Ndzima 85

Ku Lava Lava Lahlekeke

YESU u hisekela ku lava ni ku kuma lava nga ta tirhela Xikwembu hi ku titsongahata. Kutani wa lava naswona u vulavula ni un’wana ni un’wana ehenhleni ka Mfumo, ku katsa ni vadyohi lava tivekaka. Sweswi vanhu vo tano va tshinelela ekusuhi leswaku va n’wi yingisela.

Loko va vona leswi, Vafarisi ni vatsari va xopaxopa Yesu swihoxo hikwalaho ka ku endla vunghana ni vanhu lava va va xiyaka va nga fanelanga. Va n’unun’uta va ku: “Munhu loyi u amukela vadyohi.” Sweswo swi le hansi ka ku xiximeka ka vona swonghasi! Vafarisi ni vatsari va hanyisana ni vanhu lava tolovelekeke ku fana ni thyaka ehansi ka minkondzo ya vona. Entiyisweni, va tirhisa xiga xa Xiheveru ‛am ha·’aʹrets, “vanhu va tiko [misava],” ku komba ku nyenya ka vona vanhu vo tano.

Hi tlhelo rin’wana, Yesu u hanyisana ni un’wana ni un’wana hi ku xixima, musa ni ntwela-vusiwana. Hikwalaho, vo tala va vanhu lava va nga nyawuriki, ku katsa ni vanhu lava tivekaka hi ku endla swo biha, va hisekela ku n’wi yingisela. Kambe xana ku vuriwa yini hi ku xopaxopa ka Vafarisi swihoxo eka Yesu hikwalaho ka ku tirhisa matshalatshala ematshan’wini ya lava va va xiyaka va nga fanelanga?

Yesu u hlamula xisolo xa vona hi ku tirhisa xifaniso. U vulavula hi langutelo ra Vafarisi hi voxe, onge hi loko va lulamile naswona va ri lava sirhelelekeke etshangeni ra Xikwembu, kasi ‛am ha·’aʹrets lava sandzekaka va lahlekile naswona va le xiyin’weni lexi lahlekeke. Yingisa loko a ri karhi a vutisa:

“Loko un’wana wa n’wina a ri ni dzana ra tinyimpfu, kutani a lahlekeriwa hi yin’we ya tona, xana a nga ka a nga siyi leta 99 enhoveni, a ya lava leyi lahlekeke, a kondza a yi kuma xana? Kutaku loko a yi kumile, a yi tlakula, a yi pakatsa a tsakile. Loko a fika kaya, a rhamba vanghana ni lava a akelaneke na vona, a ku ka vona: ‘A hi tsakeni swin’we, hikuva ndzi kumile nyimpfu ya mina leyi a yi lahlekile.’”

Kutani Yesu u hlamusela mhaka yakwe, u hambeta a ku: “Ndza mi byela leswaku hi mukhuva wolowo, ku ta va ni ku tsaka etilweni, ku tsaka loku nga ta va kona hikokwalaho ka lava lulameke va 99 lava nga ha riki na mfanelo ya ku hundzuka.”

Vafarisi va tivona va lulamile naswona xisweswo va nga ri na xilaveko xa ku hundzuka. Loko van’wana va vona va kanete Yesu malembe ma nga ri mangani lama hundzeke hikwalaho ka ku dya ni valuvisi ni vadyohi, u va byele ku: “A ndzi tanga ku ta vitana lava lulameke, kambe vadyohi.” Vafarisi lava tivonaka va lulamile, lava hlulekaka ku vona xilaveko xa vona xo hundzuka, a va tisi ntsako etilweni. Kambe vadyohi lava hundzukaka hakunene va wu tisa.

Ku tiyisa mhaka ya leswaku ku kondleteriwa ka vadyohi lava lahlekeke i xivangelo xa ntsako lowukulu, Yesu u hlamusela xifaniso xin’wana. U ri: “Loko wansati a ri ni khume ra macheleni, kutani a lahlekeriwa hi rin’we ntsena, xana a nga ka a nga lumeki rivoni, a kukula yindlu, a lavisisa swinene a kondza a ri kuma xana? Kutaku loko a ri kumile, a rhamba vanghana ni lava va akelaneke na yena, a ku ka vona: ‘A hi tsakeni swin’we, hikuva ndzi kumile cheleni ra mina, leri a ri lahlekile.’”

Kutani Yesu u nyika nhlamuselo leyi fanaka, a ku: “Ndza mi byela leswaku, hi mukhuva wolowo, tintsumi ta Xikwembu ti ta tsaka swinene loko mudyohi hambi a ri un’we a hundzuka.”

Mawaku ku xiyeka konghasi ka nkhathalelo wa rirhandzu wa tintsumi ta Xikwembu eka ku vuyeteriwa ka vadyohi lava lahlekeke! Ngopfu-ngopfu leswi swi tano tanihi leswi vanhu lava a va nga nyawuli, ‛am ha·’aʹrets lava nyenyiweke eku heteleleni va nghenaka enxaxamelweni wa ku va xirho eMfun’weni wa Xikwembu wa le tilweni. Hikwalaho, va kuma ndhawu etilweni leyi nga ehenhla ku tlula ya tintsumi hi toxe! Kambe ematshan’wini yo titwa ti ri na mavondzo kumbe ku tsan’wa, hi ku titsongahata tintsumi ti tlangela leswaku vanhu lava va vadyohi va langutane ni ku hlula swiyimo evuton’wini leswi nga ta va hlomisela ku tirha tanihi tihosi ni vaprista va le tilweni va ntwela-vusiwana ni musa. Luka 15:1-10; Matewu 9:13; 1 Vakorinto 6:2, 3; Nhlavutelo 20:6.

▪ Ha yini Yesu a tihlanganisa ni lava tiviwaka va ri vadyohi, naswona swi vanga ku sandza kwihi ka Vafarisi?

▪ Vafarisi va va languta njhani vanhu lava tolovelekeke?

▪ Xana i swifaniso swihi leswi Yesu a swi tirhisaka, naswona hi nga dyondza yini eka swona?

▪ Ha yini ku tsaka ka tintsumi ku ri loku xiyekaka?