Ndzima 73
Musamariya Wa Muakelani
YESU kumbexana u le kusuhi na Bethani, ndhawu ya kwalomu ka tikhilomitara tinharhu ku suka eYerusalema. Wanuna loyi a tivaka ngopfu Nawu wa Muxe wa n’wi tshinelela hi xivutiso, a vutisa a ku: “Mudyondzisi, ndzi ta endla yini ku kuma vutomi lebyi nga heriki?”
Yesu wa swi vona leswaku wanuna loyi, mudyondzisi wa nawu, a nga vutiseli ku tiva kambe, ematshan’wini ya sweswo, hikuva u navela ku n’wi ringa. Xikongomelo xa mudyondzisi loyi wa nawu xi nga ha va xo endla leswaku Yesu a hlamula hi ndlela leyi nga ta khunguvanyisa mintshembo ni timbilu ta Vayuda. Kutani Yesu u endla leswaku mudyondzisi wa nawu a tiboha, a vutisa a ku: “Ku tsariwile yini eNawini? U hlaya yini kona?”
Loko a hlamula, mudyondzisi wa nawu u tirhisa vutlhari lebyi nga tolovelekangiki, a tshaha emilawini ya Xikwembu eka Deuteronoma 6:5 na Levitika 19:18 a ku: “‘Rhandza Hosi Xikwembu xa wena, hi mbilu ya wena hinkwayo, ni moya wa wena hinkwawo, ni matimba ya wena hinkwawo, ni ku anakanya ka wena hinkwako,’ naswona: ‘Rhandza munhu-kuloni kukota loko u tirhandza.’”
“U hlamule kahle,” ku vula Yesu. “Endla sweswo, u ta hanya.”
Hambi swi ri tano, mudyondzisi wa nawu a nga aneriseki. Nhlamulo ya Yesu a yi kongomi hi laha ku ringaneke eka yena. U lava nhlamuselo leyi humaka eka Yesu leswaku mavonelo ya yena ya kahle naswona u lulamile eku hanyeni ka yena ni van’wana. Hikwalaho ke, wa vutisa: “Munhu-kulorhi i mani xana?”
Vayuda va tshembe leswaku rito leri nge “nakulorhi” ri tirha eka Vayuda-kulobye ntsena tanihi laha mongo wa Levitika 19:18 wu vonakaka wu kombisa ha kona. Kahle-kahle endzhakunyana hambi ku ri muapostola Petro u te: “Ma swi tiva swinene leswaku swa yila eka Muyuda ku endzela munhu wa rixaka rin’wana kumbe ku tshama na yena.” Kutani mudyondzisi wa nawu, kumbexana ni vadyondzisiwa va Yesu, va tshemba leswaku va lulamile loko va hanya ntsena ni Vayuda-kulobye hi tintswalo, tanihi leswi elangutelweni ra vona, lava nga riki Vayuda va nga riki vanakulobye va vona.
Handle ko khunguvanyisa vayingiseri va yena, Yesu a nga ri lulamisa njhani langutelo ra vona? U va byela xitori, lexi seketeriweke eka leswi humelelaka hakunene. “[Muyuda],” Yesu wa hlamusela, “a a rhelela hi le Yerusalema, a ya eYeriko, kutani a wela emavokweni ya swigevenga, swi n’wi hluvula tinguvu, swi n’wi ba, kutani swi suka swi famba, swi n’wi siya a ri kusuhi ni ku fa.”
“Kutani ku tshuka ku humelela muprista,” Yesu u ya emahlweni, “a rhelela hi ndlela yoleyo, loko a n’wi vona, a papalata. Ku ta fika Mulevhi kwalaho, kutani loko a n’wi vona, na yena a papalata. Kambe Musamariya un’wana loyi na yena a a ri eriendzweni, a fika kwalaho munhu loyi a nga kona; loko a n’wi vona a n’wi twela vusiwana.”
Vaprista vo tala ni vapfuni va vona va Valevhi va le tempeleni va tshama eYeriko, mpfhuka wa 23 wa tikhilomitara hi gondzo leri chavisaka leri rhelelaka hi 900 wa timitara loko va suka laha va tirhaka kona etempeleni eYerusalema. Muprista ni Mulevhi a va ta languteriwa ku pfuna Muyuda-kulobye la nga ekhombyeni. Kambe a va pfuni. Ematshan’wni ya sweswo, Musamariya wa pfuna. Vayuda va venga Vasamariya ngopfu lerova sweswinyana va rhuketele Yesu hi marito yo vavisa hi ku n’wi vitana “Musamariya.”
Xana Musamariya u endla yini ku pfuna Muyuda? “A ta kusuhi na yena,” ku vula Yesu, “a n’wi chela mafurha ni vhinyo etimbangeni, a bohelela, a n’wi gadisa xifuwo lexi a a famba ha xona, a n’wi yisa endlwini ya vaendzi, kutani a n’wi tshungula kona. Nimixo a humesa macheleni mambirhi, a nyika n’wini wa yindlu, a ku ka yena: ‘N’wi tshungule, hinkwaswo leswi u nga ta swi humesa ku tlula mali leyi, ndzi ta ku tlherisela swona, siku ndzi vuyaka.’”
Endzhaku ko n’wi byela xitori, Yesu u vutisa mudyondzisi wa nawu a ku: “Hi ku vona ka wena, xana i mani eka lavanharhu la nga va munhu-kulobye wa munhu loyi a weleke emavokweni ya swigevenga xana?”
Hi ku titwa a nga ntshunxekanga ku nyika ku bumabumela kwihi na kwihi eka Musamariya, mudyondzisi wa nawu u hlamula hi ku olova a ku: “Hi loyi a n’wi endleke tintswalo.”
Yesu u hetelela hi ku: “Famba, u ya endlisa sweswo na wena.”
Loko Yesu a a lo byela mudyondzisi wa nawu hi ku kongoma leswaku lava nga riki Vayuda na vona a va ri vanakulobye, a ku nga ta va munhu loyi ntsena loyi a a ta ala leswi kambe vo tala va vahlaleri kumbexana a va ta teka tlhelo ra yena eku vulavurisaneni na Yesu. Hambi swi ri tano, xitori lexi xa ntiyiso evuton’wini, xi swi veke erivaleni hi ndlela leyi nga solekiki leswaku vanakulorhi va hina va katsa vanhu lava nga riki va rixaka ni tiko ra hina. Mayana ndlela yonghasi yo dyondzisa leyi Yesu a nga na yona! Luka 10:25-37; Mintirho 10:28; Yohane 4:9; 8:48.
▪ I swivutiso swihi leswi mudyondzisi wa nawu a swi vutisaka Yesu, naswona kahle-kahle xikongomelo xa yena eku vutiseni hi xihi?
▪ Vayuda va tshemba leswaku vanakulorhi va vona i vamani, naswona i xivangelo xihi lexi nga kona xo tshemba leswaku hambi va ri vadyondzisiwa va na langutelo leri?
▪ Yesu u ri hundziserisa ku yini langutelo lerinene leswaku mudyondzisi wa nawu a nga ri kaneti?