Ndzima 49
Pfhumba Rin’wana Ro Chumayela Ra Galeliya
ENDZHAKU ka kwalomu ka malembe mambirhi ya ku chumayela lokukulu, xana Yesu sweswi u ta sungula ku tshika ni ku swi teka hi ku olova? Hi laha ku hambaneke, u andzisa ntirho wakwe wo chumayela hi ku teka pfhumba rin’wana, ra vunharhu ra Galeliya. U endzela miti ni swimitana hinkwaswo emutini, a dyondzisa emasinagogeni ni ku chumayela mahungu lamanene ya Mfumo. Leswi a swi vonaka eka pfhumba leri swi n’wi khorwisa ngopfu ku tlula rini na rini hi xilaveko xo kurisa ntirho wo chumayela.
Hinkwako laha Yesu a yaka kona, u vona mintshungu yi ri na xilaveko xa ku hanyisiwa ni ku chaveleriwa ka moya. Va fana ni tinyimpfu leti nga riki na murisi, leti karhaleke ni leti cukumetiweke, kutani u va twela vusiwana. U byela vadyondzisiwa vakwe a ku: “Ku tshovela i kukulu, kambe vatirhi a va talanga. Hikokwalaho, khongelani N’wini wa ku tshovela, leswaku a rhuma vatirhi eku tshoveleni ka yena.”
Yesu u na kungu ro endla xanchumu. U vitana vaapostola va 12, lava a va hlawuleke kwalomu ka lembe eku sunguleni. U va avanyisa hi vambirhi-mbirhi, a endla mintlawa ya tsevu ya vachumayeri, naswona u va nyika swiletelo. Wa hlamusela : “Mi nga tshuki mi ya eka vamatiko; naswona mi nga ngheni emitini ya Vasamariya, kambe yanani eka tinyimpfu leti lahlekeke ta yindlu ya Israyele. Kutani loko mi ri karhi mi famba, twarisani mhaka leyi nge: ‘Mfumo wa matilo wu le kusuhi.’”
Mfumo lowu a va fanele ku dyondzisa ha wona hi lowu Yesu a va dyondziseke ku wu khongelela eka xikhongelo xa xikombiso. Mfumo a wu tshinela hi mhaka ya leswi Hosi leyi hlawuriweke ya Xikwembu, Yesu Kriste, a a yi ri kona. Leswaku a veka swilaveko swa vadyondzisiwa vakwe tanihi vayimeri va hulumendhe yoleyo leyi tlulaka ya vanhu, Yesu u va nyika matimba yo horisa vavabyi hambi ku ri ku pfuxa vafi. U va lerisa ku endla mintirho leyi mahala.
U ya emahlweni a byela vayondzisiwa vakwe ku nga tilongeli timbuva eka pfhumba ra vona ro chumayela. “Mi nga longi mali ya nsuku kumbe ya silivere kumbe ya koporo eswikhwameni swa n’wina; mi nga fambi ni nkwama wa timbuva ta ndlela, hambi ti ri tinguvu timbirhi, kumbe tintangu, kumbe nhonga, hikuva mutirhi ú lulameriwe hi swakudya swa yena.” Lava va tlangelaka mahungu va ta ya amukela ivi va nyikela hi swakudya ni vutshamo. Hi laha Yesu a vulaka ha kona: “Loko mi nghena emutini wihi ni wihi, kumbe eximutaneni xihi ni xihi, lavani loyi a fanelaka ku mi amukela, kutani mi tshama eka yena ku kondza loko mi suka.”
Yesu kutani u nyikela swileriso swa hi laha va fanelaka ku tshinelela vini va miti hi mahungu ya Mfumo ha kona. “Loko mi nghena endyangwini,” wa lerisa, “xewetani. Loko swi lulamele ndyangu wolowo, ku rhula ka n’wina a ku te ehenhla ka wona; kambe loko swi nga wu lulamelanga, ku rhula ka n’wina a ku vuyele ka n’wina. Kutani loko va nga mi amukeri, kumbe loko va nga yingisi marito ya n’wina, humani endyangwini wolowo, kumbe emutini wolowo, mi phumunha ntshuri emilengeni ya n’wina.”
Eka muti lowu alaka mahungu ya vona, Yesu u paluxa leswaku ku avanyisa ehenhla ka wona entiyisweni ku ta va lokukulu. Wa hlamusela: “Ndzi tiyisile ndzi ri ka n’wina, hi siku ra ku avanyisiwa, tiko ra Sodoma na Gomora ri ta vevukiseriwa ku tlula muti wolowo.” Matewu 9:35–10:15; Marka 6:6-12; Luka 9:1-5.
▪ Yesu u sungula rini pfhumba ra vunharhu ro dyondzisa ra le Galeliya, naswona i yini leswi ri n’wi khorwisaka swona?
▪ Loko a rhuma vaapostola vakwe va 12 ku ya dyondzisa, i swiletelo swihi leswi a va nyikaka swona?
▪ Ha yini swi ri swinene eka vadyondzisiwa ku dyondzisa leswaku Mfumo wa tshinela?