Musamariya A Va Muakelani Wa Ntiyiso

Loko Yesu a ha ri ekusuhi na Yerusalema, Vayuda vo hambanahambana va ta eka yena. Van’wana va lava ku dyondza eka yena kasi van’wana va lava ku n’wi ringa. Un’wana wa vona loyi a nga mutivi wa Nawu, u n’wi vutisa a ku: “Mudyondzisi, ndzi fanele ndzi endla yini leswaku ndzi kuma vutomi lebyi nga heriki?”—Luka 10:25.

Yesu wa swi tiva leswaku wanuna loyi a nga vutisi hileswi a lavaka ku tiva. Swi nga endleka a ringeta ku endla leswaku Yesu a hlamula hi ndlela leyi nga ta khunguvanyisa Vayuda. Yesu wa swi xiya leswaku wanuna loyi se u ni langutelo ro karhi. Hikwalaho, u hlamula hi ndlela leyi endlaka wanuna loyi a paluxa leswi a swi ehleketaka.

Yesu u vutisa a ku: “Nawu wu ri yini? Xana u hlayisa ku yini?” Wanuna loyi u dyondze Nawu wa Xikwembu kutani u hlamula hi ku ya hi leswi wu vulaka swona. U tshaha Deteronoma 6:5 na Levhitika 19:18, a ku: “‘U fanele u rhandza Yehovha Xikwembu xa wena hi mbilu ya wena hinkwayo, hi vutomi bya wena hinkwabyo, hi matimba ya wena hinkwawo ni hi mianakanyo ya wena hinkwayo,’ ni ‘ku rhandza warikwenu hi ndlela leyi u tirhandzaka ha yona.’” (Luka 10:26, 27) Xana wanuna loyi u hlamule kahle?

Yesu u byela wanuna loyi a ku: “U hlamule kahle; yana emahlweni u endla tano kutani u ta kuma vutomi.” Xana bulo leri ri helela kwalaho? Wanuna loyi a ngo lava ku hlamuseriwa ntsena kambe u lava “ku tiendla lonene” leswaku a tiyiseka ku langutelo rakwe ri kahle naswona a nga hoxisanga eka ndlela leyi a khomaka van’wana hayona. Kutani u vutisa a ku: “Kahlekahle i mani warikwerhu?” (Luka 10:28, 29) Xivutisonyana xexo xi ni mhaka yin’wana ya nkoka. Njhani?

Vayuda va tshemba leswaku rito leri nge “warikwerhu,” ri vula vanhu lava hlayisaka mikhuva ya Xiyuda ntsena naswona swi nga ha tikomba onge Levhitika 19:18 ya swi seketela sweswo. Entiyisweni, Muyuda a nga ha vula leswaku “a swi pfumeleriwi” ku endla xinghana ni munhu loyi a nga riki Muyuda. (Mitirho 10:28) Hikwalaho, wanuna loyi ni vadyondzisiwa van’wana va Yesu va tivona va lulamile loko va kombisa Vayudakulobye tintswalo. Kambe va nga ha khoma munhu la nga riki Muyuda hi tihanyi hileswi a nga riki “warikwerhu.”

Yesu a nga ri lulamisa njhani langutelo leri handle ko hlundzukisa wanuna loyi ni Vayuda van’wana? U endla tano hi ku hlamusela xifaniso lexi: “Wanuna un’wana a a rhelela a suka eYerusalema a ya eYeriko, kutani a hlangana ni swigevenga swi n’wi ba swi tlhela swi n’wi tekela swilo swa yena, hiloko swi baleka swi n’wi siya a ri kusuhi ni ku fa.” Yesu u ya emahlweni a ku: “Kutani swi hatlana ni leswaku muprista un’wana a a famba hi ndlela yoleyo, kambe loko a n’wi vona, a n’wi hundza hi le tlhelweni. Hi ndlela leyi fanaka, ku te Mulevhi, a n’wi vona kambe na yena a hundza hi le tlhelo. Hiloko ku humelela Musamariya un’wana, loko a n’wi vona, a n’wi twela vusiwana.”—Luka 10:30-33.

Wanuna loyi Yesu a n’wi byelaka mhaka leyi wa swi tiva leswaku vaprista vo tala ni Valevhi lava tirhaka etempeleni, va tshama eYeriko. Leswaku va muka va suka etempeleni, va fanele va famba 23 wa tikhilomitara egondzweni rero. Gondzo leri ri ni khombo hikuva ku ni swigevenga leswi tumbelaka eka rona. Loko muprista ni Mulevhi va kuma Muyudakulobye a vavisiwile, xana a va fanelanga va n’wi pfuna? Eka xifaniso xakwe, Yesu u vula leswaku a va n’wi pfunanga. Loyi a n’wi pfuneke i Musamariya, ku nga wanuna loyi a humaka eka rixaka leri vengiwaka hi Vayuda.—Yohane 8:48.

Musamariya u n’wi pfune njhani Muyuda loyi a vavisiweke? Yesu u ya emahlweni a ku: “Kutani a bohelela timbanga takwe, a ti chela mafurha ni vhinyo. A tlhela a n’wi khandziyisa xifuwo xakwe, a n’wi yisa endlwini ya vaendzi a n’wi khathalela. Hi siku leri landzelaka a nyika n’wini wa yindlu ya vaendzi tidenari timbirhi, a tlhela a ku: ‘N’wi khathalele naswona loko ko laveka mali yo tlula leyi, ndzi ta ku hakela loko ndzi vuya.’”—Luka 10:34, 35.

Loko a heta ku hlamusela mhaka leyi, Yesu Mudyondzisi Lonkulu u vutisa wanuna loyi xivutiso lexi tlhontlhaka miehleketo, u ri: “I mani eka lavanharhu loyi u vonaka a ri warikwavo eka munhu loyi a hlaseriweke hi swigevenga?” Kumbexana swi n’wi khomisa tingana wanuna loyi ku hlamula a ku i “Musamariya,” hikwalaho u hlamula a ku: “Hi loyi a n’wi kombeke tintswalo.” Kutani Yesu u endla leswaku dyondzo yakwe yi twisiseka kahle, a ku: “Famba u ya endla tano na wena.”—Luka 10:36, 37.

Mayana ndlela leyinene yo dyondzisa! Loko Yesu a lo byela wanuna loyi leswaku vanhu lava nga riki Vayuda i vaakelani vakwe, xana wanuna loyi ni Vayuda van’wana lava n’wi yingiseke a va ta va va swi amukerile sweswo? Nikatsongo. Hambiswiritano, ya twisiseka nhlamulo ya xivutiso lexi nge, “Kahlekahle i mani warikwerhu?” hikuva Yesu u hlamusele xifaniso hi ndlela yo olova ni ku tirhisa leswi vayingiseri vakwe va swi tivaka kahle. Munhu loyi a nga muakelani wa ntiyiso i munhu loyi a kombisaka rirhandzu ni tintswalo leti Matsalwa ma hi byelaka leswaku hi ti kombisa.