Ndzima 56

I Yini Lexi Nyamisaka Munhu?

KU LWISANA na Yesu ka kula swinene. Vo tala va vadyondzisiwa vakwe a vo tifambela ntsena kambe Vayuda eYudiya va lava ku n’wi dlaya, hi laha va swi endleke ha kona loko a ri eYerusalema hi nkarhi wa Paseka ya 31 C.E.

Sweswi i Paseka ya 32 C.E. Hi ku fanana, hi ku ya hi xilaveko xa Xikwembu xo va kona, Yesu u ya ePasekeni eYerusalema. Hambi swi ri tano, u endla tano hi vukheta hikuva vutomi byakwe byi le khombyeni. Endzhaku ka sweswo u tlhelela eGaleliya.

Kumbexana Yesu u le Kapernawume loko Vafarisi ni vatsari lava humaka eYerusalema va ta eka yena. Va lava tindlela leti va nga n’wi hehlaka ha tona to tlula nawu wa vukhongeri. Va vutisa va ku: “Hikwalaho ka yini vadyondzisiwa va wena va tshika mikhuva leyi hi yi kumeke eka lava khale xana? Hikuva va dya va nga hlambanga mavoko.” Lowu a hi nchumu lowu laviwaka hi Xikwembu, kambe Vafarisi va wu languta tanihi nandzu lowukulu ku ka u nga endli mukhuva lowu wa xintu, lowu a wu katsa ku hlamba ku ya fika eswikokolweni.

Ematshan’wini yo va hlamula malunghana ni xihehlo xa vona, Yesu u kombetela eka vubihi ni ku tlula ka vona Nawu wa Xikwembu hi ku swi rhandza. “Na n’wina, mi tlulela yini nawu wa Xikwembu hi mikhuva ya n’wina ke?” u lava ku tiva. “Hikuva Xikwembu xi te: ‘U va ni xichavo eka tata wa wena ni mana wa wena’; na swona xi te: ‘Loyi a rhukanaka tata wa yena kumbe mana wa yena a a dlawe.’ Kasi n’wina mi ri: ‘Loyi a nge ka tata wa yena kumbe mana wa yena: Leswi a ndzi ta fanela ku ku pfuna ha swona, i mhamba leyi hlayiseriweke Xikwembu, munhu loyi a nga ha ri ni fanelo ya ku pfuna tata wa yena.’”

Hakunene, Vafarisi va dyondzisa leswaku mali, nhundzu, kumbe nchumu wun’wana ni wun’wana lowu nyikeriweke tanihi nyiko eka Xikwembu i wa tempele, naswona wu nga ka wu nga tirhiseriwi xikongomelo xin’wana. Kambe, kahle-kahle, nyiko leyi nyikeriweke yi hlayisiwa hi munhu la yi nyikeleke. Hi ndlela leyi, n’wana, hi ku vula ntsena leswaku mali kumbe nhundzu ya yena i “korbani”—nyiko leyi nyikeriweke eka Xikwembu kumbe etempeleni—a a papalata vutihlamuleri bya yena byo pfuna vatswari lava dyuhaleke, lava va nga ha vaka va ri eka swihinga leswi heleleke.

Loko a sola ku soholotiwa loko biha ka Vafarisi ka Nawu wa Xikwembu hi mfanelo, Yesu u ri: “Kutani ke mi onha rito ra Xikwembu hi mikhuva ya n’wina. Vakanganyisi, Esaya a a vula n’wina hakunene loko a te: ‘Tiko leri ri ndzi chava hi nomo, kambe mbilu ya rona yi le kule na mina. Va tikarhata ntsena hi ku ndzi nkhinsamela; tidyondzo leti va ti dyondzisaka i milawu ya vanhu ntsena.’”

Kumbexana ntshungu a wu tlhelele endzhaku leswaku Vafarisi va ta konanisa Yesu. Sweswi, loko Vafarisi va ri hava nhlamulo eka ndzayo ya Yesu ya matimba eka vona, u vitana ntshungu wu ta ekusuhi. U ri: “Yingisani, mi twisisa. Leswi nghenaka enon’weni, a hi swona leswi nyamisaka munhu, kambe leswi humaka enon’weni hi swona leswi nyamisaka munhu.”

Endzhakunyana, loko va nghena endlwini, vadyondzisiwa vakwe va vutisa va ku: “Xana wa swi tiva leswaku Vafarisi va khunguvanyekile, loko va twe marito ya wena ke?”

“Ximila xin’wana ni xin’wana lexi nga simekiwangiki hi Tata wa mina wa le tilweni, xi ta tsuvuriwa,” ku hlamula Yesu. “Va tshikeni, i lavo-fe-mahlo lava fambisaka lavo-fe-mahlo. Loko lowo-fe-mahlo a fambisa lowo-fe-mahlo, va ta wela ekheleni hi vumbirhi bya vona.”

Yesu u vonaka a hlamarisiwile loko, hi ku yimela vadyondzisiwa, Petro a kombela nhlamuselo malunghana ni leswi nyamisaka munhu. “Xana ni sweswi ma ha pfumala ku twisisa na n’wina ke?” ku vutisa Yesu. “Xana a mi swi tivi leswaku hinkwaswo leswi nghenaka enon’weni, swi ya ekhwirini, kutani swi cukumetiwa enhoveni ke? Kasi leswi humaka enon’weni, swi pfa hi le mbilwini, kutani hi swona leswi nyamisaka munhu. Hikuva miehleketo leyo biha, ni ku dlayana, ni vuoswi, ni vuphukuphuku, ni ku yiva, ni vumbhoni byo hemba, ni ku sandzana, swi huma embilwini; hi swona leswi nyamisaka munhu; kambe ku dya hi mavoko lama nga hlambiwangiki, a hi xilo lexi nyamisaka munhu.”

Laha Yesu a nga soli mahanyelo lama tolovelekeke. A nga vuli swona leswaku munhu a nga fanelanga ku hlamba mavoko emahlweni ko lunghiselela swakudya kumbe ku dya swakudya. Kambe ke, Yesu u sola vukanganyisi bya varhangeri va vukhongeri lava hi mano va ringetaka ku hundzula milawu leyinene ya Xikwembu hi ku sindzisa mikhuva leyi nga riki ya matsalwa. Ina, i mintirho leyo biha leyi nyamisaka munhu naswona Yesu u komba leswaku leswi swi huma embilwini ya munhu. Yohane 7:1; Deuteronoma 16:16; Matewu 15:1-20; Marka 7:1-23; Eksoda 20:12; 21:17; Esaya 29:13.

▪ I nkaneto wihi lowu Yesu manuku a kongomanaka na wona?

▪ I xihehlo xihi lexi Vafarisi va xi endlaka, kambe hi ku ya hi Yesu, xana Vafarisi va tlula Nawu wa Xikwembu hi ku swi rhandza hi ndlela yihi?

▪ I yini leswi Yesu a swi hlavutelaka tanihi swilo leswi nyamisaka munhu?