U Endla Leswaku Ku Va Ni Swinkwa Swo Tala Ni Ku Lemukisa Hi Comela

Ntshungu lowukulu wu ya eka Yesu exifundzheni xa le Dekapolisi, hi le tlhelo ra le vuxeni bya Lwandle ra Galeliya. Va tele ku ta n’wi twa ni ku horisiwa naswona va khome tibasikiti letikulu leti nga ni swakudya.

Loko nkarhi wu ri karhi wu famba, Yesu u byela vadyondzisiwa vakwe a ku: “Ntshungu lowu ndzi wu twela vusiwana, hikuva wu ni masiku manharhu wu tshame na mina naswona a wu na swakudya. Loko ndzo wu tlherisa wu ri ni ndlala, wu ta wa endleleni naswona van’wana eka wona va huma ekule swinene.” Vadyondzisiwa va vutisa va ku: “Hi ta swi kuma kwihi swinkwa swo xurhisa vanhu lava kwala nhoveni?”—Marka 8:2-4.

Hiloko Yesu a ku eka vona: “Mi ni swinkwa swingani?” Vadyondzisiwa va n’wi hlamula va ku: “Swa nkombo ni tihlampfinyana ti nga ri tingani.” (Matewu 15:34) Kutani Yesu a kombela vanhu leswaku va tshama ehansi. Hiloko a teka swinkwa ni tihlampfi ivi a khongela eka Xikwembu kutani endzhaku a swi nyika vadyondzisiwa vakwe leswaku va nyika vanhu. Lexi tsakisaka, hinkwavo va dye va xurha. Loko leswi saleke swi hlengeletiwa swi tate tibasikiti letikulu ta nkombo to chela swakudya, hinkwavo va dyile hambileswi a ku ri ni vavanuna va kwalomu ka 4 000, ku katsa ni vavasati ni vana!

Endzhaku ka loko Yesu a byele ntshungu leswaku wu famba, yena ni vadyondzisiwa vakwe va tsemakanye hi xikepe va ya Magadani evupeladyambu bya hlaluko wa Lwandle ra Galeliya. Kwalaho, Vafarisi lava nga ni mpambukwa wun’wana wa Vasaduki va ringeta ku ringa Yesu hi ku n’wi kombela ku endla singita leri humaka etilweni.

Loko a vona leswi va swi kunguhataka, Yesu u va hlamula a ku: “Loko ri pela mi tolovele ku vula mi ku, ‘Ku ta va ni maxelo lamanene, hikuva xibakabaka xi tshwukile,’ naswona nimixo mi ri, ‘Namuntlha ku ta titimela ku tlhela ku na mpfula, hikuva xibakabaka xi tshwukile, xi tlhela xi va ni mapapa.’ Ma swi tiva ku hlamusela ndlela leyi xibakabaka xi langutekaka ha yona, kambe mi tsandzeka ku hlamusela swikombiso swa mikarhi.” (Matewu 16:2, 3) Yesu u byela Vafarisi ni Vasaduki leswaku a ku na singita leri va nga ta ri vona handle ka singita ra Yonasi.

Hiloko Yesu ni vadyondzisiwa vakwe va khandziya xikepe va kongoma eBetsayida hi le n’walunguvuxa bya hlaluko ra lwandle. Loko va ri endleleni, vadyondzisiwa va xiya leswaku va rivale xinkwa. Va ni lofo rin’we ntsena. Leswi a ri tsundzukaka kahle bulo leri a ha ku va na rona ni Vafarisi ni Vasaduki lava a va seketela Heroda, Yesu u va lemukisa a ku: “Tshamani mi pfule mahlo naswona tivoneleni eka comela xa Vafarisi ni comela xa Heroda.” Vadyondzisiwa vakwe va ehleketa leswaku loko a vulavula hi comela, u vula vona hikwalaho ka leswi a va rivale ku ta ni xinkwa. Leswi a xiyeke leswaku va endle xihoxo, Yesu u ri: “Hikwalaho ka yini mi holova hi leswi mi nga riki na swinkwa?”—Marka 8:15-17.

Yesu a ha ku nyika vanhu va magidi swinkwa. Hikwalaho, vadyondzisiwa va fanele va swi tiva leswaku a nga karhateki hi ku pfumaleka ka swinkwa swa xiviri. U va vutisa a ku: “Xana a mi tsundzuki loko ndzi phamela vavanuna va 5 000 hi swinkwa swa ntlhanu, xana mi hlengelete tibasikiti tingani ta leswi swi nga sala?” Va n’wi hlamula va ku: “Ta 12.” Yesu u ya emahlweni a ku: “Loko ndzi phamela vavanuna va 4 000 hi swinkwa swa nkombo, i tibasikiti tingani letikulu leti mi nga ti tata hi leswi nga sala?” Va n’wi hlamula va ku: “Ta nkombo.”—Marka 8:18-20.

Yesu u va vutisa a ku: “Hikwalaho ka yini mi nga swi xiyi leswaku a ndzi nga vulavuli hi xinkwa ke?” U tlhela a ku: “Tivoneleni eka comela xa Vafarisi ni Vasaduki.”—Matewu 16:11.

Eku heteleleni, vadyondzisiwa va swi twisisile leswi a swi vulaka. Comela xi tirhiseriwa ku virisa swilo swo karhi ni ku endla leswaku xinkwa xi kukumuka. Laha Yesu u tirhisa comela ku fanekisela vukanganyisi. U lemukisa vadyondzisiwa leswaku va tivonela eka “dyondzo ya Vafarisi ni ya Vasaduki,” leyi nga ni vukanganyisi.—Matewu 16:12.