Ndzima 46
U Khumbe Nguvu Yakwe
MAHUNGU ya ku vuya ka Yesu hi le Dekapolisi ya fika eKapernawume, naswona ntshungu lowukulu wa hlengeletana ekusuhi ni lwandle leswaku wu ta n’wi amukela. A swi kanakanisi leswaku va twe ndlela leyi a miyeteke bubutsa ni ku horisa vavanuna lava a va ri na mademona ha yona. Sweswi, loko a ri karhi a huma elwandle, va n’wi rhendzela, va chivirika ni ku langutela.
Un’wana wa lava va tikarhatelaka ku vona Yesu i Yayiro, hosana ya sinagoga. U wela emilengeni ya Yesu ivi a kombela kambe na kambe a ku: “N’wana wa mina wanhwanyana wa ha ku fa sweswi, kambe wa nga ta, u ta n’wi tlhandleka mavoko, kutani ú ta tlhela a hanya.” Tanihi leswi a nga yena n’wana wakwe a ri swakwe naswona a nga na 12 wa malembe hi vukhale ntsena, wa rhandzeka ngopfu eka Yayiro.
Yesu wa swi amukela naswona, loko a heleketiwa hi ntshungu, u ya ekaya ra Yayiro. Hi nga ku anakanya ku nyanyuka ka vanhu loko va ri karhi va langutela singita rin’wana. Kambe mianakanyo ya wansati un’wana entshungwini yi yisiwe eka xiphiqo xa yena n’wini lexikulu.
Hi malembe ya 12 hi ku leha, wansati loyi a a vabya hi vuvabyi bya ngati. U ye eka madokodela hi ku landzelelana, a tirhisa mali ya yena hinkwayo emirhini. Kambe a nga pfuniwanga, ematshan’wini ya sweswo, xiphiqo xakwe xi ve lexi nyanyaka.
Hi laha kumbexana u nga ha swi twisisaka ha kona, handle ka ku n’wi tsanisa ngopfu, vuvabyi byakwe nakambe byi khomisa tingana naswona bya tsongahata. Munhu hakanyingi a nga vulavuli erivaleni ehenhleni ka ntungu wo tano. Ku tlula kwalaho, ehansi ka Nawu wa Muxe ku khuluka loku nga yimiki ka ngati ku endla wansati a va la nga tengangiki, naswona un’wana ni un’wana loyi a n’wi khumbaka kumbe ku khumba mpahla yakwe leyi totiweke ngati a a fanele ku hlamba naswona a va la nga tengangiki ku kondza ku va nimadyambu.
Wansati loyi u twile hi ta masingita ya Yesu naswona u n’wi lavile. Hikwalaho ka ku ka a nga tenganga, u famba exikarhi ka ntshungu a nga xiyeki hi laha swi nga kotekaka ha kona, a tibyela a ku: “Loko ndzi nga khumba nguvu ya yena ntsena, ndzi ta hanyisiwa.” Loko a endla tano, hi ku anghwetla u twa leswaku ku khuluka ka yena ngati ku omile!
“I mani la khumbeke nguvu ya mina?” Marito wolawo ya Yesu ya fanele ya n’wi tseme nhlana swonghasi! U swi tivise ku yini? ‘Mudyondzisi,’ ku vula Petro, wa wu vona ntshungu lowu wu ku kamanyetaka; xana u vutisela yini leswaku, “Ndzi khumbe hi mani xana?”’
Loko a hundzuluka a languta wansati, Yesu wa hlamusela: “Munhu un’wana u ndzi khumbile hikuva ndzi titwile hi matimba ya mina ma nga huma.” Hakunene, a hi ku khumba loku tolovelekeke, hikuva ku horisa loku vaka kona ku huma eka ntikelo wa Yesu.
Hi ku vona leswaku a nga ponanga, wansati wa ta ivi a wela emahlweni ka Yesu, a tshukile ni ku rhurhumela. Emahlweni ka vanhu hinkwavo, u hlamusela ntiyiso hinkwawo ehenhleni ka vuvabyi byakwe ni ndlela leyi a ha ku horisiwaka ha yona sweswi.
Hi ku susumetiwa hi ku tivula kakwe loku teleke, Yesu hi ntwelo-vusiwana wa n’wi chavelela a ku: “N’wananga, ku pfumela ka wena ku ku hanyisile, famba hi ku rhula, ntshunxeka enhlomulweni wa wena.” I swinene swonghasi ku tiva leswaku Loyi Xikwembu xi n’wi hlawuleke ku fuma misava i munhu wo tano wa musa, wa ntwelo-vusiwana, loyi a khathalelaka vanhu ni loyi a nga ni matimba yo va pfuna! Matewu 9:18-22; Marka 5:21-34; Luka 8:40-48; Levitika 15:25-27.
▪ Yayiro i mani, naswona ha yini a ta eka Yesu?
▪ I xiphiqo xihi lexi wansati un’wana a nga na xona, naswona hikwalaho ka yini ku ta eka Yesu ku ta pfuniwa swi n’wi tikela?
▪ Wansati u horisiwa njhani, naswona Yesu u n’wi chavelela hi ndlela yihi?