Ku Chumayela Egaleliya Ni Ku Letela Vaapostola

Yesu u hete malembe mambirhi a ri karhi a chumayela hi ku hiseka. Xana lowu i nkarhi wo hela matimba a nga ha hiseki? Nikatsongo, Yesu u ndlandlamuxa ntirho wa yena wo chumayela hi ku “teka riendzo a ya emitini ni le swimitanini hinkwaswo [swa Galeliya], a ya dyondzisa emasinagogeni, a chumayela mahungu lamanene ya mfumo ni ku hanyisa vanhu lava nga ni mavabyi ni vulema bya mixaka hinkwayo.” (Matewu 9:35) Leswi a swi vonaka swi n’wi endla a hisekela ntirho wo chumayela. Kambe u ta swi endla njhani leswi?

Loko a ri karhi a famba, Yesu u vona vanhu lava lavaka ku pfuniwa ku tiyisa vuxaka bya vona ni Xikwembu ni ku tlhela va chaveleriwa. Va fana ni tinyimpfu leti nga riki na murisi, va tshikileriwile naswona a va khathaleriwi. U va twela vusiwana kutani a byela vadyondzisiwa vakwe a ku: “Ntshovelo i wukulu, kambe vatirhi a va talanga. Hikwalaho kombelani N’wini wa ntshovelo a rhumela vatirhi entshovelweni wakwe.”—Matewu 9:37, 38.

Yesu wa swi tiva leswi nga ta va pfuna. U vitana vaapostola va 12 a va hambanisa va va mitlawa ya tsevu ya vachumayeri. U va nyika swiletelo leswi twisisekaka a ku: “Mi nga yi eka vamatiko naswona mi nga ngheni emitini ya Vasamariya; kambe yanani eka tinyimpfu ta yindlu ya Israyele leti lahlekeke. Loko mi ri karhi mi famba, chumayelani, mi ku: ‘Mfumo wa matilo wu tshinele.’”—Matewu 10:5-7.

Mfumo lowu va nga ta chumayela ha wona hi lowu Yesu a vulavuleke ha wona eka xikhongelo xa hosi. ‘Mfumo wu tshinele’ hikuva Hosi leyi vekiweke hi Xikwembu ku nga Yesu Kreste, yi le xikarhi ka vona. I yini lexi nga kombisaka leswaku vadyondzisiwa vakwe va yimela hulumendhe ya Mfumo lowu? Yesu u va nyika matimba ya ku horisa lava vabyaka ni ku pfuxa lava feke naswona hinkwaswo sweswo va swi endla mahala. Loko swi ri tano, vaapostola va ta swi khathalela njhani swilaveko swa vona swo fana ni swakudya swa siku ni siku?

Yesu u byela vadyondzisiwa va yena leswaku va nga lunghiseleli swakudya loko va ri eriendzweni leri ro chumayela. A va fanelanga va nghenisa nsuku, silivhere kumbe koporo eminkwameni ya vona. Nakambe a swi lavi va rhwala nkwama wa swakudya, swiambalo kumbe maphaxana. Hikwalahokayini? Yesu u va tiyisekisa a ku: “Mutirhi u fanele a kuma swakudya swakwe.” (Matewu 10:10) Vanhu lava va va kumaka, lava tsakelaka rungula ra vona va ta pfuneta ku khathalela swilaveko swa vadyondzisiwa. Yesu u ri: “Emutini lowu mi nga ta nghena eka wona, tshamani kona kukondza mi suka endhawini yoleyo.”—Marka 6:10.

Yesu u tlhela a nyika swiletelo swo vulavula ni vini va muti hi rungula ra Mfumo, a ku: “Loko mi nghena endlwini, xewetani vandyangu. Loko yindlu ya kona swi yi fanela, a yi ve ni ku rhula; kambe loko swi nga yi faneli, ku rhula ka n’wina a ku tlhelele eka n’wina. Laha va nga mi amukeliki kumbe va nga mi yingisiki, loko mi huma endlwini yoleyo kumbe emutini wolowo, phumunhani ritshuri emilengeni ya n’wina.”—Matewu 10:12-14.

Swi nga endleka leswaku muti kumbe muganga hinkwawo a wu nga ri amukeli rungula ra vona. Sweswo swi ta vula yini hi ndhawu yoleyo? Yesu u boxa leswaku yi ta weriwa hi vuavanyisi lebyikulu. U ri: “Ndzi tiyisile ndzi ri eka n’wina, muti wolowo wu ta xupuriwa swinene ku tlula tiko ra Sodoma na Gomora hi Siku ra Vuavanyisi.”—Matewu 10:15.