Ku Tsaka Hikwalaho Ka Mudyohi Loyi A Hundzukaka

Yesu u kandziyise nkoka wa ku titsongahata mikarhi yo tala entirhweni wakwe wo chumayela. (Luka 14:8-11) U tiyimisela ku pfuna vavanuna ni vavasati lava navelaka ku tirhela Xikwembu hi ku titsongahata. Ku ta fikela sweswi, swi nga endleka van’wana va ha ri vadyohi lava dumeke.

Vafarisi ni vatsari va xiya leswaku vanhu volavo, ku nga vanhu lava va va tekaka va nga ri va nkoka, va amukela Yesu ni rungula rakwe. Va gungula va ku: “Munhu loyi i munghana wa vadyohi naswona u dya na vona.” (Luka 15:2) Vafarisi ni vatsari va tivona va tlakukile naswona va khoma vanhu lava tolovelekeke hi ndlela yo biha. Ku kombisa leswaku va delela, varhangeri lava va tirhise xiga xa Xiheveru lexi nge ʽam ha·ʼaʹrets, ku nga “vanhu va tiko [misava]” loko va vulavula ha vona.

Ku hambana na vona, Yesu u kombisa vanhu hinkwavo xichavo, musa ni ntwelavusiwana. Vanhu vo tala lava tekeriwaka ehansi ku katsa ni vanhu lava dumeke hi ku dyoha, va tiyimisele ku yingisela Yesu. Xana Yesu u titwa njhani loko a soriwa hileswi a amukelaka vanhu vo tano lava languteriwaka ehansi?

Nhlamulo yi va erivaleni loko a va byela xifaniso lexi khumbaka mbilu, lexi fanaka ni lexi a xi hlamuseleke eKapernawume. (Matewu 18:12-14) Ndlela leyi Yesu a hlamuselaka swilo hayona yi twala onge hiloko Vafarisi va lulamile ni ku hlayiseka eka Xikwembu. Kasi loko ku ri vanhu lava languteriwaka ehansi, u va hlamusela onge i vanhu lava hambukeke ni lava lahlekeke. Yesu u ri:

“I mani eka n’wina loyi loko a ri ni tinyimpfu ta 100, kutani a lahlekeriwa hi yin’we, a nga ta ka a nga siyi leta 99 enhoveni, a ya lava leyi lahlekeke kukondza a yi kuma? Loko a yi kumile wa yi tlakula kutani a tsaka. Loko a fika ekaya a vitana vanghana ni vaakelani vakwe, a ku, ‘Tsakani na mina, hikuva ndzi kume nyimpfu ya mina leyi a yi lahlekile.’”—Luka 15:4-6.

Xana Yesu u yi hlamusela njhani mhaka leyi? U ri: “Hilaha ku fanaka, ku ta va ni ntsako lowukulu swinene etilweni loko mudyohi un’we a hundzuka ku tlula lava 99 lava lulameke naswona swi nga laviki leswaku va hundzuka.”—Luka 15:7.

Swi fanele swi hlundzukise Vafarisi loko Yesu a vulavula hi ku hundzuka. Va titeka va lulamile naswona a va xi voni xivangelo xo hundzuka. Loko van’wana va Vafarisi emalembeni lama hundzeke va sola Yesu hileswi a a dya ni valuvisi ni vadyohi, u va hlamule a ku: “Ndzi tele ku ta vitana vadyohi, ku nga ri vanhu lava lulameke.” (Marka 2:15-17) Vafarisi lava a va tivona va lulamile, va tsandzeke ku vona xivangelo xa ku hundzuka naswona hikwalaho ka sweswo, a va nga endli leswaku ku va ni ntsako etilweni. Kambe ku endleka leswi hambaneke loko vadyohi va hundzuka.

Loko a kandziyisa yinhla yakwe ya leswaku ku vuyeteriwa ka vadyohi lava lahlekeke swi endla leswaku ku tsakiwa etilweni, Yesu u hlamusela xifaniso xin’wana lexi vulavulaka hi ndyangu wun’wana, u ri: “Kumbe i mani wansati loyi a nga ni tidrakma ta khume, loyi loko a lahlekeriwe hi drakma yin’we, a nga lumekiki rivoni a kukula yindlu ya yena, a yi lava hi vukheta kukondza a yi kuma? Kutani loko a yi kumile a vitana vanghana ni vaakelani vakwe, a ku, ‘Tsakani na mina, hikuva ndzi kume drakma ya mina leyi a yi ndzi lahlekerile.’”—Luka 15:8, 9.

Nhlamuselo leyi Yesu a yi hlamuselaka eka xifaniso lexi, yi fana ni leyi a vulavuleke hayona loko a ha ku vulavula hi xifaniso xa nyimpfu leyi lahlekeke. Kutani u ri: “Hilaha ku fanaka, ndza mi byela, tintsumi ta Xikwembu ta tsaka loko mudyohi un’we a hundzuka.”—Luka 15:10.

Anakanya ndlela leyi tintsumi ta Xikwembu ti tsakaka hayona loko vadyohi lava a va lahlekile va kumeka! Sweswo i swa nkoka hikuva vadyohi lava hundzukaka va kuma ndhawu leyi tlakukeke ku tlula ya tintsumi hi toxe eMfun’weni wa Xikwembu wa le tilweni! (1 Vakorinto 6:2, 3) Nilokoswiritano, tintsumi a ti na mavondzo. Hikwalaho, xana hi fanele hi titwa njhani loko mudyohi la hundzukaka hi ku helela a tlhelela eka Xikwembu?