A Tshunguriwa Hi Ku Khumba Nguvu Ya Yesu

Mahungu ya ku vuya ka Yesu hi le Dekapolisi ma hangalaka eka Vayuda lava tshamaka en’walunguvupeladyambu bya ribuwa ra Lwandle ra Galeliya. Swi nga ha endleka van’wana va swi twile leswaku eka xidzedze lexa ha ku vaka kona, Yesu u miyete moya ni mati naswona van’wana va swi tiva leswaku u horise vavanuna lava a va ri ni madimona. Hikwalaho, ‘ntshungu lowukulu’ wu hlengeletana elwandle naswona swi nga endleka wu ri eKapernawume hileswi wu nga ta amukela Yesu. (Marka 5:21) Loko a xika, va n’wi langutele hi mahlongati.

Un’wana loyi a langutele ku vona Yesu i Yayiro, ndhuna ya sinagoga leyi kumbexana yi nga eKapernawume. U khinsama emilengeni ya Yesu ivi hi ku phindhaphindha, a ku: “Xinhwanyatana xa mina xa vabya swinene. Ndzi kombela u ta, u ta xi tlhandleka mavoko leswaku xi ta hola, xi hanya.” (Marka 5:23) Xana Yesu u ta xi angula njhani xikombelo xa Yayiro, xo va a pfuna n’wana wakwe wa nhwanyana la nga yexe loyi a nga ni malembe ya 12 naswona a nga wa nkoka eka Yayiro?—Luka 8:42.

Loko a ri endleleni yo ya ekaya ra Yayiro, Yesu u hlangana ni xiyimo xin’wana xo twisa ku vava. Vanhu vo tala lava fambaka na Yesu va tsakile naswona va tivutisa loko va ta n’wi vona a endla singita rin’wana. Hambiswiritano, wansati un’wana exikarhi ka ntshungu u vilerisiwa hi vuvabyi byakwe lebyikulu.

Se a swi endla malembe ya 12, wansati loyi wa Muyuda a karhatiwa hi vuvabyi byo khuluka ngati. U lave mpfuno eka madokodela yo hambanahambana, a tirhisa xuma xakwe hinkwaxo eka vutshunguri lebyi ma byi ringanyeteke. Nilokoswiritano, a nga pfunekanga. Kahlekahle, vuvabyi byakwe byi ye “byi nyanya.”—Marka 5:26.

Xiya leswaku vuvabyi byakwe a byi nga n’wi heti matimba ntsena kambe a byi tlhela byi n’wi khomisa tingana. Hi ntolovelo, munhu loyi a nga ni vuvabyi lebyi, a nga vulavuli hi xiyimo xo tano. Ku tlula kwalaho, wansati loyi a humaka ngati a a ri loyi a nga tengangiki hi ku ya hi Nawu wa Muxe. Un’wana ni u n’wana loyi a n’wi khumbaka kumbe a khumba xiambalo xakwe lexi nga ni ngati u fanele a hlamba hi mati naswona u ta va a nga tenganga ku fikela nimadyambu.—Levhitika 15:25-27.

Wansati loyi ‘u twe hi timhaka ta Yesu’ kutani sweswi u sungula ku n’wi lavalava. Leswi a nga basangiki, u timanyukutela entshungwini leswaku va nga n’wi voni, u tibyela a ku: “Loko ndzo khumba xiambalo xakwe, ndzi ta hola.” Loko se a khumbe nguvu yakwe, u nambe a swi twa leswaku vuvabyi byakwe byo khuluka ngati byi horile. Se u “horisiwile eka vuvabyi byakwe lebyi nga ni khombo.”—Marka 5:27-29.

Hiloko Yesu a ku: “Ndzi khumbe hi mani?” Xana u ehleketa leswaku wansati yoloye u titwa njhani loko a twa marito lawa? Hiloko Petro a hlamula Yesu hi ndlela yo sola a ku: “Mintshungu yi le ku ku manyeteleni.” Kutani hikwalahokayini Yesu a vutisa leswaku, “Ndzi khumbe hi mani?” Yesu u hlamusela a ku: “Ku ni loyi a nga ndzi khumba, hikuva ndzi twe matimba ma huma eka mina.” (Luka 8:45, 46) Matimba lama humaka eka Yesu hi wona ma nga endla leswaku wansati loyi a hola.

Loko a xiya leswaku u voniwile, wansati loyi u khinsama emahlweni ka Yesu a chuhile swinene naswona a ri karhi a rhurhumela. Hiloko a vulavula ntiyiso emahlweni ka vanhu hinkwavo, a va byela hi vuvabyi lebyi a a ri na byona nileswaku wa ha ku horisiwa. Hi musa, Yesu u n’wi chavelela a ku: “N’wananga, ripfumelo ra wena ri ku hanyisile. Famba hi ku rhula, u hanya eka vuvabyi bya wena lebyi nga ni khombo.”—Marka 5:34.

Swi le rivaleni leswaku loyi Xikwembu xi n’wi hlawuleke ku lawula misava, a ngo khathala hi vanhu ntsena kambe u ni ntwelavusiwana ni matimba yo va pfuna.