya kona.” Yonasi a a mitiwe hi nhlampfi leyikulu kambe u humile onge hiloko a lo pfuxiwa eku feni. Yesu u vula leswaku na yena u ta fa kutani a pfuxiwa hi siku ra vunharhu. Endzhaku ka loko sweswo swi endlekile, varhangeri va Vayuda va ale ‘singita ra Yonasi’ naswona a va pfumelanga ku hundzuka. (Matewu 27:63-66; 28:12-15) Ku hambana ni sweswo, “vavanuna va le Ninivha” va hundzukile endzhaku ka loko Yonasi a va chumayerile. Hikwalaho, va ta avanyisa xitukulwana lexi. Yesu u tlhela a vula leswaku xikombiso xa hosi ya xisati ya le Xeba xi kombisa leswaku na yona a yi ta xi sola xitukulwana lexi. A yi navela ku twa ni ku vona vutlhari bya Solomoni. Kutani Yesu u ri: “Laha ku ni munhu wa nkoka ku tlula Solomoni.”—Matewu 12:40-42.

Yesu u fanisa xiyimo xa xitukulwana lexi xo homboloka ni wanuna loyi ku humaka moya wo homboloka eka yena. (Matewu 12:45) Leswi laha ku humeke moya wolowo ku nga siviwangiki hi leswinene, swi endle leswaku moya wolowo wo homboloka wu tlhelela eka yena ni mimoya yin’wana ya nkombo leyi hombolokeke ngopfu ku tlula wona. Hilaha ku fanaka, tiko ra Israyele a ri basisiwile ni ku pfuxetiwa ku fana ni wanuna loyi moya wo homboloka wu humeke eka yena. Kambe tiko ra Israyele a ri va amukelanga vaprofeta va Xikwembu naswona a ri kanetana na Yesu loyi a swi ri erivaleni leswaku u ni moya wa Xikwembu. Leswi swi kombisa leswaku xiyimo xa tiko rero a xo ya xi nyanya ku biha.

Loko Yesu a ha vulavula, mana wakwe ni vamakwavo va tile va fika va yima etlhelo ka ntshungu. Kutani van’wana lava a va tshame ekusuhi na yena va fika va ku: “Mana wa wena ni vamakwenu va yime hala handle va lava ku ku vona.” Yesu u kombisa ndlela leyi a titwaka hayona hi vadyondzisiwa vakwe lava a va fana ni vabuti, vasesi ni vamanana eka yena. Hiloko a kombetela vadyondzisiwa vakwe a ku: “Mana wa mina ni vamakwerhu hi lava twaka rito ra Xikwembu va tlhela va endla leswi ri swi vulaka.” (Luka 8:20, 21) U teka vuxaka lebyi a nga na byona ni vadyondzisiwa vakwe byi ri bya nkoka swinene ku tlula lebyi a nga na byona ni maxaka yakwe. Swa phyuphyisa swinene ku va ni vuxaka byo tano ni vamakwerhu ngopfungopfu loko van’wana va sola ni ku kanakana mitirho ya hina leyinene.