U Endla Masingita Kambe A Va Pfumeli Enazareta

Yesu u tirhe siku hinkwaro. Endzhaku ka riendzo ro leha ro suka eDekapolisi, u horise wansati eka vuvabyi byo khuluka ngati a tlhela a pfuxa xinhwanyatana xa Yayiro. Kambe migingiriko ya siku a yi nga si hela. Loko Yesu a suka ekaya ra Yayiro, vavanuna vambirhi lava feke mahlo va n’wi landzelela, va huwelela va ku: “Hi twele vusiwana N’wana wa Davhida.”—Matewu 9:27.

Loko va vitana Yesu “N’wana wa Davhida,” vavanuna lava va kombisa ripfumelo ra vona ra leswaku Yesu i mudyandzhaka wa xiluvelo xa Davhida naswona i Mesiya. Yesu u honisa ku huwelela ka vona, kumbexana hileswi a lavaka ku vona loko va ta ka va nga miyeli naswona a va miyeli. Loko Yesu a nghena endlwini, vavanuna lava vambirhi va nghena na yena. Yesu u va vutisa a ku: “Xana ma pfumela leswaku ndzi nga swi kota ku mi hanyisa?” Va hlamula hi ku tiyiseka va ku: “Ina, Hosi.” Kutani Yesu u khoma mahlo ya vona ivi a ku: “A swi endleke hi ku landza ripfumelo ra n’wina.”—Matewu 9:28, 29.

Hiloko va sungula ku vona! Yesu u va byela leswaku va nga byeli munhu leswi a swi endleke, hilaha ni van’wana a va byeleke hakona. Kambe leswi va khapakhapaka hi ntsako, endzhakunyana va ya emahlweni va vulavula ha yena hinkwako laha va yaka kona.

Loko vavanuna lava vambirhi va famba, xikan’wekan’we vanhu va tisa wanuna loyi a nga vulavuriki hileswi a nga ni dimona. Yesu u hlongola dimona kutani wanuna loyi a sungula ku vulavula. Mitshungu ya hlamala ivi yi ku: “A ku si tshama ku voniwa nchumu wo fana ni lowu eIsrayele.” Vafarisi na vona va kona. A va swi koti ku kaneta masingita lawa kutani va phindha xihehlo xa vona xa laha masingita ya Yesu ma humaka kona hi ku vula va ku: “U hlongola madimona hi hosi ya madimona.”—Matewu 9:33, 34.

Endzhakunyana ka sweswo, Yesu u tlhelela etikweni ra rikwavo eNazareta kambe sweswi u ni vadyondzisiwa vakwe. Eka lembe leri nga hundza, u dyondzise esinagogeni ya kwalaho. Eku sunguleni vanhu a va hlamarisiwa hi leswi a swi vuleke kambe endzhaku va sungule ku kaneta dyondzo yakwe ni ku ringeta ku n’wi dlaya. Sweswi Yesu u tlhela a ringeta ku pfuna khale ka vaakelani vakwe.

Hi Savata, u tlhelela esinagogeni ku ya dyondzisa. Vanhu vo tala va hlamala ivi va ku: “Xana munhu loyi u byi kuma kwihi vutlhari ni matimba yo endla masingita lawa?” Va ri: “Xana loyi a hi n’wana wa muvatli? Xana a hi n’wana wa Mariya naswona vamakwavo wa yena a hi Yakobo, Yosefa, Simoni na Yudasi ke? Vamakwavo vakwe va xisati xana a hi vona lava hi nga na vona? Kutani, xana munhu loyi u swi kuma kwihi swilo leswi hinkwaswo?”—Matewu 13:54-56.

Vanhu va teka Yesu a fana ni munhu un’wana ni un’wana. Va tibyela leswi, ‘Hi n’wi vonile a kula, xana a nga va Mesiya hi ndlela yihi?’ Vo tala va ala ku pfumela eka yena hambileswi ku nga ni vumbhoni byo tala lebyi katsaka vutlhari ni masingita lawa Yesu a ma endleke. Leswi vanhu va n’wi toloveleke ngopfu, hambi ku ri maxaka yakwe ma ala ku pfumela eka yena lerova va n’wi susumetela ku vula a ku: “Muprofeta wa xiximiwa, handle ka le tikweni ra rikwavo ni le ndyangwini wa ka vona.”—Matewu 13:57.

Yesu u hlamarisiwa hi ku pfumala ka vona ripfumelo. Sweswo swi endla leswaku a nga ha endli masingita man’wana kwalaho ‘handle ka ku veka vanhu lava vabyaka mavoko a va horisa.’—Marka 6:5, 6.