Ndzima 72
Yesu A Rhuma Va 70
I XIXIKANA xa 32 C.E., malembe manharhu lama teleke ku sukela loko Yesu a khuvuriwile. Yena ni vadyondzisiwa va yena va ha ku va kona eNkhubyeni wa le Mitsongeni eYerusalema, naswona kahle-kahle va ha ri ekusuhi. Entiyisweni, Yesu u heta nkarhi wo tala wa tin’hweti ta tsevu leti seleke ta vutirheli byakwe eYudiya kumbe entsungeni wa Nambu wa Yordani emugangeni wa Periya. Nsimu leyi yi lava ku hlanganisiwa na yona.
I ntiyiso, endzhaku ka Paseka ya 30 C.E., Yesu u hete tin’hweti ta nhungu a chumayela eYudiya. Kambe endzhaku ka loko Vayuda va ringete ku n’wi dlaya kwalaho hi Paseka ya 31 C.E., u hete lembe leri tlhandlhamaka ni hafu a ri karhi a dyondzisa hi laha ku hlawulekeke eGaleliya. Hi nkarhi wolowo, u vumbe nhlengeletano leyikulu ya vachumayeri lava leteriweke kahle, xilo lexi a a nga ri na xona eku sunguleni. Kutani sweswi u sungula tsima lerikulu ro hetelela ro veka vumbhoni eYudiya.
Yesu u hlela tsima leri hi ku hlawula vadyondzisiwa va 70 kutani a va rhuma ha vambirhi-mbirhi. Xisweswo, hinkwavo a va ri swipano swa 35 swa vachumayeri va Mfumo ku tirha nsimu leyi. Va rhanga va ya emutini ni le ndhawini yin’wana ni yin’wana leyi Yesu, handle ko kanakana a ri ni vaapostola vakwe, a kunguhata ku famba eka yona.
Ematshan’wini yo rhumela lava 70 emasinagogeni, Yesu u va byela leswaku va ngena emakaya ya vanhu, a hlamusela a ku: “Endlwini yihi ni yihi leyi mi nga ta nghena eka yona, rhangani mi ku: ‘Ku rhula a ku ve ni yindlu leyi!’ Kutani loko munhu wo rhula a ri kona kwalaho, ku rhula ka n’wina ku ta va ka yena.” Rungula ra vona a ri ta va rihi? “Mi ku ka vona,” ku vula Yesu, “Mfumo wa Xikwembu wu mi tshinelele.” Malunghana ni ntirho wa lava 70, Matthew Henry’s Commentary ya vika: “Ku fana ni N’wini wa vona, kun’wana ni kun’wana laha va endzeleke kona, a va chumayela hi muti ni muti.”
Swiletelo swa Yesu eka lava 70 swa fana ni leswi a swi nyikeke lava 12 loko a va rhuma ku ya chumayela eGaleliya kwalomu ka lembe emahlweninyana. A a nga tsundzuxi lava 70 hi ta nkaneto lowu va nga ta langutana na wona, a va lunghiselela ku vula rungula eka vini va mindyangu ntsena, kambe u va nyika matimba yo hanyisa vavabyi. Xisweswo, loko Yesu a fika endzhakunyana, vo tala va ta tsakela ku vona N’wini loyi vadyondzisiwa va yena va kotaka ku endla swilo swo tano leswi hlamarisaka.
Ku chumayela ka lava 70 ni ntirho wa Yesu wa ku ta hi le ndzhaku swi va swa xinkarhana swinene. Hi xihatla swipano swa 35 swa vachumayeri va Mfumo swi sungula ku tlhelela eka Yesu. “Hosi,” va vula hi ku tsaka, “na wona mademona, hi vito ra wena ma hi yingisa.” Xiviko xo tano xa ntirho entiyiweni xi nyanyule Yesu, hikuva wa hlamula a ku: “A ndzi vona Sathana, a wa hi le tilweni tanihi rihati. Vonani, ndzi mi nyika matimba ya ku kandziyela tinyoka ni swipame.”
Yesu wa swi tiva leswaku endzhaku ka ku tswariwa ka Mfumo wa Xikwembu hi nkarhi wa makumu, Sathana ni mademona ya yena va ta hlongoriwa etilweni hi xiviri. Kambe sweswi ku hlongoriwa loku ka mademona lama nga vonakiki hi vanhu ntsena ku tirha tanihi xitiyisekiso lexi engetelekeke xa xiendlakalo lexi taka. Hikwalaho, Yesu u vulavula hi ku wa ka nkarhi lowu taka ka Sathana etilweni tanihi mhaka ya xiviri. Kutani ke, i ku fanekisela leswi lava 70 va nyikiwaka matimba yo kandziyela tinyoka ni swipame. Hambi swi ri tano, Yesu u ri: “Mi nga tsaki hi leswi mimoya yi mi yingisaka; kambe tsakani hi leswi mavito ya n’wina ma tsariweke etilweni.”
Yesu u tsakile swinene kutani u dzunisa Tata wakwe erivaleni hi ku tirhisa malandza lawa ya yena lama titsongahataka hi ndlela yo tano ya matimba. Loko a hundzulukela eka vadyondzisiwa va yena, u ri: “Ma katekile mahlo lama vonaka leswi mi swi vonaka! Hikuva ndza mi byela leswaku vaprofeta lavo tala ni tihosi leto tala, va naverile ku vona leswi mi swi vonaka, kambe a va swi vonanga; hambi ku ri ku twa leswi mi swi twaka, a va swi twanga.” Luka 10:1-24; Matewu 10:1-42; Nhlavutelo 12:7-12.
▪ Yesu u chumayele kwihi eka malembe manharhu yo sungula ya vutirheli bya yena, naswona hi yihi nsimu leyi a yi hlanganisaka eka tin’hweti ta yena ta tsevu to hetelela xana?
▪ Hi kwihi laha Yesu a rhumaka lava 70 ku ya kuma vanhu kona?
▪ Ha yini Yesu a ku ana se u vone Sathana a wa ematilweni ke?
▪ Lava 70 va ta kandziyela tinyoka ni swipame hi ndlela yihi xana?