Dyondzo Ya Nkoka Ya Ku Titsongahata

Endzhaku ka xiendlakalo xa ku hundzuriwa hi singita ni ku horisa mufana loyi a khomiweke hi dimona emutini wa Khezariya wa Filipi, Yesu u kongoma eKapernawume. U famba ni vadyondzisiwa vakwe ntsena va nga voniwi hi munhu leswaku mitshungu ‘yi nga swi tivi.’ (Marka 9:30) Leswi swi n’wi nyika nkarhi wo pfuna vadyondzisiwa vakwe leswaku va lunghekela rifu rakwe ni ntirho lowu va nga ta wu endla loko a file. U va byela a ku: “N’wana wa munhu u ta xavisiwa, a tlhela a dlayiwa, kutani u ta pfuxiwa hi siku ra vunharhu.”—Matewu 17:22, 23.

Mhaka yoleyo a yi nga fanelanga yi hlamarisa vadyondzisiwa vakwe. A hi khale ngopfu Yesu a ha ku vulavula hi ta ku dlayiwa kakwe, hambileswi Petro a aleke leswaku leswi a swi ta endleka. (Matewu 16:21, 22) Nakambe vaapostola lavanharhu va vone ku hundzuriwa kakwe hi singita va tlhela va twa bulo leri vulavulaka hi ku “tlhandluka” ka Yesu. (Luka 9:31) Sweswi valandzeri vakwe va “ni gome lerikulu” hileswi Yesu a swi vulaka, hambileswi va nga swi twisisiki hi ku helela leswi marito yakwe ma vulaka swona. (Matewu 17:23) Hambiswiritano, va chava ku ya emahlweni va n’wi vutisa hi swona.

Hi ku famba ka nkarhi va ya eKapernawume, laha Yesu a a tirhela kona ni laha vaapostola vo hlayanyana a va tshama kona. Kwalaho, vavanuna lava hlengeletaka swibalo swa tempele va ya eka Petro. Kumbexana a va ringeta ku hehla Yesu hi ku tsandzeka ku hakela swibalo hi ku vutisa va ku: “Xana mudyondzisi wa n’wina a nga hakeli xibalo xa tempele?”—Matewu 17:24.

Petro u hlamula a ku: “Wa hakela.” Yesu ana se wa swi tiva leswi nga eku endlekeni. Hikwalaho, ku ri ni ku va Yesu a yimela leswaku Petro a vulavula hi mhaka leyi, u n’wi vutisa a ku: “U swi vonisa ku yini, Simoni? Xana tihosi ta misava ti yi kuma eka vamani mali ya xibalo? Xana ti yi kuma eka vana va tona kumbe eka vafambi?” Petro a hlamula a ku: “Eka vafambi.” Hiloko Yesu a ku: “Kutani vana va tona a va hakeli xibalo.”—Matewu 17:25, 26.

Tata wa Yesu i Hosi ya vuako hinkwabyo ni Loyi a gandzeriwaka etempeleni. Hikwalaho, N’wana wa Xikwembu a nga boheki hi ku ya hi nawu ku hakela xibalo xa tempele. Yesu u ri: “Kambe leswaku hi nga va khunguvanyisi, yana elwandle, u ya petela kutani u teka nhlampfi yo sungula leyi u nga ta yi phasa, loko u pfula nomu wa yona, u ta kuma mali ya silivhere [mali ya nsimbhi ya statera, leyi a yi vitaniwa tetradrachma]. Yi teke u ya hakelela mina na wena.”—Matewu 17:27.

Vadyondzisiwa va hlengeletana, kutani va vutisa Yesu mayelana ni loyi a nga ta va lonkulu eMfun’weni. Vavanuna lava a va chava ku vutisa Yesu hi ta rifu rakwe leri taka kambe sweswi a va chavi ku n’wi vutisa hi ta vumundzuku bya vona. Yesu wa swi tiva leswi va swi ehleketaka. I mhaka leyi a va holova hayona loko va n’wi landzela hi le ndzhaku eriendzweni ra vona ro tlhelela eKapernawume. Hikwalaho, u va vutisa a ku: “A mi holovisa hi yini endleleni?” (Marka 9:33) Hi ku khomiwa hi tingana, vadyondzisiwa va miyela hikuva a va holovisana hi leswaku i mani lonkulu exikarhi ka vona. Eku heteleleni, vaapostola va vutisa Yesu xivutiso lexi a va kanetana hi xona va ku: “Kahlekahle i mani lonkulu eMfun’weni wa matilo?”—Matewu 18:1.

Swa hlamarisa ku vona vadyondzisiwa va ya emahlweni va phikizana hi mhaka leyi endzhaku ko heta malembe manharhu va ri karhi va yingisa ni ku xiyisisa ndlela leyi Yesu a endlaka swilo hayona. Nilokoswiritano, va velekiwe ni xidyoho. Nakambe va kulele evukhongerini lebyi a byi teka swikhundlha swi ri swa nkoka. Ku engetela kwalaho, Petro a ha ku twa Yesu a n’wi tshembisa “swikhiya” swa Mfumo. Xana sweswo swi nga va swi n’wi endle a titwa a tlakukile? Swi nga endleka Yakobo na Yohane na vona va titwe tano hileswi va tivoneleke hi ya vona loko Yesu a hundzuriwa hi singita.

Swi nga ri na mhaka leswi endlekeke, Yesu u lulamisa langutelo ra vona. U vitana n’wana a n’wi yimisa exikarhi ka vona ivi a byela vadyondzisiwa a ku: “Ndzi tiyisile ndzi ri eka n’wina, loko mi nga hundzuki mi fana ni vana, a mi nge ngheni eMfun’weni wa matilo. Hikwalaho, loyi a nga ta titsongahata ku fana ni n’wana loyi hi yena lonkulu eMfun’weni wa matilo; naswona loyi a amukelaka un’wana wa vana lava hikwalaho ka vito ra mina wa ndzi amukela na mina.”—Matewu 18:3-5.

Mayana ndlela leyinene yo dyondzisa! Yesu a nga va hlundzukeli vadyondzisiwa vakwe ivi a va vitana lava nga ni makwanga kumbe lava nga ni ku navela ko biha. Kambe u va dyondzisa hi ku tirhisa n’wana. Vana a va dumanga kumbe ku va eka xiyimo xa le henhla. Hikwalaho, Yesu u kombisa vadyondzisiwa vakwe leswaku va fanele va hanya ku fana ni vana. Kutani Yesu u gimeta dyondzo leyi eka vadyondzisiwa vakwe hi ku vula a ku: “Loyi a tikhomaka tanihi lontsongo exikarhi ka n’wina hi yena lonkulu.”—Luka 9:48.