Ndzima 58

Swinkwa Ni Comela

MINTSHUNGU leyikulu yi hlengeletane eka Yesu le Dekapolisi. Vo tala va te va huma kule va ta eka ndhawu leyi yi akiweke ngopfu hi Vamatiko leswaku va ta n’wi yingisela ni ku hanyisiwa emavabyini ya vona. Va te na swirhundzu leswikulu, kumbe minkwama, leyi hi ntolovelo va yi tirhiselaka ku rhwala swakudya loko va famba etindhawini ta Vamatiko.

Hambi swi ri tano, eku heteleleni, Yesu u vitana vadyondzisiwa vakwe kutani a ku: “Ndzi twela ntshungu lowu evusiwana, hikuva swi endla masiku manharhu va tshame na mina, kutani a va ha ri na swakudya. Hikokwalaho loko ndzi va tlherisela makaya va ri ni ndlala, va ta wa endleleni, hikuva van’wana va vona va huma kule.”

“Va nga laveriwa kwihi swinkwa leswi va nga dyaka va xurha kwala mananga ke?” ku vutisa vadyondzisiwa.

Yesu wa vutisa: “Mi ni swinkwa swingani ke?”

“Swa 7,” va hlamula, “ni tinhlampfinyana ti nga ri tingani.”

Loko a lerisa vanhu ku tshama ehansi, Yesu u teka swinkwa ni tinhlampfi, a khongela eka Xikwembu, a swi phema, kutani a sungula ku nyika vadyondzisiwa vakwe. Na vona, va nyika vanhu, lava hinkwavo va dyeke va xurha. Endzhaku ka kwalaho, loko leswi saleke swi hlengeletiwa, ku va na swirhundzu swa nkombo swa swakudya leswi taleke, hambi leswi kwalomu ka vavanuna va 4 000, kun’we ni vavasati ni vana, lava dyeke!

Yesu a tlherisa mintshungu, a khandziya byatso ni vadyondzisiwa vakwe, kutani a tsemakanya eribuweni ra le vupela-dyambu ra Lwandle ra Galeliya. Laha Vafarisi, eka nkarhi lowu va ri ni swirho swa ntlawa wa vukhongeri bya Vasaduki, va ringeta ku ringa Yesu hi ku n’wi kombela ku endla xikombiso lexi humaka etilweni.

Hi ku vona matshalatshala ya vona yo n’wi ringa, Yesu wa hlamula a ku: “Ni madyambu, mi ri: ‘Ri ta xa swinene, hikuva tilo ri tshwukile ku fana ni ndzilo.’ Kutani ni mixo mi ri: ‘Namuntlha yi ta na, hikuva tilo ri tshwukile ni ku vimba ri vimbile.’ Mi tiva ku xiya nghohe ya tilo, kambe mi tsandzeka ku xiya mahlori ya minkarhi leyi!”

Hikwalaho, Yesu u va vitana rixaka ra vadyohi ni vaoswi kutani a va tsundzuxa leswaku, hi laha a byeleke Vafarisi ha kona eku sunguleni, ku hava xikombiso lexi va nga ta nyikiwa xona handle ka xikombiso xa Yonasi. Loko a famba, yena ni vadyondzisiwa vakwe va nghena ebyatsweni kutani va kongoma eBetsayida eribuweni ra le n’walungu-vuxa ra Lwandle ra Galeliya. Endleleni vadyondzisiwa va tshubula leswaku va rivale ku ta ni swinkwa, kwalaho ku ri na xinkwa xin’we exikarhi ka vona.

Loko a tsundzuka ku hlangana kakwe ni Vafarisi ni vaseketeri va Heroda va Vasaduki, Yesu wa tsundzuxa a ku: “Tlharihani, mi chava comela xa Vafarisi, ni comela xa Heroda.” Entiyisweni, ku xaxametiwa ka comela ku endla vadyondzisiwa vakwe va ehleketa leswaku Yesu u kombetela eku rivaleni ka vona ka ku ta ni xinkwa, comela entiyisweni emianakanyweni ya vona xi ringanyeta mianakanyo ya xinkwa, kutani va sungula ku kanetana hi mhaka leyi. Loko a xiya xidoledole xa vona, Yesu u ri: “Hikwalaho ka yini mi kanetana hi leswi mi nga riki na swinkwa xana?”

Sweswinyana, Yesu a a ha ku lunghiselela magidi ya vanhu swinkwa hi singita, a endla singita leri ro hetelela kumbexana siku rin’we kumbe mambirhi emahlweninyana ntsena. Va fanele va swi tiva leswaku a nga karhateki hi ku pfumaleka ka swinkwa swa xiviri. Wa va tsundzuxa a ku: “Xana a mi tsundzuki swinkwa swa ntlhanu leswi nga phamela vanhu va 5 000, ni leswaku mi tatile swirhundzu swingani leswikulu hi mahlanhla xana?”

“Hi rhwele 12,” va hlamula.

“Ni siku ndzi phameleke lava va 4 000 hi swinkwa swa 7, mi rhwele swirhundzu swingani leswi a swi tele hi mahlanhla ke?”

“Swa 7,” va hlamula.

“A mi si twisisa na sweswi ke?” ku vutisa Yesu. “Hikwalaho ka yini mi nga swi twi leswaku a ndzi nga vulavuli na n’wina hi ta swinkwa xana? Chavani comela xa Vafarisi ni xa Vasaduki!”

Eku heteleleni vadyondzisiwa va twisisa. Comela, lexi endlaka leswaku nchumu wu vila ivi xi endla leswaku xinkwa xi kukumuka, a ku ri rito leri a ri tirhisiwa ku hlamusela nthyakiso. Kutani sweswi vadyondzisiwa va twisisa leswaku Yesu u tirhisa ku fanekisela, leswaku a va tsundzuxa ku tivonela eka “tidyondzo ta Vafarisi ni ta Vasaduki,” ku nga dyondzo leyi nga ni vuyelo lebyi thyakisaka. Marka 8:1-21; Matewu 15:32–16:12.

▪ Ha yini vanhu va ri na swirhundzu leswikulu swa swakudya?

▪ Endzhaku ka loko a suke eDekapolisi, i mapfhumba wahi ya byatso lama Yesu a ma tekaka?

▪ I xidoledole xihi lexi vadyondzisiwa va nga na xona malunghana ni nhlamuselo ya Yesu ehenhleni ka comela?

▪ Yesu u vula yini hi xiga “comela xa Vafarisi ni xa Vasaduki”?