Ndzima 62

Dyondzo Yo Titsongahata

ENDZHAKU ka ku hanyisa jaha leri nga ni demona exifundzeni xa le kusuhi na Khezariya wa Filipiya, Yesu u navela ku tlhelela ekaya eKapernawume. Hambi swi ri tano, u lava ku va yexe ni vayondzisiwa vakwe eriendzweni leswaku a ta ya emahlweni a va lunghiselela rifu rakwe ni vutihlamuleri bya vona endzhaku ka kwalaho. “N’wana-wa-Munhu ú ta nyiketiwa sweswi emavokweni ya vanhu,” wa va hlamusela, “va ta n’wi dlaya; loko va n’wi dlele, u ta pfuka eku feni hi siku ra vunharhu.”

Hambi leswi, Yesu emahlweninyana a vulavuleke hi leswi naswona vaapostola vanharhu entiyisweni va vone ku hundzuka loku enkarhini lowu ku “suka” kakwe ku vulavuriweke hi wona, valandzeri vakwe ni sweswi a va si yi twisisa mhaka leyi. Hambi leswi ku nga hava ni un’we eka vona la ringetaka ku landzula leswaku u ta dlawa, hi laha Petro a endleke ha kona eku sunguleni, va chava ku n’wi vutisa ku ya emahlweni hi ta swona.

Eku heteleleni va fika eKapernawume, laha a ku ri muxaka wa kaya ra xisekelo enkarhini wa vutirheli bya Yesu. Nakambe i tiko-xikaya ra Petro ni vaapostola van’wana vo hlayanyana. Kwalaho, vavanuna lava hlengeletaka nhlengo wa tempele va tshinelela Petro. Kumbexana va ringeta ku katsa Yesu eka xidyoho xo karhi xa mukhuva lowu amukeriwaka, va vutisa: “Xana mudyondzisi wa n’wina a nga humesi nhlengo [tidrakema timbirhi] wa Tempele ke?”

“Ina,” Petro wa hlamula.

Yesu, loyi a nga ha vaka a fike endlwini hi ku hatlisa endzhaku ka kwalaho, wa swi tiva leswi humeleleke. Kutani hambi loko Petro a nga si n’wi byela mhaka, Yesu wa vutisa: “Xana u anakanya yini Simoni? Tihosi ta misava ti luvisa kumbe ku therisa vamani xana? Xana i vana va tona, kumbe i vanhu va le handle xana?”

“I vanhu va le handle,” Petro wa hlamula.

“Loko swi ri tano, vana va tona a va therisiwi,” Yesu wa xiya. Tanihi leswi Tata wa Yesu a nga Hosi ya misava hinkwayo, Loyi a gandzeriwaka etempeleni, entiyisweni a hi xilaveko lexi bohaka eka N’wana wa Xikwembu ku hakela nhlengo wa tempele. “Kambe ku endlela leswaku hi nga va khunguvanyisi,” ku vula Yesu, “yana elwandle, u ya ringela; kutani nhlampfi leyo rhanga leyi u nga ta yi phasa, yi khome, u yi ahlamisa nomo; u ta kuma mali [xitatera] kona; yi teke, u va nyika yona, u humesela mina na wena.”

Loko vadyondzisiwa va hlangana kun’we endzhaku ka ku tlhelela ka vona eKapernawume, kumbexana endlwini ya Petro, va vutisa: “Lonkulu eMfun’weni wa matilo i mani xana?” Yesu wa swi tiva leswaku i yini lexi tlhontlhaka xivutiso xa vona, hikuva wa swi tiva leswi a swi humelela exikarhi ka vona loko va ta endzhaku ka yena loko va tlhelela eKhezariya wa Filipiya. Kutani wa vutisa: “A mi kanetana hi tihi endleleni?” Hi ku khomiwa hi tingana, vadyondzisiwa va miyela, hikuva a va kanetana hi leswaku i mani lonkulu exikarhi ka vona.

Endzhaku ka kwalomu ka malembe manharhu ya ku dyondzisa ka Yesu, xana swa twala leswaku vadyondzisiwa a va ta va ni ku kanetana ko tano? Kutani, swi paluxa nkucetelo wa matimba wa ku nga hetiseki ka vanhu, kun’we ni wa masungulo ya vukhongeri. Vukhongeri bya Vayuda lebyi vaapostola va kurisiweke eka byona byi kandziyise xiyimo kumbe xikhundla emintirhweni hinkwayo. Ku ya emahlweni, kumbexana Petro, hikwalaho ka xitshembiso xa Yesu xo amukela “swilotlelo” swin’wana swa Mfumo, u titwe a ri lonkulu. Yakobo na Yohane, va nga ha va va ve na mianakanyo leyi fanaka ya ku rhandziwa hi ku vona ku hundzuka ka Yesu.

Hambi swi ri tano, Yesu u endla xikombiso lexi susumetaka hi matshalatshala yo lulamisa malangutelo ya vona. U vitana n’wana, a n’wi yimisa exikarhi ka vona, a n’wi vukarha, ivi a ku: “Ndzi tiyisile ndzi ri ka n’wina, loko mi nga hundzuki mi fana ni vana, a mi nga ngheni eMfun’weni wa matilo. Hikokwalaho ke, loyi a titsongahataka kukotisa n’wana loyi, hi yena la nga lonkulu eMfun’weni wa matilo. Na swona loyi a amukelaka n’wana wo kota loyi hi vito ra mina, ú amukela mina.”

Mayana ndlela leyi hlamarisaka yo lulamisa vadyondzisiwa vakwe! Yesu a nga va hlundzukeli ivi a va vula vatinyungubyisi, vamakwanga kumbe lava tinavelelaka swa le henhla. E-e, kambe u kombisa dyondzo yakwe leyi lulamisaka hi ku tirhisa xikombiso xa vana lavantsongo, lava hi ku ya hi ntumbuluko va titsongahataka ni lava nga ti naveleriki swa le henhla naswona lava hi ntolovelo va nga riki na mianakanyo ya xikhundla exikarhi ka vona. Xisweswo Yesu u komba leswaku vadyondzisiwa va yena va fanele ku kurisa timfanelo ta vana lava titsongahataka. Loko Yesu a dlayelela u ri: “Hikuva la nga lontsongo exikarhi ka n’wina hinkwenu, hi yena loyi a nga lonkulu.” Matewu 17:22-27; 18:1-5; Marka 9:30-37; Luka 9:43-48.

▪ Loko a tlhelela eKapernawume, i dyondzo yihi leyi Yesu a yi phindhaka, naswona yi amukeriwa njhani?

▪ Hikwalaho ka yini Yesu swi nga n’wi bohi ku hakela nhlengo wa tempele, kambe ha yini a wu hakela?

▪ I yini lexi kumbexana xi vangeke ku kanetana ka vadyondzisiwa, naswona Yesu u va lulamisa hi ndlela yihi?