Ndzima 48

U Suka eKaya Ra Yayiro, Kutani A Tlhela A Endzela eNazareta

SIKU ri ve leri nga bizi eka Yesu—riendzo ra le lwandle ro huma eDekapolisi, a hanyisa wansati la khulukaka ngati, kutani a pfuxa nhwanyana wa Yayiro. Kambe siku a ri si hundza. Entiyisweni loko Yesu a ri karhi a suka ekaya ra Yayiro, vavanuna vambirhi va mabofu va n’wi landza, va huwelela va ku: “N’wana Davhida, hi twele vusiwana.”

Hi ku vitana Yesu tanihi “N’wana Davhida,” vavanuna lava laha va phofula ntshembo wa leswaku Yesu i mudyandzhaka exiluvelweni xa Davhida, ni leswaku i Mesiya la tshembisiweke. Hambi swi ri tano, Yesu u vonaka a honisa ku huwelela ka vona ka mpfuno, kumbexana leswaku a ringa ku phikelela ka vona. Kambe vavanuna lava a va karhali. Va landzela Yesu laha a tshamaka kona, kutani loko a nghena endlwini, va n’wi landzela endzeni.

Kwalaho Yesu wa va vutisa a ku: “Xana ma pfumela leswaku ndzi ni matimba ya ku endla sweswo ke?”

Va hlamula hi ku tiyiseka va ku: “Ina, Hosi.”

Kutani, loko a khumba matihlo ya vona, Yesu u ri: “A ku endleriwe n’wina hi laha mi pfumelaka ha kona.” Hi ku anghwetla va kota ku vona! Endzhaku Yesu u va byela hi ku tiyisa a ku: “Tivoneleni leswaku swi nga tshuki swi tiviwa hi munhu!” Kambe hi ku tala ntsako, va honisa xileriso xa Yesu kutani va vulavula ha yena etikweni hinkwaro.

Loko vavanuna lava va ri karhi va suka, vanhu va tisa wanuna la khomiweke hi mademona loyi demona ri n’wi endleke leswaku a nga vulavuli. Yesu u hlongola demona, naswona hi ku anghwetla wanuna u sungula ku vulavula. Mintshungu yi hlamala masingita lawa, yi ku: “Mhaka leyo tano a yi si vonaka exikarhi ka Vaisrayele.”

Vafarisi va kona na vona. A va swi koti ku landzula masingita lawa, kambe hi ku pfumala ka vona ripfumelo loko biha va phindha ku sola ka vona malunghana ni xihlovo xa mintirho ya Yesu ya matimba, va ku: “U hlongola mademona hi matimba ya hosi ya mademona.”

Hi ku hatlisa endzhaku ka swiendlakalo leswi, Yesu u tlhelela emutini wa ka vona wa Nazareta, eka nkarhi lowu u fambisana ni vadyondzisiwa vakwe. Emahlweni ka lembe rin’we, a a endzerile esinagogeni ivi a va dyondzisa. Hambi leswi vanhu eku sunguleni va hlamaleke marito yakwe yo tsakisa, endzhaku va lwisane ni dyondzo yakwe ivi va ringeta ku n’wi dlaya. Sweswi, hi musa, Yesu u endla matshalatshala man’wana yo pfuna khale ka vaakelani vakwe.

Hambi loko etindhawini tin’wana vanhu va khitikanela eka Yesu, laha va vonaka va nga yi. Kutani ke, hi Savata, u ya esinagogeni ku ya dyondzisa. Vo tala va lava va n’wi twaka va hlamala. Va vutisa va ku: “Xana vutlhari lebyi ni mintirho leyi ya matimba, u swi kume kwihi ke? Xana a hi yena n’wana wa muvatli ke? Mana wa yena, xana a hi yena loyi a vuriwaka Mariya ke? Ni vamakwavo va yena, xana a hi vona va Yakobo, na Yosefa, na Simoni na Yuda ke? Xana vamakwavo va xisati a hi na vona hinkwavo exikarhi ka hina ke, naswona swilo leswi hinkwaswo u swi kuma kwihi xana?”

Va ri: ‘Yesu i munhu wa kwala ntsena ku fana na hina. Hi n’wi vonile a kula, naswona hi tiva ndyangu wa ka vona. A nga va Mesiya hi ndlela yihi?’ Kutani ku nga khathariseki vumbhoni hinkwabyo—vutlhari byakwe lebyikulu ni masingita—va n’wi ala. Hikwalaho ka ku toloveleka ka wona lokukulu, hambi ku ri maxaka ya yena va khunguvanyisiwa hi yena, va endla leswaku Yesu a hetelela hi ku: “Muprofeta a nga soriwi loko ku nga ri etikweni ra rikwavo, ni le maxakeni ya yena.”

Hakunene, Yesu u hlamala ku pfumala ka vona ripfumelo. Kutani a nga endli masingita man’wana kwalaho handle ko veka mavoko yakwe eka vanhu va nga ri vangani lava vabyaka ivi a va horisa. Matewu 9:27-34; 13:54-58; Marka 6:1-6; Esaya 9:7.

▪ Hi ku vitana Yesu tanihi “N’wana Davhida,” vavanuna lava feke mahlo va komba leswaku va tshemba yini?

▪ I nhlamuselo yihi ya masingita ya Yesu leyi Vafarisi va yi tekeke?

▪ Hikwalaho ka yini ku ri musa eka Yesu ku tlhelela ku ya pfuna lava nga eNazareta?

▪ I ku amukeriwa kwihi loku Yesu a ku amukelaka eNazareta, naswona ha yini?